The Phnom Penh Post Search

Search form

Logo of Phnom Penh Post newspaper Phnom Penh Post - ក្មេង​៣នាក់​លង់​ទឹក​ស្រះ​ស្លាប់​នៅ​បន្ទាយ​មាន​ជ័យ​​




ក្មេង​៣នាក់​លង់​ទឹក​ស្រះ​ស្លាប់​នៅ​បន្ទាយ​មាន​ជ័យ​​

ក្មេង​៣នាក់​លង់​ទឹក​ស្រះ​ស្លាប់​នៅ​បន្ទាយ​មាន​ជ័យ​​

បន្ទាយមានជ័យៈ ​​ក្មេង​ប្រុស​ ៣ ​នាក់​ ក្នុង​នោះ​មាន​ ២ ​នាក់ ​ជា​បងប្អូន​បង្កើត​ បាន​លង់​ទឹក​ស្រះ​​ស្លា​ប់​ កាល​ពី​​ល្ងាច​ថ្ងៃ​អា​ទិត្យ​ ខណៈ​ដែល​ឪពុក​ម្តាយ​របស់​ពួក​គេ​ ទៅ​ស៊ី​ឈ្នួល​ដក​ដំឡូង​​។

លោក​សុង សុខុន អធិការ​នគរ​បាល​ស្រុក​ស្វាយ​ចេក ​បាន​ឲ្យ​ដឹង​ថា មុន​ពេល​កើត​ហេតុ​ ពេល​ល្ងាច​ក្មេង​រង​គ្រោះ​ទាំង​ ៣ នាក់ ​​​បាន​នាំគ្នាទៅ​លេង​​ទឹក នៅ​ក្នុង​​ស្រះ​វត្ត​ស្ល​ក្រាម​ ក្នុង​ភូមិ​បឹង​ស្នោ​ឃុំ​ស្ល​ក្រាម​ ស្រុក​ស្វាយ​ចេក ដែល​មាន​ចម្ងាយ​ប្រមាណ​ ជា​ជិត ៣០០​ ម៉ែត្រ​ ពី​ផ្ទះ​របស់​ពួក​គេ។ សាក​សព​ក្មេង​ប្រុស​ទាំង​ ៣ នាក់ ត្រូវ​បាន​កម្មករ​ម្នាក់​ប្រទះ​ឃើញ​ស្លាប់​ នៅ​ក្នុង​ស្រះ ខ​ណៈចុះ​ទៅ​ដង​ទឹក​​។

លោ​ក​សុខុន បាន​ឲ្យ​ដឹង​​ បន្ទាប់​ពី​​ពិនិត្យ​​សាក​សព​ ​ដោយ​​សន្និ​ដ្ឋាន​ថា​ មូល​ហេតុ​នៃ​គ្រោះ​ថ្នាក់​នេះ ​អាច​ដោយ​សារតែ​ពួក​គេ នាំ​គ្នា​ចុះ​​ទៅ​លេង​ទឹក​ស្រះ ហើយ​ប្រហែល​ជាមាន​ក្មេងម្នាក់ ​ក្នុងចំណោម​ពួកគេ​ ចុះទៅ​កន្លែង​ជ្រៅ ក៏​​លង់​ទឹក ​ហើយ​ក្មេង​ ២ ​នាក់​ទៀត ក៏​នាំ​គ្នាចុះ​ទៅ​​ជួយ​ ដែល​អាច​មាន​ការ​​​ស្រវ៉ា​តោង​គ្នា ទើប​បាន​​ជា​បណ្តាល​ឲ្យ​លង់ទឹក​ស្លាប់​ទាំង ​៣ នាក់​បែប​នេះ។​

​លោក​សុង សុខុន ​បាន​ឲ្យ​ដឹង​ទៀត​ថា ក្មេង​រង​គ្រោះ​ មាន​ឈ្មោះ​ ប៉ាក់​ ដិ​ការ​ អាយុ​ ៨ ​ឆ្នាំ​ ប៉ាក់​ ថា​វី​ អាយុ​ ៧​ ឆ្នាំ​ ​ជា​បង​ប្អូន​បង្កើត​ មាន​ឪពុក​ឈ្មោះ​ ឆេ​ង​ ថា​រី​ អាយុ​ ៤៦ ​ឆ្នាំ​ និងម្តាយ​ឈ្មោះ​ អៀង​ ស្រី​នី​ អាយុ​ ៣២ ​ឆ្នាំ​ និង​ក្មេង​ម្នាក់​ទៀត ឈ្មោះ​យូ​ កក្កដា​ អាយុ​ ១២​ ឆ្នាំ​ មាន​ឪពុក​ ឈ្មោះ​ យូ​ យ៉ែ​ន​ អាយុ​៣២ ​ឆ្នាំ​ និង​ម្តាយ​ឈ្មោះ​ គឹ​ម​ នួន​ អាយុ​ ៣២ ​ឆ្នាំ​។ គ្រួសារ​ក្មេង​រង​គ្រោះ​ រស់​នៅ​ភូមិ​ ឃុំ​ កើត​ហេតុ​ខាង​លើ​។ ឪ​ពុក​ម្តាយ​ក្មេង​រង​គ្រោះ​ទាំង ៣​ នាក់​ គឺ​សុទ្ធ​តែ​ជា​គ្រួសារ​ក្រីក្រ​ និង​តែង​តែ​ទៅស៊ី​ឈ្នួល​ដក​ដំឡូង​ឲ្យ​គេ​ទាំង​ថ្ងៃទាំង​យប់​ ដោយ​ទុក​ក្មេង​ទាំង​នេះ​​ចោល ​គ្មាន​មនុស្ស​ចា​ស់នៅ​ជាមួ​យ​មើល​ការ​ខុស​ត្រូវ​ ​ទើប​មាន​គ្រោះ​ថ្នាក់​បែប​នេះ​៕

អត្ថបទគួរចាប់អារម្មណ៍