The Phnom Penh Post Search

Search form

Logo of Phnom Penh Post newspaper Phnom Penh Post - ក្រសួង​នឹង​ចាត់​វិធានការ​លើ​​សហជីព​ដែល​បំផុស​ឲ្យ​មាន​កូដកម្ម

ក្រសួង​នឹង​ចាត់​វិធានការ​លើ​​សហជីព​ដែល​បំផុស​ឲ្យ​មាន​កូដកម្ម

ក្រសួង​នឹង​ចាត់​វិធានការ​លើ​​សហជីព​ដែល​បំផុស​ឲ្យ​មាន​កូដកម្ម

_MG_0059
កិច្ចប្រជុំរបស់ក្រុមប្រឹក្សាការងារ ស្តីពីការដំឡើងប្រាក់ខែកម្មករកាលពីម្សិលមិញ ដែលដឹកនាំដោយលោក អ៊ិត សំហេង រដ្ឋមន្ត្រីក្រសួងការងារ ម៉ៃ វីរៈ

ភ្នំពេញៈ ក្រសួង​ការងារ​បាន​បញ្ជារ​ឲ្យ​អង្គការ​សហជីព​ទាំងអស់​ដែលប្រឆាំង​ទៅ​នឹង​សេចក្តី​សម្រេច​របស់​គណៈកម្មការ​ប្រឹក្សា​ការ​ងារ​ដែល​​កំពុង​តែ​បំពុល​បរិយា​កាស​បញ្ឈប់​សកម្មភាព​បំផុស​បាតុកម្ម​ និង​កូដកម្ម​ ហើយ​ក្រសួង​នឹង​ចាត់​វិធាន​ការ​យ៉ាង​ម៉ឺង​ម៉ាត់​ចំពោះ​ជន​ល្មើស​តាម​ផ្លូវ​ច្បាប់។

យោង​តាម​សេក្តី​ជូន​ដំណឹង​របស់​ក្រសួង​ការងារ​ នៅ​ថ្ងៃ​ពុធ​ ទី​២៥ ​ខែ​ធ្នូ​នេះ​ថា​ ក្រោយ​ពីគណៈកម្មការ​ប្រឹក្សា​ការ​ងារ​បាន​ចេញ​​សេចក្តី​សម្រេច​ស្តី​ពី​ការ​តម្លើង​ប្រាក់​ឈ្នួល​អប្បបរមា​មាន​សហជីព​មួយ​ចំនួន​ក្នុង​នោះ​មាន​ទាំង​សហជីព​ដែល​ជា​សមាជិក​គណៈកម្មការប្រឹក្សា​ការងារផង​ដែរ ដែល​បាន​ញុះ​ញង់​ប្រឆាំង​ជំទាស់​ធ្វើ​ឲ្យ​ប៉ះពាល់​ដល់​ស្ថិរភាព​ការងារ និង​ជីវភាព​របស់​កម្មករនៅ​តាម​រោង​ចក្រ​មួយ​ចំនួន និង​បាន​បំភ្លៃ​ទៅ​ជា​បញ្ហា​នយោបាយ​បម្រើ​ឲ្យ​​សកម្មភាព​របស់​គណបក្ស​នយោបាយ។

សេចក្តី​ជូន​ដំណឹង​បាន​ឲ្យ​ដឹង​ទៀត​ថា៖ «អង្គការ​សហជីព​ណា​ដែល​ប្រឆាំងទៅ​នឹង​ការ​សម្រេច​​របស់​ក្រុម​ប្រឹក្សា​ការងារ​ គឺ​ប្រឆាំង​ទៅ​នឹង​ច្បាប់ ប្រឆាំង​ទៅ​នឹង​គោលការណ៌​លទ្ធិ​ប្រជា​ធិបតេយ្យ និង​ប្រឆាំងទៅនឹង​ខ្លួន​ឯង​ដែល​បាន​ចូល​រួម​ក្នុង​ការ​ពិ​ភាក្សា​ និងអនុម័ត»។

សហជីព​ដែល​ធ្វើស​កម្ម​ភាព​ប្រឆាំង​ជំទាស់​សេចក្តី​សម្រេច​​របស់​គណៈ​កម្មការ​ប្រឹក្សា​ការងារ​ត្រូវ​ទទួល​ខុស​ត្រូវ​ចំពោះ​មុខ​ច្បាប់​ ចំពោះ​មុខ​កម្មករ​និយោជិត និង​ផល​វិបាកទាំង​ឡាយ​ដែល​កើត​ឡើង​ដោយ​ការ​បំផុត​បាតុកម្ម​ទាមទារ​តាម​ជំហរ​ឯក​តោភាគី​របស់​ខ្លួន។

សេចក្តី​ជូន​ដំណឹងនេះ​បន្ត​ថា៖​​​ «ក្រសួង​ការងារ នឹង​រៀប​ចំ​យន្ត​ការ​ដើម្បី​តាម​ដាន​រាល់​សកម្មភាព​ទាំង​ឡាយ​របស់​អង្គការ​សហជីព និង​ការ​និយោជក​ក្នុង​ការ​អនុវត្ត​សេចក្តីសំរេច​របស់​គណៈកម្មការ​ប្រឹក្សា​ការងារ​ និង​ចាត់​វិធាន​ការ​ម៉ឺង​ម៉ាត់​ចំពោះ​ជន​ល្មើស​ទៅ​តាម​ផ្លូវច្បាប់»។

ជាមួយ​គ្នា​នេះ​ដែរ​ក្រសួង​ការងារ​នេះ​ក៏​បាន​ចេញ​នូវ​សេចក្តី​ប្រកាស​ព័ត៌​មាន​មួយ​ទៀត​ស្របគ្នា​នេះ​ផងដែរដោយ​បានជំរាបទៅ​ដល់ ​សាធារ​ណៈ​ជ​ន កម្មករ​និយោជិត និយោជក អង្គការវិជ្ជា​ជីវៈ អង្គការ​ជាតិ និង​អន្តរជាតិថា សហភាព​សហជីព​កម្ពុជា​ដែល​ដឹង​នាំ​ដោយ​លោក ​រ៉ុង​ ឈុន ​ដែល​អះ​អាង​ថា​ជា​ប្រធាន​នោះ ពុំ​មែន​ជា​សហជីព​ស្រប​ច្បាប់​ទេ។

សេចក្តី​ប្រកាស​នេះ​បាន​ឲ្យ​ដឹង​ទៀត​ថា៖ «សហជីព​នេះ​មិន​មាន​ការ​ចុះ​បញ្ជី​ការ​នៅ​ក្រសួង​ការងារ​នោះ​ទេ ពីព្រោះ​ថា​សហភាព​សហជីព​នេះ​ពុំ​មាន​នីតសម្ប​ទា​​គ្រប់​គ្រាន់​ដើម្បី​បាន​ការ​ទទួល​ស្គាល់​តាម​ផ្លូវ​ច្បាប់​ពី​ក្រសួង​ឡើយ»។

សេចក្តី​បាន​បន្តទៀត​ថា​ ដូច​នេះ​នៅ​រាល់​សកម្មភាព និង​រាល់​សេចក្តី​ថ្លែង​ការណ៌​ណាមួយ​របស់​លោក​ រ៉ុង ឈុន ​គឺ​មិនមែន​ជា​តំណាង​ឲ្យ​សម្លេង​របស់​កម្មករ​និយោជិត​នោះ​ទេ។

អត្ថបទគួរចាប់អារម្មណ៍