ភ្នំពេញៈ ក្រសួងព័ត៌មានបានជម្រាបទៅប្រព័ន្ធផ្សព្វផ្សាយទាំងអស់ក្នុងប្រទេសកម្ពុជាឲ្យបញ្ឈប់ការផ្សាយល្បែងស៊ីសងគ្រប់ប្រភេទទាំងនៅអនឡាញ វិទ្យុ ទូរទស្សន៍ ឬកាសែត ទស្សនាវដ្តី។
នៅក្នុងលិខិតមួយចុះថ្ងៃទី១ សីហា រដ្ឋមន្រ្តីក្រសួងព័ត៌មាន លោក ខៀវ កាញារីទ្ធ បានសរសេរថា ក្រសួង«បានជម្រាបរួចហើយទៅប្រព័ន្ធផ្សព្វផ្សាយឲ្យឈប់ផ្សាយល្បែងស៊ីសង ប៉ុន្តែនៅតែមានការផ្សាយមួយចំនួនដើម្បីទាក់ទាញប្រជាពលរដ្ឋកម្ពុជាឲ្យលេងល្បែងទាំងនោះដូចជាការភ្នាល់បាល់ ប្រណាំងសេះ និងល្បែងតាមអនឡាញ់ដទៃៗទៀត។
លិខិតនេះបានបន្តថា ការហាមប្រាមនេះគឺដើម្បី«រក្សាសណ្តាប់ធ្នាប់សាធារណៈ និងសីលធម៌សង្គម»។
លោក កាញារីទ្ធ បានសរសេរទៀតថា «ក្នុងករណី ប្រព័ន្ធផ្សព្វផ្សាយណាដែលតែបំពាន ក្រសួងនឹងចាត់ការទៅតាមច្បាប់»។
លោក ទូច សោភ័ណ្ឌ អ្នកគ្រប់គ្រងផ្នែកទីផ្សារនៅទស្សនាវដ្តីអង្គរធំ បានថ្លែងកាលម្សិលមិញថា ទស្សនាវដ្តីរបស់លោកមិនដែលផ្សព្វផ្សាយអំពីល្បែងទេ ហើយលោកគាំទ្រការព្រមានរបស់ក្រសួង។
លោកបន្តថា៖ «យើងមិនធ្វើអ្វីដែលមានផលអាក្រក់ទៅលើសង្គមទេ»។
លោក សោភ័ណ្ឌ បានថ្លែងបន្តថា បើទោះបីជាចំណូលបានមកពីការផ្សាយល្បែងស៊ីសងអាចច្រើនក៏ដោយ ក៏ទស្សនាវដ្តីរបស់លោកនឹងគោរពតាមច្បាប់។
លោក សោភ័ណ្ឌ ថ្លែងទៀតថា៖ «យើងចង់បានប្រាក់ចំណេញច្រើនសម្រាប់ការរកស៊ីរបស់យើង ប៉ុន្តែយើងត្រូវតែគិតអំពីអ្វីដែលក្រសួងអនុញ្ញាត និងមិនអនុញ្ញាត។ ប្រសិនបើក្រសួងធ្វើផ្ទុយនឹងលិខិតរបស់ក្រសួង ពួកគេនឹងហាមឃាត់អាជ្ញាប័ណ្ណសារព័ត៌មានរបស់យើង»។
លោកបន្តទៀតថា៖ «ខ្ញុំគិតថា វាល្អដែលក្រសួងចេញការហាមប្រាមស្តីពីការផ្សាយអំពីល្បែងស៊ីសងនេះ ពីព្រោះដូចដែលយើងដឹងហើយការលេងល្បែងគឺគ្មានសីលធម៌»។ PS
