ភ្នំពេញៈ នៅព្រឹកថ្ងៃអង្គារនេះ កម្មករកាត់ដេរ និងអ្នកគាំទ្រប្រហែល ៦០០០ នាក់ បានធ្វើការតវ៉ានៅមុខក្រសួងសង្គមកិច្ច និងអាចដើរក្បួនទៅសាលាក្រុងភ្នំពេញ ដោយជំរុញឲ្យរដ្ឋាភិបាល គាំទ្រការតវ៉ារបស់ពួកគេដែលបានឈានចូលដល់សប្តាហ៍ទី ២ ហើយ។
ការតវ៉ារបស់កម្មករនៅរោងចក្រ SLនៅមុខក្រសួងសង្គមកិច្ចនេះ កម្មករ បានអង្គុយបិទផ្លូវ ខណៈ ពេលកាលពីម្សិលមិញ កម្មករក៏បានបិទផ្លូវនៅម្តុំស្ទឹងមានជ័យផងដែរ បន្ទាប់ពីការចរចារពុំមានលទ្ធផល។
លោកឡាច ស៊ីធន កម្មករ និងជាសមាជិកសហជីព ស៊ីខៅឌូ ដែលតំណាងកម្មករនៅរោងចក្រ SL បានឲ្យដឹងថា កម្មករបានប្រមូលផ្តុំគ្នា និងស្នើសុំកិច្ចអន្តរាគមន៍ពីសាលាក្រុង ហើយបន្តស្នើក្រសួងសង្គមកិច្ចជំរុញមន្រ្តីរោងចក្រ SL ធ្វើការចរចា។ បើតាមលោក ស៊ីធន ការចរចាលើកទី២ រវាងកម្មករ និងថ្នាក់គ្រប់គ្រងរោងចក្រកាលពីថ្ងៃសុក្រ ពុំទទួលបានលទ្ធផលទេ។ មន្រ្តីក្រុមហ៊ុន ហាក់មិនពិចារណាលើការទាមទាររបស់កម្មករឡើយ ដោយបញ្ជូនអ្នកបកប្រែដែលគ្មានសិទិ្ធអំណាចមកចរចាជាមួយតំណាង កម្មករ។ ក្នុងចំណោមការទាមទារទាំង ៩ ចំណុចក៏មានការទាមទារប្រាក់ឈ្នួល ប្រចាំខែអប្បបរមា១៥០ដុល្លារផងដែរ ទាមទារប្រាក់ ៣ ដុល្លារសម្រាប់ថ្លៃបាយ ហើយទាមទារឲ្យក្រុមហ៊ុន បណ្តេញម្ចាស់ភាគហ៊ុនឈ្មោះ មាស សុថា។
សមាជិកសហជីព ស៊ីខៅឌូ ដែលធ្វើការនៅរោងចក្រ SL បានចោទប្រកាន់ថា ទង្វើរបស់លោក មាស សុថា ដែលនាំកងរាជអាវុធហត្ថមកឈរយាមនៅក្នុងរោងចក្រអស់រយៈពេល ៣ សប្តាហ៍កន្លងមក គឺជាការព្យាយាមបំភិតបំភ័យដល់មន្រ្តីសហជីពរបស់ខ្លួន។
លោក វង្ស សុវណ្ណ អគ្គលេខាធិការរងនៃគណៈកម្មាធិការដោះស្រាយកូដកម្ម និងបាតុកម្មនៃក្រសួងសង្គមកិច្ច បានថ្លែងថា កម្មករ SL ទាមទារច្រើនពេក និងថា គណៈកម្មាធិការលោកចង់ឲ្យមានការសម្របសម្រួលគ្នា។ «យើងមិនចង់ឲ្យកម្មករប្រមូលផ្តុំគ្នាធ្វើកូដកម្មទេ ព្រោះវាស្ទះចរាចរណ៍»៕ TK
