The Phnom Penh Post Search

Search form




Logo of Phnom Penh Post newspaper Phnom Penh Post - ប្រមុខការទូត កម្ពុជា​-ថៃ ជួប​ពិភាក្សា​ការ​ងារ​នៅ​ថ្ងៃ​ចន្ទ​នេះ

ប្រមុខការទូត កម្ពុជា​-ថៃ ជួប​ពិភាក្សា​ការ​ងារ​នៅ​ថ្ងៃ​ចន្ទ​នេះ

ប្រមុខការទូត កម្ពុជា​-ថៃ ជួប​ពិភាក្សា​ការ​ងារ​នៅ​ថ្ងៃ​ចន្ទ​នេះ

Meeting
កិច្ចប្រជុំរវាងប្រមុខការទូតកម្ពុជា និងសមភាគីថៃ នៅទីក្រុងប៉ោយប៉ែត នៅព្រឹកថ្ងៃចន្ទនេះ

ប៉ោយប៉ែតៈ លោក​ឧបនា​យក​រដ្ឋ​មន្ត្រី ហោ ណាំហុង រដ្ឋ​មន្ត្រី​ក្រសួង​ការ​បរទេស​កម្ពុជា​បាន​​ដឹក​នាំ​ក្រុម​ការងារ​កម្ពុជា​ ទៅ​ប្រជុំ​ពិភាក្សា​ការងារ ជាមួយ​នឹង​សមភាគី​ថៃ​ដែល​ដឹកនាំ​ដោយ​លោក សូរ៉ាពង្ស តូវីចាក់ឆៃគល់ រដ្ឋមន្ត្រី​ក្រសួង​ការ​បរទេស​ថៃ នា​ថ្ងៃ​​ចន្ទ​នេះទី ២៨ តុលា​​នេះ នៅ​​សណ្ឋាគារផ្កាយប្រាំមួយ ​នាទីក្រុង ប៉ោយប៉ែត ខេត្ត​បន្ទាយ​មាន​ជ័យ ប្រទេស​កម្ពុជា។

យោង​តាម​សេចក្តី​ប្រកាស​ព័ត៌មាន​របស់​ក្រសួង​ការ​បរទេស​កម្ពុជា បាន​ឲ្យ​ដឹង​​កាល​ពី​ថ្ងៃ​ព្រហស្បតិ៍​សប្តាហ៍​មុន​​ថា កិច្ច​ប្រជុំ​នេះ នឹង​ផ្តោត​លើ​ការ​អភិវឌ្ឍន៍​តំបន់ ព្រំដែន​កម្ពុជា​-ថៃ ឲ្យ​កាន់​តែ​មាន​ភាព​រីក​ចម្រើន​ថែម​ទៀត ពិភាក្សា​​ពី​​បញ្ហា​បើក​ច្រក​ព្រំដែន​ថ្មី​មួយ​ចំនួន ដើម្បី​បង្ករ​លក្ខណៈ​ងាយ​ស្រួល​ក្នុង​ចរាចរណ៍​ទំនិញ និង​ប្រជាជន​នៅ​តាម​ព្រំដែន​ក្នុង​តំបន់​នោះ​ផង​ដែរ។

មន្ត្រី​នៃ​សមាគមន៍​ការពារ​សិទ្ធិ​មនុស្ស​អាដហុក បាន​ឲ្យ​ដឹង​ថា ការ​បើក​ច្រក​អន្តរជាតិ​ថ្មី​នេះ គឺ​នៅ​ចំណុចស្ទឹងបត់ សង្កាត់​ផ្សារ​កណ្តាល ក្រុង​ប៉ោយប៉ែត។

បើ​តាម​សេចក្តី​ប្រកាស​ព័ត៌មាន​ដដែរ និងមន្ត្រី​អាដ​ហុក អង្គ​​ប្រជុំ​ក៏​នឹង​ពិភាក្សា ការ​រក្សា​ឲ្យ​បាន​នូវ​សន្តិភាព សន្តិសុខ និង​ស្ថេរភាព​នៅ​តាម​បណ្តោយ​ព្រំដែន​នៃ​ប្រទេស​ទាំង​ពីរ​ដែរ។

ប្រទេសកម្ពុជា និងថៃ កំពុង​ទន្ទឹង​​រង់ចាំស្តាប់ តុលាការ​យុត្តិធម៌​អន្តរជាតិ (ICJ) ដែល​គ្រោង​នឹង​បកស្រាយ​សាលដីកា​របស់​ខ្លួន​ស្តី​ពី​ជម្លោះ​ដី​ក្បែរ​ប្រាសាទ ព្រះ​វិហារ នៅ​ថ្ងៃទី១១ ខែ​វិច្ឆិកា ខែក្រោយនេះ គឺ​ជា​ការ​រង់​ចាំ​ស្តាប់​ នូវ​​សម្រេច​របស់ ICJ អំពី​នរណា​ជា​កម្មសិទ្ធិ​លើ​ដី​តំបន់ ៤,៦ គីឡូម៉ែត្រ ការ៉េ​ជុំវិញ​ប្រាសាទ ព្រះ​វិហារ ដែល​កម្ពុជា បាន​ចុះ​ក្នុង​បញ្ជី​បេតិកភណ្ឌ​ពិភពលោក​កាល​ពី​ថ្ងៃ ទី៧ ខែ កក្កដា ឆ្នាំ ២០០៨ ហើយ​ក្រោយ​មក​ទៀត មាន​ការ​ប្រយុទ្ធ​គ្នា​ដ៏​តាន​តឹង​បាន​ផ្ទុះ​ឡើង​រវាង កម្ពុជា និង ថៃ កាល​ពី​ឆ្នាំ ២០១១ ដែល​បាន​ធ្វើ​ឲ្យ​មនុស្ស​យ៉ាង​តិច ១៨ នាក់​ស្លាប់ និង​រាប់​ពាន់​នាក់​ផ្សេង​ទៀត​ត្រូវ​ខ្ចាត់​ព្រាត់។

យ៉ាងណាក៏ដោយ នៅ​ក្នុង​សេចក្តី​ថ្លែង​ការណ៍​មួយ ចេញ​ផ្សាយ​បន្ទាប់​ពី​កិច្ច​ប្រជុំ​គណៈ​រដ្ឋ​មន្ត្រី​កាល​ពី​ថ្ងៃ​សុក្រ លោក​នាយក​រដ្ឋ​មន្ត្រី ហ៊ុន សែន បាន​ណែនាំ​ដល់​កម្លាំង​ប្រដាប់​អាវុធ​ទាំង​អស់ នៅ​តាម​បណ្តោយ​ព្រំដែន កម្ពុជា​-ថៃ ឲ្យ​រក្សា​ភាព​ស្ងប់​ស្ងាត់ បើ​ទោះ​បីជា​តុលាការ ICJ ប្រកាស​សាល​ដីកា​យ៉ាង​ណា​ក្តី។

ក្រោយ ពី​ជំនួប​ប្រជុំ​នេះ លោក ហោ ណាំហុង រដ្ឋមន្ត្រី​ក្រសួង​ការ​បរទេស​កម្ពុជា នឹង​ធ្វើ​សន្និសីទ​កាសែត​រួម​គ្នា​មួយ ដើម្បី​បញ្ជាក់​ជូន​ដល់​សាធារណៈ​មតិ ស្តីពីកិច្ច​ប្រជុំ​ខាង​លើ​។ នេះបើយោងតាមការឲ្យដឹងពី មន្ត្រី​នៃ​អង្គការ​ការពារ​សិទ្ធិ​មនុស្ស អាដហុក។

សូមរង់ចាំអានព័ត៌មានពិស្តារក្នុងកាសែតភ្នំពេញប៉ុស្តិ៍

អត្ថបទគួរចាប់អារម្មណ៍