The Phnom Penh Post Search

Search form

Logo of Phnom Penh Post newspaper Phnom Penh Post - ពលរដ្ឋ​បី​សហគមន៍​តវ៉ា​ឲ្យ​ពន្លឿន​ការ​ដោះ​ស្រាយ​ដីធ្លី​ជូន​ពួក​គាត់​មុន​ថ្ងៃ​បោះ​ឆ្នោត

ពលរដ្ឋ​បី​សហគមន៍​តវ៉ា​ឲ្យ​ពន្លឿន​ការ​ដោះ​ស្រាយ​ដីធ្លី​ជូន​ពួក​គាត់​មុន​ថ្ងៃ​បោះ​ឆ្នោត

ពលរដ្ឋ​បី​សហគមន៍​តវ៉ា​ឲ្យ​ពន្លឿន​ការ​ដោះ​ស្រាយ​ដីធ្លី​ជូន​ពួក​គាត់​មុន​ថ្ងៃ​បោះ​ឆ្នោត

IMG_9026
ពលរដ្ឋសហគមន៍បុរីកីឡា បឹងកក់ និងថ្មគោល តវ៉ាមុខសាលារាជធានីភ្នំពេញ ទាមទារការដោះស្រាយដីធ្លីជូនពួកគាត់ឲ្យបានលឿន ហុង មិនា

ភ្នំពេញៈ ប្រជាសហគមន៍​ក្រីក្រ​ នៃ​តំបន់​បុរី​កីឡា បឹងកក់​ និង​ថ្មគោល ប្រមាណ​ជាង​ ២០០ ​នាក់ បាន​នាំគ្នា​ប្រមូល​​ផ្ដុំ​ការ​តវ៉ា​នៅ​មុខ​សាលា​រាជធានី​ភ្នំពេញ​នៅ​ព្រឹក​ថ្ងៃ​ចន្ទ​នេះ ដោយ​ជំរុញ​ឲ្យ​អាជ្ញាធរ​ដោះ​ស្រាយ​បញ្ហា​របស់​ពួក​គាត់​ឲ្យ​បាន​ឆាប់​មុន​ថ្ងៃ​បោះ​ឆ្នោត។

ក្រុម​អ្នក​ភូមិ​ដែល​មក​តវ៉ា​ទាម​ទារ​ដំណោះ​ស្រាយ ទាំង​នេះ បាន​នាំគ្នា​ស្លៀក​ពាក់​ឯកសណ្ឋាន ជា​ស្ត្រី​មេផ្ទះ ដែល​ខ្លះ​មាន​កាន់​ឆ្នាំង ខ្ទះ វែង និង​ខ្លះ​ទូល​រូប​ផ្ទះ និង​ខ្លះ​ស្លៀក​ពាក់​ជាចុង​ភៅ ដោយ​មាន​សរសេរ​សារ​ថា «​យើង​ខ្ញុំ​ស្រេក​ឃ្លាន​ដំណោះ​ស្រាយ​ខ្លាំង​ណាស់​...»។

លោក​ ចាន់​ ពុទ្ធិសាក់ តំណាង​ប្រជាពលរដ្ឋ​រង​គ្រោះ​ក្នុង​សហគមន៍​បឹងកក់ ដែល​នៅ​មិន​ទាន់​ទទួល​បាន​ ដំណោះ​ស្រាយ​បាន​ប្រាប់​ភ្នំពេញ​ប៉ុស្តិ៍​ នៅ​ព្រឹក​ថ្ងៃ​ចន្ទ​នេះ​ថា​ អាជ្ញាធរ​រាជធានី​ភ្នំពេញ​ មិន​មាន​ការ​ពន្លឿន​ចំណាត់​ការ​ដោះ​ស្រាយ​បញ្ហា​ជូន​ពួក​គាត់​ទេ​ ក្នុង​រយៈ​ពេល​ជិត​ពីរ​សប្ដាហ៍ ចាប់​តាំង​ពី​បាន​ឯកភាព​ជាមួយ​ពួក​គាត់​ក្នុង​ការ​ចាត់​តំណាង​តាម​ភូមិ​ឲ្យ​ចូល​រួម​សហការ​ជាមួយ​ក្រុម​ការងារ​បច្ចេកទេស​របស់​ខ្លួន ​ចុះ​ដោះ​ស្រាយ​ផ្លាស់​ប្ដូរ​ទីតាំង​ដី​និង​ផ្ទះ​របស់​ពួកគាត់​ចូល​ទៅ​ក្នុង​ដី​ ១២,៤៤​ហិកតា ដែល​ជា​ផ្ដល់​ប្រទានកម្ម​ពី​ប្រមុខ​រាជ​រដ្ឋាភិបាល ជា​ថ្នូរ​នឹង​ការ​មិន​ចេញ​ដើរ​តវ៉ា​ជាមួយ​ក្រុម​អ្នកស្រី​ទេព​វន្នី​នោះ។

លោក បាន​ថ្លែង​ថា៖«យើង​បាន​រង់​ចាំ​ជិត​ពីរ​សប្ដាហ៍​មក​ហើយ តែ​មិន​ឃើញ​មាន​វឌ្ឍនភាព​អ្វី​បន្ដិច​សោះ ចំពោះ​យន្តការ​ដោះ​ស្រាយ​បញ្ហា​របស់​យើង​ខ្ញុំ។ យើង​ចង់​បាន​ដំណោះ​ស្រាយ​ឆាប់​បំផុត គឺ​មុនថ្ងៃ​បោះ​ឆ្នោត ព្រោះ​ បច្ចុប្បន្ន គ្មាន​អ្វី​ជាឩបស័គ្គ​ទៀត​ទេ»។

លោក​បាន​ប្រាប់​ឲ្យ​ដឹង​ទៀត​ថា​លោក ​ប៉ា សុជាតិ​វង្ស អភិបាល​រាជធានី​ភ្នំពេញ ធ្លាប់បាន​អះអាង​ប្រាប់​ពួកគាត់​ថា​ភាគី​ក្រុម​ហ៊ុន​ស៊ូកាគូ​អ៊ីន បាន​ឯកភាព​និង​ទទួល​យក​នូវ​ដំណោះ​ស្រាយ​ ​ដោះ​ដូរ​ទីតាំង​ដី​របស់​ពួក​គាត់​ ដែល​ស្ថិត​ក្រៅ​និយាម​កាម ចូល​ទៅ​ក្នុង​ទី​តាំង​ដី​ ១២,៤៤​ហិកតា​ហើយ ខណៈ​ក្រុម​មន្ត្រី​ជំនាញ​បាន​ចុះ​ស្រង់​បញ្ជី​សាលាក​ប័ត្រ​ពួក​គាត់​បាន​រួច​រាល់ ​ហើយ​ដែរ។

អ្នកស្រី​ទេព វន្នី តំណាង​ប្រជា​ពលរដ្ឋ​ក្នុង​សហគមន៍​បឹងកក់ បាន​និយាយ​ថា ការ​រួញរា​ក្នុង​ការ​ផ្ដល់​ដំណោះ​ស្រាយ​ជូន​ប្រជា​ពលរដ្ឋ​រង​គ្រោះ គឺ​បង្ហាញ​ឲ្យ​ឃើញ​ពី​ការ​មិន​យក​ចិត្ត​ទុក​ដាក់​ចំពោះ​បញ្ហា​សុខ​ទុក្ខ​របស់​ប្រជាពលរដ្ឋ ដែល​ផ្ទុយ​អំពី​ឆន្ទៈ​និង​គោល​នយោបាយ​របស់​រាជរដ្ឋាភិបាល​កម្ពុជា។

អ្នកស្រី​ថ្លែងថា៖«អាជ្ញាធរ​ចាំបាច់​ត្រូវ​ដោះ​ស្រាយ​បញ្ហា​ប្រឈម​របស់​ប្រជាពលរដ្ឋ​ឲ្យ​បាន​ឆាប់​បំផុត និង​ប្រកដ​ដោយ​គតិ​ច្បាប់។ ប៉ុន្តែ​អ្វី​ដែល​យើង​កំពុង​មើល​ឃើញ​នៅ​ពេល​នេះ គឺ​អាជ្ញាធរ​រិះរក​គ្រប់​វិធី​ដើម្បី​បំបែក​កម្លាំង​សាមគ្គី​ភាព​របស់​ប្រជា​ពលរដ្ឋ​ក្នុង​ការ​ទាមទារ​សិទ្ធិ​សេរីភាព សិទ្ធិ​ដីធ្លី ផ្ទះ​សំបែង និង​សិទ្ធិ​មួយ​ចំនួន​ទៀត​ដែល​បាន​ចែក​ក្នុង​ច្បាប់​រដ្ឋធម្មនុញ្ញ​ជាតិ និង​ អន្តរជាតិ»។

អត្ថបទគួរចាប់អារម្មណ៍