ភ្នំពេញៈ កាសែត​ខ្មែរ​នៅ​ថ្ងៃ​ពុធ​នេះ មាន​មួយចំនួន ចាប់អារម្មណ៍​រឿង​បញ្ហា​សហជីព និង​មួយចំនួនទៀត​ចាប់អារម្មណ៍​រឿង​វេទិកា​រាជរដ្ឋាភិបាល​កម្ពុជា និង​ផ្នែក​ឯកជន។ កាសែត​កោះសន្តិភាព និង​នគរធំ ចាប់អារម្មណ៍​រឿង សាលា​រាជធានី​ភ្នំពេញ មិន​អនុញ្ញាត​ឲ្យ​សហជីព និង​សហគមន៍​ចំនួន ១៨ ធ្វើបាតុកម្ម​នៅ​ថ្ងៃ ៨ មីនា ដោយ​យក​ទីលាន​ប្រជាធិបតេយ្យ ធ្វើ​វេទិកាសាធារណៈ។ កាសែត​ទាំងពីរ បាន​រាយការណ៍​ថា តាមរយៈ​ការជួបប្រជុំ​ជាមួយ​សាលា​រាជធានី​ភ្នំពេញ ម្សិលមិញ ក្រុម​សហជីព​ចំនួន ១៨ បាន​បរាជ័យ​ក្នុងការ​សុំច្បាប់​រៀបចំ​វេទិកាសាធារណៈ នៅ​ទីលាន​ប្រជាធិបតេយ្យ​នា​ថ្ងៃទី ០៨ មីនា ចុះ​ថ្ងៃ​ទិវា​សិទ្ធិនារី​អន្តរជាតិ ព្រោះ​សាលា​រាជធានី​ភ្នំពេញ មិន​អនុញ្ញាត​ទេ ដោយ​ទុក​ឲ្យ​ក្រសួងមហាផ្ទៃ​ជា​អ្នកសម្រេច។ តែ​ទោះជា​យ៉ាងណា ខាង​ក្រុម​សហជីព​ក៏​នៅតែ​បន្តធ្វើ​ដែរ។