The Phnom Penh Post Search

Search form

Logo of Phnom Penh Post newspaper Phnom Penh Post - រដ្ឋសភា​​​អនុម័ត​សេចក្តី​ព្រាង​ច្បាប់​សង់​ទំនប់​សេសាន​ក្រោម​២ ទោះ​បក្ស​ប្រឆាំង​ ​សង្គម​ស៊ីវិល​​​សុំ​ពន្យា

រដ្ឋសភា​​​អនុម័ត​សេចក្តី​ព្រាង​ច្បាប់​សង់​ទំនប់​សេសាន​ក្រោម​២ ទោះ​បក្ស​ប្រឆាំង​ ​សង្គម​ស៊ីវិល​​​សុំ​ពន្យា

រដ្ឋសភា​​​អនុម័ត​សេចក្តី​ព្រាង​ច្បាប់​សង់​ទំនប់​សេសាន​ក្រោម​២ ទោះ​បក្ស​ប្រឆាំង​ ​សង្គម​ស៊ីវិល​​​សុំ​ពន្យា

120831_04
ប្រជាពលរដ្ឋ ធ្វើដំណើរតាមទូកនៅលើទន្លេសេសានក្នុងខេត្តស្តឹងត្រែង ភ្នំំពេញ ប៉ុស្តិ៍

ភ្នំពេញ៖ ក្រោយ​ពី​បាន​ពិភាក្សា​ដេញ​ដោល​នៅ​ក្នុង​កិច្ច​ប្រជុំ​ពេញ​អង្គ​អស់​រយៈពេល​ជា​ច្រើន​ម៉ោង​រួច​មក រដ្ឋសភា​ជាតិ​នៃ​កម្ពុជា នៅ​ព្រឹក​ថ្ងៃទី​១៥ កុម្ភៈ ឆ្នាំ​២០១៣ បាន​អនុម័ត​យល់​ព្រម លើ​សេចក្ដី​ព្រាង​ច្បាប់​ ស្ដី​ពី​ការ​ធានា​ទូទាត់​របស់​រាជ​រដ្ឋាភិបាល​នៃ​ប្រទេស​នេះ ឲ្យ​ក្រុមហ៊ុន​វៀត​ណាម​មួយ ឈ្មោះ​ថា ហាយ​ដ្រូ ផៅវ័រ សេ​សាន​ក្រោម​២​(HYDRO POWER LOWER SESAN2) ក្នុង​សម្លេង​គាំទ្រ​លើស​លប់ គឺ​៨២​លើ​៩០​សម្លេង បើ​ទោះ​បី​ជា​សមាជិក​សភា​មក​ពី​គណបក្ស ប្រឆាំង​ទាំងអស់ ស្នើ​ឲ្យ​ពន្យា​ពេល​យ៉ាង​ណា​ក្តី។

កាល​ពី​ពេលថ្មីៗ​កន្លង​មក​នេះ រដ្ឋាភិបាល​បាន​ចាត់​ទុក​គម្រោង​សាង​សង់​ទំនប់​វារី​អគ្គីសនី សេសាន​ក្រោម​២ ថា​ជា​គម្រោង​មួយ​ដែល​អាច​ទទួល​បាន​ប្រភព​ថាមពល​អគ្គីសនី​ដ៏ធំ ដែល​កម្ពុជា​មិន​ធ្លាប់​មាន ហើយ​វា​ជា​ផ្នែក​មួយ​ក្នុង​ការ​ចូល​រួម​ចំណែក​ធានា​បាន​នូវ​ចីរភាព សេដ្ឋកិច្ច​ជាតិ យ៉ាង​ធំធេង។

នៅ​ក្នុង​អង្គប្រជុំ សួរ​ដេញ​ដោល លោក ជាម យៀប ប្រធាន​គណៈកម្មការ​សេដ្ឋកិច្ច ហិរញ្ញវត្ថុ ធនាគារ និង​សវនកម្ម​នៃ រដ្ឋសភា​ជាតិ បាន​ថ្លែង​ថា ទំនប់​វារី​អគ្គិសនី​សេសាន​២ ស្ថិត​នៅ​ក្នុង​ខេត្ត​ស្ទឹង​ត្រែង អាច​នឹង​ផលិត​អគ្គិសនី បាន​៤០០​មេហ្កា​វ៉ាត់ ជា​ទំហំ​ដែល​ផលិត បាន​ច្រើន​ជាង​គេ​បើ​ប្រៀប​ធៀប​នឹង​ទំនប់ ផ្សេងៗ​ ក្នុង​ប្រទេស​កម្ពុជា ក្នុង​នោះ​រាជ​រដ្ឋាភិបាល បាន​សម្បទាន​ដី សេដ្ឋកិច្ច​ចំនួន​៤៥​ឆ្នាំ ឲ្យ​ក្រុមហ៊ុន​វិនិយោគ សាង​សង់​រយៈ​ពេល​៥ឆ្នាំ និង​ធ្វើ​អាជីវកម្ម ៤០​ឆ្នាំ ដោយ​ចំណាយ​ដើម​ទុន ៧៨១​លាន​ដុល្លារ សហរដ្ឋ​អាមេរិក។​

លោក​ថា “ទំនប់​នេះ​នឹង​កាត់​បន្ថយ​តម្លៃ​អគ្គិសនី​ឲ្យ​មាន​តម្លៃ​ថោក ធ្វើ​ឲ្យ​ប្រទេស​មាន ភាព​ម្ចាស់​ការ​ក្នុង ការ​ផលិត​ជំរុញ សេដ្ឋកិច្ច​ជាតិ បង្កើត​ឱកាស​ការងារ ដល់​ប្រជា​ពលរដ្ឋ ផ្លាស់​ប្តូរ​ជីវភាព​ប្រជា​ពលរដ្ឋ ក្នុង​តំបន់​នោះ ផ្តល់​បច្ចេក​វិទ្យា​ថ្មី ដល់​ធនធាន​កម្ពុជា បង្កើត​រមណី​ដ្ឋាន ទេសចរណ៍​ជាដើម”។

ទោះ​ជា​បែប​ណា​ក្ដី នៅ​ក្នុង​ឱកាស​នោះ លោក សុន ឆ័យ តំណាង​គណបក្ស​សម រង្ស៊ី ដែល​បារម្ភ​អំពី​ផល​ប៉ះពាល់​ទៅ​ដល់​ជីវចម្រុះ​នៅ​តាម​ដង​ទន្លេ និង​តំបន់​ផ្សេង​ទៀត​ដែល​ស្ថិត​ជាប់​នឹង​គម្រោង​នេះ ពិសេស​អំពី​ការ​បំលាស់​ទី​របស់​ប្រជាពលរដ្ឋ​ ចេញ​ពី​តំបន់​ដែល​ត្រូវ​អនុវត្ត​គម្រោង​នោះ បាន​ស្នើ​ឲ្យ​មាន​ការ​ពន្យា​ពេល​ក្នុង​ការ​អនុម័ត​លើ​សេចក្តី​ព្រាង​មួយ​នេះ​ដោយ សំអាង​លើ​ហេតុផល ថា​រដ្ឋាភិបាល​មិន​ទាន់ ធ្វើ​ការ​ពិភាក្សា​ល្អិត​ល្អន់ ពី​ផល​ប៉ះ​ពាល់​នៃ​គម្រោង​នេះ​នៅ​ឡើយ​ទេ។

លោកថ្លែង​ថា “យើង​ឃើញ​ថា រដ្ឋាភិបាល​មិន​បាន​សិក្សា​ល្អិត​ល្អន់​អំពី​ទំហំ​នៃ​ផល​ប៉ះពាល់​នៅ​ឡើយ​ទេ »។

លោក​បាន​បន្ត​ថា៖«តាម​ការ​សិក្សា​ថ្មី​មួយ​បាន​បង្ហាញ​ថា ចំនួន​គ្រួសារ​បាន​ថយ​ចុះ​ពី​ជាង​១០០០​គ្រួសារ មក​នៅ​ត្រឹម​ជាង​៧០០​គ្រួសារ​ទៅ​វិញ។ ហើយ​មួយ​វិញ​ទៀត ទំនប់​ឃើញ​មាន​ច្រើន តែ តម្លៃ​អគ្គិសនី​នៅ​តែ​ថ្លៃ បើ​ប្រៀប​ធៀប​នឹង ប្រទេស​ជិត​ខាង រីឯ​ព្រៃឈើ កាប់​រាប់​ហិក​តា”។

ពាក់ព័ន្ធ​ទៅ​នឹង​បញ្ហា​នេះ លោក ស៊ុយ សែម រដ្ឋ​មន្រ្តី​ក្រសួង​ឧស្សាហកម្ម រ៉ែ និង​ថាមពល​បាន​ថ្លែង ការពារ​ក្នុង​អង្គ​ប្រជុំ​ថា មិន​មែន​រដ្ឋាភិបាល​ចង់​ធ្វើ ធ្វើ​ភ្លាម​នោះ​ទេ គឺ​រដ្ឋាភិបាល​ចំណាយ ពេល​សិក្សា​ផល​ប៉ះពាល់ តាំង​ពី​ឆ្នាំ​២០០៧​មក​ម្ល៉េះ ។ រីឯ​គ្រួសារ ផល​ប៉ះពាល់​ថយ​ចុះ ក្នុង​ការ​សិក្សា​ថ្មី ព្រោះ​ចំនួន​ឃុំ​ក៏​ថយ​ដែរ ។ លោក​បាន​បន្ត​ថា កាល​សិក្សា​ដំបូង​មាន​គ្រួសារ​ផល​ប៉ះពាល់​ជាង​មួយ​ពាន់​គ្រួសារ មក​ពី​រាប់​ឃុំ​ប៉ះពាល់ ទាំង​អស់​ចំនួន​៤ ក្នុង​ស្រុក​សេសាន ខេត្ត​ស្ទឹង​ត្រែង តែ​ធាតុ​ពិត​មាន​តែ​បីឃុំ​ទេ។

លោក​ថ្លែង​ថា “ខាង​ប្រឆាំង​មិន​បាន​មើល​ឯកសារ​វាយ​តម្លៃ​ផល​ប៉ះពាល់​ដែល រដ្ឋាភិបាល​ដាក់​ឲ្យ​ផង អាង​ជំទាស់​ហើយ បាន​តែ​គិត​មិន​ធ្វើ រដ្ឋាភិបាល​យក​ចិត្ត​ទុក​ដាក់​ខ្លាំង​ណាស់​ក្នុង​ការ​សង​នូវ​សំណង​ផល​ប៉ះ​ពាល់ ប្រជាពលរដ្ឋ យ៉ាង​លម្អិត”។

 ទោះ​ជា​បែប​ណា​ក្ដី​ទំនប់​សេសាន​ក្រោម​២ ស្ថិត​នៅ​ខេត្ត​ស្ទឹងត្រែង បាន​ប៉ះពាល់​ឃុំ​ចំនួន​៣ ក្នុង​នោះ មាន​ឃុំ​ក្បាល​រមាស ដែល​មាន​៣ ភូមិ គឺ​ភូមិ​ក្បាល​រមាស ភូមិ​ស្រែ​ស្រណុក និង​ភូមិ​ច្រប់, ឃុំស្រែគរ ចំនួន​២​ភូមិ គឺ​ភូមិ​ស្រែ​គរ១ និង​ភូមិ​ស្រែ​គរ២ និង ឃុំភ្លុក ចំនួន​មួយ​ភូមិ គឺ​ភូមិ​ភ្លុក ។

 ប្រជាពលរដ្ឋ​រង​ផល​ប៉ះពាល់​មាន​ចំនួន ៥១៥​គ្រួសារ​នៅ​ឆ្នាំ​២០១០ ដែល​នឹង​អាច​កើន​ឡើង​ ដល់​ចំនួន​៧៩៧ គ្រួសារ នៅ​ឆ្នាំ​២០១៤ ក្នុង​នោះ​ក្រុមហ៊ុន​ចំណាយ​ថវិកា ៣៨,៧១​លាន​ដុល្លារ សម្រាប់​ដោះស្រាយ​ប៉ះ​ប៉ូវ តាម​គោល នយោ​បាយ សាង​សង់​លំនៅ​ថ្មី និង​ហេដ្ឋា​រចនា​សម្ព័ន្ធ ចំបាច់​នានា នៅ​តំបន់​តាំង​ ទីលំ​នៅ​ថ្មី ។

 លោក​ឡូយ សុផាត អភិបាលខេត្ត​ស្ទឹងត្រែង កាលពី​ព្រឹក​ថ្ងៃ​១៥ ខែកុម្ភៈ ឆ្នាំ​២០១៣ បាន​មាន​សាសន៍​ថា ក្រុមការងារ​ដែល​ត្រូវបង្កើត ចុះទៅ​កាន់​ទីតាំង​តំបន់​រុះរើ​ភូមិ នឹងត្រូវ​ចាប់​ផ្តើម​ក្នុង​ពេលនេះ​តែម្តង​។ ការងារ​នេះ មន្ត្រី​ត្រូវមាន​ជំនាញ​ខាង​ផ្នែក​បច្ចេកទេស​ភូមិសាស្ត្រ កង​កម្លាំង​ប្រដាប់​អាវុធ​ការពារ​សន្តិសុខ និង​ត្រូវមាន​មន្ត្រី​សុខាភិបាល​ទៅជា​មួយ​ផង​។​

ដោយឡែក​លោក​សៀ ហេង ប្រធាន​មន្ទីរ​អភិវឌ្ឍន៍​ជនបទ​ខេត្ត​ស្ទឹងត្រែង បាន​និយាយ​ថា រហូតមក​ទល់​នឹង​ពេល​នេះ មិន​ទាន់​បាន​បូកសរុប​ចំនួន​ប្រជាពលរដ្ឋ រង​ផលប៉ះពាល់​ពិតប្រាកដ​នៅឡើយ​ទេ​។ ចំណែក​ទីតាំង​ដី​សម្រាប់​សង់​លំនៅស្ថាន ក៏​មិនទាន់​រកឃើញ​ដែរ ដោយសារ​មាន​កន្លែង​ខ្លះ ប៉ះពាល់​ដី​ក្រុមហ៊ុន​សម្បទាន​សេដ្ឋកិច្ច។​

 រីឯ​លោក សិទ្ធិ សំណាង នាយផ្នែក​រដ្ឋបាល​ព្រៃឈើ​ស្ទឹងត្រែង ក៏បាន​បញ្ជាក់ថា ដី​ក្រុមហ៊ុន Research Mining Development គឺ​ប៉ះពាល់​ច្រើន​។ ទីតាំង​ដីស​ង់​លំនៅស្ថាន​ថ្មី ត្រើយម្ខាង​ទន្លេសេសាន​នោះ ត្រូវតែមាន​ការចុះទៅ​សិក្សា​ឱ្យបាន​ច្បាស់លាស់​សិន មុន​ប្តូរ​ភូមិ​រស់នៅ​។ បើ​មិន​ដូច្នោះ​ទេ ការចុះ​ស្រង់​ស្ថិតិ​ប្តូរ​ភូមិ​មិន​ទទួលបាន​ជោគជ័យ​ឡើយ។

កាលពីម្សិលមិញ ក្រុម​អង្គការ​សង្គម​ស៊ីវិល បាន​បង្ហាញ​ការ​មន្ទិល​សង្ស័យ និង​ទុក្ខ​កង្វល់​យ៉ាងខ្លាំង លើ​សេចក្តី​ព្រាង​ច្បាប់​ស្តីពី ការ​អនុម័ត​យល់ព្រម​លើ​ការធានា​ទូទាត់​របស់​រាជរដ្ឋាភិបាល នៃ​ព្រះរាជាណាចក្រ​កម្ពុជា ឲ្យ​ក្រុមហ៊ុនហា​ដ្រូ ផៅ​វ័​រឡូ​វើ​រ សេ​សាន្ត​២ ដែល​រដ្ឋសភា នឹង​ប្រជុំ​អនុម័ត នៅ​ថ្ងៃ​ទី​១៥​កុម្ភៈ ឆ្នាំ​២០១៣ ថា​នឹង​មាន​ផល​ប៉ះ​ពាល់​ខ្លាំង ដោយ​មិន​បាន​ពិគ្រោះ​យោបល់​ឲ្យបាន​ទូលំទូលាយ​ជា​សាធារណៈ។​

សេចក្តីថ្លែងការណ៍​របស់​សង្គម​ស៊ីវិល ដែល​បាន​ផ្សព្វផ្សាយ​នៅ​ក្នុង​សន្និសីទកាសែត នា​ព្រឹក​ថ្ងៃទី​១៤កុម្ភៈ ឆ្នាំ​២០១៣ បង្ហាញថា "​យើងខ្ញុំ​ទាំងអស់គ្នា ក៏​មាន​កង្វល់ ទៅលើ​ភាពខុសគ្នា​រវាង​តួលេខ នៃ​ចំនួន​ភូមិ និង​គ្រួសារ​ប្រជាពលរដ្ឋ ដែល​រស់នៅ​តាម​ដង​ទន្លេ​សេ​សាន្ត និង​ស្រែ​ពក ដែល​នឹងរង​ផលប៉ះពាល់ ដោយ​ផ្ទាល់​ពី​គម្រោង​ទំនប់​វា​រី​អគ្គិសនី​សេ​សាន​ក្រោម​២"​។

ក្រៅពី​បារម្ភ​ចំពោះ​គម្រោង​សាងសង់​ទំនប់​វា​រី​អគ្គិសនី សេ​សាន្ត​ក្រោម​២ ក្នុង​ខេត្ត​ស្ទឹងត្រែង ក្រុម​អង្គការ​សង្គម​ស៊ីវិល ដែល​រួមមាន​អង្គការ​សមាជិក​សម្ព័ន្ធ​ទន្លេ​កម្ពុជា វេទិកា​អង្គការ​មិនមែន​រដ្ឋាភិបាល ស្តីពី​កម្ពុជា និង​បណ្តាញ​សិទ្ធិ​ដីធ្លី និង​លំនៅឋាន ក៏​បាន​ស្នើសុំ​ឲ្យ​រដ្ឋសភា ពន្យារ​ពេល​អនុម័ត​សេចក្តីព្រាងច្បាប់នេះដែល​ត្រូវបាន​ដាក់បញ្ចូល​ក្នុង​ របៀបវារៈ​សម័យ​ប្រជុំ​លើក​ទី​៩ នីតិកាល​ទី​៤ របស់​រដ្ឋសភា នៅ​ថ្ងៃ​ទី​១៥ ខែ​កុម្ភៈ ឆ្នាំ​២០១៣​។

អត្ថបទគួរចាប់អារម្មណ៍