ភ្នំពេញៈ បើទោះបីជាអាចនឹងមានអំពើហិង្សារវាងសហជីព និងអាជ្ញាធរក៏ដោយ ក៏មេដឹកនាំសហជីព កាលពីថ្ងៃពុធបានថ្លែងថា ពួកគេនឹងនៅតែបន្តរៀបចំធ្វើវេទិកាសាធារណៈនៅទីលានប្រជាធិបតេយ្យនៅព្រឹកថ្ងៃសៅរ៍ស្អែកនេះ។
លោក ប៉ាវ ស៊ីណា ប្រធានសម្ព័ន្ធ សហជីពចលនាកម្មករ បានថ្លែងថា៖ «ខ្ញុំគិតថា យើងមិនអាចចៀសពីការមានការប៉ះទង្គិចគ្នានៅថ្ងៃសៅរ៍បានទេ ដោយសារតែអាជ្ញាធរនឹងមិនអនុញ្ញាតឲ្យយើងធ្វើវេទិការបស់យើង»។ «ប៉ុន្តែអ្វីដែលយើងនឹងធ្វើគឺមិនខុសទេ»។
កាលពីថ្ងៃអង្គារ សាលារាជធានីបានបដិសេធសំណើរបស់សហព័ន្ធសហជីពចំនួន ១៨ ដែលសុំប្រារព្ធធ្វើវេទិកាសាធារណៈ នៅទីលានប្រជាធិបតេយ្យនៅថ្ងៃសៅរ៍ដែលជាថ្ងៃទិវានារីអន្តរជាតិ ហើយក្នុងអំឡុងពេលនោះ ក្រុមសហជីពទាំងនេះ គ្រោងធ្វើការពិភាក្សាបញ្ហាក្នុងឧស្សាហកម្មកាត់ដេររួមទាំងការទាមទារប្រាក់ឈ្នួលអប្បបរមាចំនួនប្រមាណ ១៦០ ដុល្លារ និងការដោះលែងមនុស្ស ២១នាក់ ដែលត្រូវបានឃុំខ្លួនចាប់តាំងពីការចាប់ខ្លួននៅក្នុងបាតុកម្មគាំទ្រកូដកម្មទូទាំងប្រទេសក្នុងវិស័យកាត់ដេរ។
លោក ឡុង ឌីម៉ង់ អ្នកនាំពាក្យសាលារាជធានី កាលពីថ្ងៃអង្គារបានប្រកាសមិនឲ្យមានការចូលទៅទីលានប្រជាធិបតេយ្យទេ ដោយថ្លែងថា ចំនួនមនុស្ស ៣០ ០០០ នាក់ដែលក្រុមសហជីពរំពឹងថា នឹងចូលរួមអាចបង្កហានិភ័យដល់សន្តិសុខ។
លោក ស៊ុន លីហូវ មន្រ្តីនៅសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ហៅកាត់ ស៊ីខៅឌូ បានថ្លែងថា៖ «យើងបារម្ភថា នគរបាល ឬទាហាននឹងបិទផ្លូវ ហើយបង្កហិង្សាដល់សមាជិករបស់យើង»។
លោក ខេង ទីតូ អ្នកនាំពាក្យកងរាជអាវុធហត្ថមិនបានឆ្លើយតបទូរស័ព្ទ ឬសារទូរស័ព្ទទេ កាលពីថ្ងៃពុធ។
វេទិកានេះគឺជាជំហានទីពីរដែលនឹងនាំឲ្យមានការធ្វើកូដកម្មនៅផ្ទះមិនមកធ្វើការនៅក្នុងឧស្សាហកម្មកាត់ដេរ ដែលគ្រោងចាប់ផ្តើមឡើងនៅថ្ងៃពុធ និងបន្តយ៉ាងហោចណាស់រហូតដល់ថ្ងៃ ១៩ មីនា។ កាលពីសប្តាហ៍មុនកម្មករកាត់ដេរមួយចំនួនបានចូលរួមកូដកម្មមិនធ្វើការងារថែមម៉ោង។
បើតាមមន្រ្តីសហជីព ស៊ីខៅឌូ បានឲ្យដឹងថា មន្រ្តីរដ្ឋាភិបាលរួមទាំងរដ្ឋមន្រ្តីក្រសួង ការងារ លោក អ៊ិត សំហេង និងឧបនាយករដ្ឋមន្រ្តី លោក គាត ឈន់ បានទទួលការអញ្ជើញឲ្យចូលរួមវេទិកានេះ ប៉ុន្តែមិនឆ្លើយតបនឹងការអញ្ជើញនេះ។
ការបិទផ្លូវនិងការបង្ក្រាបទៅលើវេទិកាដែលនឹងធ្វើឡើងនៅវេលាម៉ោង ៨ ព្រឹក ថ្ងៃសៅរ៍ស្អែកនេះអាចនឹងកើតមានដោយសារវាធ្លាប់កើតមានរួចហើយ ដូចជាករណីបង្ក្រាបទៅលើបាតុកម្មថ្ងៃ ទី២ និង ៣ មករា ដែលបានបណ្តាលឲ្យមនុស្សយ៉ាងហោចណាស់ ៤នាក់ ស្លាប់ដោយសារការបាញ់របស់ទាហានហើយរាប់សិបនាក់ទៀតរងរបួស។
មេដឹកនាំ សហជីពបានថ្លែងថា វេទិកានៅថ្ងៃសៅរ៍នេះ ក្រៅពីមានការចូលរួមពីកម្មករនៅក្នុងរាជធានីកម្មករពីតាមបណ្តាខេត្តផ្សេងៗក៏មកចូលរួមដែរ។
សហជីព ស៊ីខៅឌូ នឹងនាំយកកម្មករប្រហែល ៣០០០ នាក់ពីតាមបណ្តាខេត្តរួមមាន ខេត្ត កណ្តាល កំពង់ស្ពឺ តាកែវ កំពង់ចាម។ នេះបើតាមមន្រ្តីសហជីព ស៊ីខៅឌូ ដែលបានថ្លែង។
ចំណែកលោកស្រី យ៉ាង សោភ័ណ្ឌ ប្រធានសម្ព័ន្ធសហជីពកម្ពុជា បានថ្លែងថា សម្ព័ន្ធសហជីពកម្ពុជានឹងផ្តល់ការដឹកជញ្ជូនកម្មករប្រមាណ ១០០ នាក់ពីខេត្ត កំពង់ចាម និងស្វាយរៀង។
លោក Dave Welsh នាយកប្រចាំប្រទេសនៃមជ្ឈមណ្ឌលអាមេរិក ដើម្បីសាមគ្គីភាពការងារ (ACILS) បានថ្លែងកាលពីម្សិលមិញថា វេទិកានេះអាចផ្តល់ឱកាសដ៏ពិសេសមួយសម្រាប់ការសុន្ទនាពិភាក្សាជាចំហ ប៉ុន្តែការបង្ក្រាបណាមួយអាចនឹងធ្វើឲ្យប៉ះពាល់ដល់កេរ្តិ៍ឈ្មោះរបស់កម្ពុជា។
លោក Welsh បន្តថា៖ «ខ្ញុំនឹងសន្មតថា វានឹងមានក្តីបារម្ភជាច្រើនពីអន្តរជាតិ...ប្រសិនបើការប្រមូលផ្តុំដោយសន្តិវិធីនេះជួបជាមួយអំពើហិង្សាដែលយើងបានឃើញកើតមាននៅដើមខែ មករា»៕ PS
