The Phnom Penh Post Search

Search form

Logo of Phnom Penh Post newspaper Phnom Penh Post - សហជីព​មាន​ជំហរ​គាំទ្រ​រដ្ឋាភិបាល អំពាវ​នាវ​ឲ្យ​កម្មករ​បញ្ឈប់​ការ​តវ៉ា

សហជីព​មាន​ជំហរ​គាំទ្រ​រដ្ឋាភិបាល អំពាវ​នាវ​ឲ្យ​កម្មករ​បញ្ឈប់​ការ​តវ៉ា

សហជីព​មាន​ជំហរ​គាំទ្រ​រដ្ឋាភិបាល អំពាវ​នាវ​ឲ្យ​កម្មករ​បញ្ឈប់​ការ​តវ៉ា

_MG_0108
ក្រុមកម្មករបិទផ្លូវចេញចូល នៅក្រសួងការងារក្រោយកិច្ចប្រជុំដំឡើងប្រាក់ខែ ម៉ៃ វីរៈ

ភ្នំពេញៈ ស្រប​ពេល​ដែល​កម្មករ​ភាគ​ច្រើន​កំពុង​តែ​ជ្រួល​ច្របល់ និង​បាន​កំពុង​តែ​ធ្វើ​ការ​តវ៉ា​មិន​ពេញ​ចិត្ត​នឹង​ការ​តម្លើង​ប្រាក់​ឈ្នួល​របស់​ពួក​គេ​តាំង​ពី​ថ្ងៃ​អង្គារ រហូត​មក​ដល់​ថ្ងៃ​នេះ សហជីព​មួយ​ចំនួន​ដែល​មាន​និន្នា​ងាក​ទៅ​រក​ខាង​រដ្ឋា​ភិបាល​បាន​អំពាវ​នាវ​ឲ្យ​កម្មករ​បញ្ឈប់​នូវ​សកម្មភាព​នេះដើម្បី​ជៀស​វាង​នូវ​ការ​ខាត​បង់​ផល​ប្រយោជន៌​របស់​ពួក​គេ និង​ប្រទេស​ជាតិ។

លោក សោម អូន ប្រធានក្រុម​ប្រឹក្សា​សហជីព​ជាតិ​កម្ពុជា បាន​និយាយ​នៅ​​ថ្ងៃ​ពុធ​ទី ២៥​ខែ​ធ្នូ​នេះ​ថា បងប្អូន​កម្មករ​ភាគ​ច្រើន​មិន​ចង់​ធ្វើ​ការ​តវ៉ា​ដូច​នេះ​ទេ ប៉ុន្តែ​ដោយ​សារតែ​មាន​ក្រុម​អ្នក​នយោ​បាយ​​ និង​សហជីព​ដែល​មាន​និន្នា​ការ​នយោ​បាយ​មួយ​ចំនួន​តូច​នោះ​មាន​ការ​បំផុស​ឲ្យ​មាន​ការ​យល់​ច្រឡំ​ថា​ការ​តម្លើង​ប្រាក់​ឈ្នួល​នេះ​មាន​ចំនួន​តិច​តួច​ពេក​ ដោយ​គាត់​ចង់​តម្លើង​ឲ្យ​បាន​១៦០​ដុល្លារ​តែ​ម្តង។

លោក​បាន​ថ្លែង​បញ្ជាក់​ថា​៖ «ខ្ញុំ​យល់​ថា នៅ​លើ​ពិភព​លោក​នេះ​គ្មាន​ប្រទេស​ណា​មួយ​ដែល​អាច​ធ្វើ​ឲ្យ​ឡើង​បាន​ប្រាក់​ឈ្នួល​១០០​%​តែ​ម្តង​នោះ​ទេ​។ គោល​ដៅ​របស់​យើង​គឺ​ធ្វើ​ឲ្យ​បាន​១០០%​នោះ ក៏​ប៉ន្តែ​យើង​ធ្វើ​ជា​ជំហាន​របស់​យើង​។ នេះ​ជា​ការងារបច្ចេក​ទេស»។

លោក ​សោម អូន ​បាន​បន្តទៀត​ថា​ លោក​មាន​ការ​សោក​ស្តាយ​ចំពោះ​កម្មករ​ដែល​ធ្វើ​បែបនេះ ហើយ​លោក​មាន​ការ​ពេញ​ចិត្ត​ទៅ​នឹង​ការ​តម្លើង​នេះ។

លោក​និយាយ​ថា​៖ «ការ​តម្លើង​នេះ​សម​រម្យ ហើយ​យើង​អាច​រក្សា​បាន​នូវ​សន្តិ​សុខ​ការងារ​របស់​បងប្អូន​កម្មករ និង​រក្សា​បាន​នូវ​វិស័យ​វិនិយោគនៅ​ក្នុង​ប្រទេស​យើង​ផង​ដែរ។ ប៉ុន្តែ​ប្រសិន​បើ​សហជីព​មួយ​ចំនួន​តូច​យក​បញ្ហា​នយោបាយ​មក​ឡូក​ឡំ​ជាមួយ​នឹង​ករណី​របស់កម្មករ​នោះ គឺ​ជា​រឿង​មួយ​ដែល​ខ្ញុំ​មាន​ការ ព្រួយ​បារម្ភ និង​សោក​ស្តាយ​»។

លោកសោម​ អូន​បានស្នើ​សុំ​ឲ្យ​កម្មករ​ធ្វើ​ការ​ពិចារណា​ថា រាជ​រដ្ឋា​ភិបាល​ក៏​ដោយ សហជីព​ណា​ក៏​ដោយ​គ្មាន​អ្នក​ណា​មួយ​មិន​ចង់​ឲ្យ​កម្មករ​ទទួល​បាន​ប្រាក់​ខែ​ច្រើន​នោះ​ទេ​ តែ​ដោយ​សារ​លទ្ធភាព​របស់​ភាគី​និយោជក​មិន​អាច​ទៅ​រួច។

លោក​បាន​សង្កត់​ធ្ងន់​ថា៖ «អ្នកវិនិយោគ​ដែល​ចង់មក​វិនិយោគ​នឹង​លែង​មក​តទៅ​ទៀត​ ដោយសារតែ​សហជីព​យក​ស្ថាន​ភាព​នយោ​បាយ​មក​ប្រឡូក​ប្រឡាក់​នឹងរឿង​សេដ្ឋកិច្ច​ខ្លាំង​ពេក ហើយ​រោង​ចក្រ​ដែល​កំពុងតែ​ធ្វើ​ការ​វិនិយោគ​នេះ អាចនឹង​ងាកទៅ​រក​ប្រទេស​ផ្សេង​ ដែល​ជាហេតុ​នាំ​ឲ្យ​មាន​ការ​ប៉ះពាល់​ដល់​ជីវ​ភាព​របស់​កម្មករ និង​ប្រជា​ពលរដ្ឋ​របស់​យើងយ៉ាង​ធ្ងន់​ធ្ងរ»។

លោក ​សម រង្ស៊ី ប្រធាន​គណបក្ស​សង្រ្គោះ​ជាតិ​បាន​ថ្លែង​ទៅ​កាន់​កម្មករ​ នៅ​​ព្រឹក​ថ្ងៃ​ពុធ​នេះ​ នៅ​ឯ​ខេត្ត​ស្វាយ​រៀង​ ​ក្រុង​ បាវិត ​ថា កម្មករ​ជាច្រើន​នាក់​នៅក្នុង​ទីក្រុង​ភ្នំពេញ​នឹង​ប្រមែ​ប្រមូល​គ្នា​នៅ​ទីលាន​ប្រជា​ធិបតេយ្យ​នៅ​រសៀល​នេះ​។

លោក​បាន​ថ្លែង​ថា៖ «សូម​បង​ប្អូន​កម្មករ​តស៊ូ​ជាមួយ​គ្នា​ យើង​សុខ​ចិត្ត​ពិបាក​មួយ​រយៈ​ពេល​ខ្លី​ដើម្បី​ធូរធារ​បាន​មួយ​ជីវិត»។

ចំណែក​ឯកម្មករ​នៅ​ឯ​ខេត្ត​កំពង់​ចាម​បាន​នាំ​គ្នា​បិទផ្លូវ​មិន​ឲ្យ​មាន​ការ​ឆ្លង​កាត់​ស្ពាន​គីស៊ូណា​ផង​ដែរ ដើម្បី​ទាម​ទារ​ប្រាក់​ឈ្នួល​រហូត​ដល់​១៦០​ដុល្លារ​។

អត្ថបទគួរចាប់អារម្មណ៍