The Phnom Penh Post Search

Search form




Logo of Phnom Penh Post newspaper Phnom Penh Post - សាលា​ឧទ្ទរណ៍​សម្រេច​តម្កល់​សាល​ក្រម​លោក​ម៉ម សូណង់ដូ​ដដែល

សាលា​ឧទ្ទរណ៍​សម្រេច​តម្កល់​សាល​ក្រម​លោក​ម៉ម សូណង់ដូ​ដដែល

សាលា​ឧទ្ទរណ៍​សម្រេច​តម្កល់​សាល​ក្រម​លោក​ម៉ម សូណង់ដូ​ដដែល

121003_03
លោក ម៉ម សូណង់ដូ ខំប្រឹងស្រែក នៅពេលកម្លាំងនគរបាល ចាប់រុញបញ្ចូលទៅក្នុងឡាន ពេលចេញពីតុលាការពីថ្ងៃចន្ទ ហេង ជីវ័ន

ភ្នំពេញៈ តុលាការ​សាលា​ឧទ្ទរណ៍​នៅ​ព្រឹក​ថ្ងៃ​សុក្រ ទី​១៤ ធ្នូ​នេះ បាន​ច្រាន​ចោល​​សំណើរ​សុំនៅក្រៅ​ឃុំ​របស់​លោក​ម៉ម សូណង់ដូ ដោយ​សំអាង​ថា​ករណី​របស់​លោក​ម៉ម សូ​ណង់​ដូ​ធំនិង​ធ្ងន់ធ្ងរពេក។

អ្នកស្រី ឌិន ផាណារ៉ា ភរិយា​លោក​ម៉ម សូណង់ដូ នាយក​វិទ្យុ​សំបុក​ឃ្មុំ​បាន​សម្តែង​ការ​ខក​ចិត្ត​ចំពោះ​ការ​សម្រេច​របស់​សាលា​ឧទ្ទរណ៍​ដែល​ បានច្រាន​ចោល​សំណើរសុំនៅ​ក្រៅ​ឃុំរបស់​ប្ដី​គាត់ ។

អ្នកស្រី​បាន​ថ្លែង​ប្រាប់​ភ្នំពេញ​ប៉ុស្តិ៍​ថា៖ «នៅ​ថ្ងៃ​នេះ ខ្ញុំ​មាន​ការ​ខក​ចិត្ត​ចំពោះ​ការ​ច្រាន​ចោល​ការ​ស្នើ​សុំ​ឲ្យ​នៅ​ក្រៅ​ឃុំ តែ​ទោះ​ជា​បែប​ណា​ក្តី ខ្ញុំ​នៅ​តែ​មាន​ក្តី​សង្ឃឹម​នឹង​ជឿ​ជាក់​ចំពោះ​ប្រព័ន្ធ​ច្បាប់​នៅ​កម្ពុជា​ថា នឹង​ផ្តល់​យុត្តិធម៌​ឲ្យ​ប្តី​ខ្ញុំ ហើយ​ប្តីខ្ញុំ​នឹង​មាន​សេរីភាព​ឡើយ​វិញ នៅ​ពេល​អនាគត​ដ៏ខ្លី​ខាង​មុខ​នេះ»។

លោក​ស សូវាន មេធាវី​ការពារ​ក្តី​លោក​ម៉ម សូណង់​ដូ បាន​ប្រាប់​ភ្នំពេញ​ប៉ុស្តិ៍​ដែរ​ថា សវនាការ​នូវ​ថ្ងៃ​នេះ មិន​មែន​ជា​ការ​សើរើ​រឿង​ក្តី កូន​ក្តី​របស់​ខ្ញុំ​នោះ​ទេ សវនាការ​ដ៏​តូច​មួយ​នេះ​គឺ​ធ្វើ​ឡើង​សម្រាប់​ការ​ស្នើ​សុំ​ឲ្យ កូនក្តី​ខ្ញុំ​បាន​នៅ​ក្រៅ​ឃុំ​ជា​បណ្តោះ​អាសន្ន​ប៉ុណ្ណោះ។

លោក​បាន​ថ្លែង​ថា៖ «សវនាការ​នៅ​ថ្ងៃ​នេះ គឺ​ខ្ញុំ​សុំ​ឲ្យ​លោក​ម៉ម សូណង់ដូ​នៅ​ក្រៅ​ឃុំ ទម្រាំ​តុលាការ​សាលា​ឧទ្ទរណ៍​ធ្វើ​ការ​ជំនុំ​ជម្រះ ព្រោះកូនក្តីខ្ញុំហ្នឹង គាត់មានជម្ងឺ»។

លោក​បាន​បន្ថែម​ថា «ឥឡូវ​នេះ ខ្ញុំ​បាន​ធ្វើ​បណ្តឹង​សារ​ទុក ស្តីពី​ការ​សុំ​នៅ​ក្រៅ​ឃុំ​នេះ ទៅ​តុលាការ​កំពូល​ហើយ ហើយ​តុលាការ​កំពូល គេ​នឹង​ពិនិត្យ​សុំ​នៅ​ក្រៅ​ឃុំ​នេះ»។

នៅ​ជុំវិញ​បរិវេណ​សាលា​ឧទ្ទរណ៍ កាល​ពី​ព្រឹក​មិញ​នេះ ក្រុម​សមត្ថកិច្ច​ចម្រុះ​រាប់​រយ​នាក់ ដែល​មាន​ខែល ដំបង​ឆក់ និង​ឡាន​ពង្លត់​អគ្គិសនី បាន​ធ្វើ​ការ​រារាំង មិន​ឲ្យ​ក្រុម​អ្នក​គាំទ្រ​លោក​ម៉ម សូណង់ដូ​បាន​ចូល​មក​កៀក​សាលា​ឧទ្ទរណ៍​ដើម្បី​ស្តាប់​ការ​សម្រេច​សេចក្តី​របស់​តុលាការ​នេះ​ឡើយ។ តែ​ទោះ​ជា​បែប​ណា ពុំ​មាន​អំពើ​ហិង្សា​ណា​មួយ​កើត​ឡើង​នោះ​ទេ។

លោក ម៉ម សូណង់ដូ ត្រូវ​​បាន​អាជ្ញាធរ​ចាប់​ខ្លួន កាល​ពី​ថ្ងៃ​ទី ១៥ កក្កដា បន្ទាប់​ពី​លោក នាយក​រដ្ឋមន្ត្រី ហ៊ុន សែន ប្រកាស​ឲ្យ​ចាប់​ខ្លួន ដោយ​ចោទ​ថា លោក​ជាប់​ពាក់ព័ន្ធ​ទៅ​នឹង​ការ​នៅ​ពី​ក្រោយ​ខ្នង ក្រុម លោក ប៊ុន រដ្ឋា ដែល​អាជ្ញាធរ​អះអាង​ថា ប៉ុនប៉ង​បង្កើត​តំបន់​អបគមន៍ នៅ​ភូមិ​ប្រមា ឃុំ​កំពង់ដំរី ស្រុក​ឆ្លូង ខេត្ត​ក្រចេះ។

ហើយកាល​ពី​ថ្ងៃ​ចន្ទ ទី០១ ខែតុលាឆ្នាំ២០១២ សាលា​ដំបូង​រាជធានី​ភ្នំពេញ ក៏បាន​ប្រកាស​សាលក្រម​ផ្តន្ទាទោស​លោក​ម៉ម​សូណង់ដូ ដាក់​ពន្ធនាគារ ២០ ឆ្នាំ និង​ពិន័យ​ជា​ប្រាក់​ ១០ លាន​រៀល ពី​បទ​ផ្ដើម​គំនិត​ប្រឆាំង​អ្នក​រាជការ​សាធារណៈ ផ្តើម​ធ្វើ​កុបកម្ម​ជ្រៀត​ជ្រែក​ខុស​ច្បាប់ នៅ​ក្នុង​ការ​បំពេញ​មុខ​ងារ​​សាធារណៈ ញុះញង់​ឲ្យ​ប្រជាពលរដ្ឋ​ កាន់​អាវុធ​ខុស​ច្បាប់ និង​ប្រឆាំង​នឹង​អាជ្ញាធរ​ស្រប​ច្បាប់ ដែល​មាន​ចែង​ក្នុង​មាត្រា មួយ​ចំនួន​ នៃ​ក្រម​ព្រហ្មទណ្ឌ។

អត្ថបទគួរចាប់អារម្មណ៍