ភ្នំពេញៈ ឡានដឹកកម្មករកាត់ដេរជាង៥០បានជួបគ្រោះថ្នាក់ចរាចរណ៌កាលពីវេលាម៉ោងជាង៦ព្រឹកមិញនេះជាមួយនឹងឡានដឹកដី ដែលបង្កឲ្យកម្មករទាំងអស់រងរបួសធ្ងន់ និងស្រាល។ ហេតុការណ៌នេះកើតឡើងនៅតាមបណ្តោយផ្លូវជាតិលេខ៣ ស្ថិតក្នុងភូមិទឹកថ្លា សង្កាត់ក្រាំងពង្រ ខ័ណ្ឌដង្កោ។
លោកមុំ សុវត្ថិ អធិការខ័ណ្ឌដង្កោ បានមានប្រសាសន៌កាលពីព្រឹកមិញថា កម្មករ ដែលរងរបួសត្រូវបានបញ្ជូនទៅសង្រ្គោះជាបន្ទាន់នៅមន្ទីរពេទ្យ។
លោកបានបន្ថែមថា៖ «មកដល់ម៉ោងប្រមាណជា១០ ខ្ញុំទទួលដំណឹងថា តៃកុង ឡានដឹកកម្មករបានស្លាប់នៅមន្ទីរពេទ្យ ឯកម្មករមិនទាន់មានអ្នកប៉ះពាល់ដល់ អាយុជីវិតទេ»។
លោកបានឲ្យដឹងទៀតថា តាមការវាស់វែងរបស់សមត្ថកិច្ច ភាគីបើកឡានដឹកដី ជាអ្នកបង្កគ្រោះថ្នាក់ដោយឡាននេះបានបើកចូលផ្លូវម្ខាងទៀតប្រហែលជា២ ម៉ែត្រទៅបុកនឹងឡានដឹកកម្មករពេញទំហឹង ធ្វើឲ្យឡានទាំងពីរកៀបជាប់គ្នា។
លោកមុំ សុវត្ថិបានបន្ថែមថា៖ «អ្នកបង្កហេតុបានរត់បានស្រមោលបន្ទាប់ពីគ្រោះថ្នាក់ ហើយសមត្ថកិច្ចកំពុងតាមចាប់តៃកុងឡានដឹកដីនោះ»។
