The Phnom Penh Post Search

Search form




Logo of Phnom Penh Post newspaper Phnom Penh Post - ឪពុក​បង្កើត​លោក​នាយក​រដ្ឋ​មន្ត្រី​ហ៊ុន សែន​ទទួល​មរណៈភាព

ឪពុក​បង្កើត​លោក​នាយក​រដ្ឋ​មន្ត្រី​ហ៊ុន សែន​ទទួល​មរណៈភាព

ឪពុក​បង្កើត​លោក​នាយក​រដ្ឋ​មន្ត្រី​ហ៊ុន សែន​ទទួល​មរណៈភាព

051105
051105

លោកឧកញ៉ា​មហា​ភក្តី ហ៊ុន នាង ឪពុក​​បង្កើត​របស់​លោកនាយករដ្ឋមន្ត្រីហ៊ុន សែន។ រូបថត ហេង ជីវ័ន

បន្ទាប់​ពី​សម្រាក​ព្យាបាល​អស់​រយៈពេល​ជាយូរ​មក​ ឪពុក​បង្កើត​របស់​លោក​នាយក​រដ្ឋ​មន្ត្រី ហ៊ុន សែន បាន​ទទួល​មរណភាព កាល​ពី​យប់​ទៀប​ភ្លឺ នៅ​ម៉ោង ៤ និង ១០ នាទី ព្រឹក​​ថ្ងៃ​សុក្រ ទី​១២ ខែ​កក្កដា ឆ្នាំ​២០១៣ ក្នុង​ជន្មាយុ​៩០​ឆ្នាំ ដោយ​ជរាពាធ។ នេះ​បើ​យោង​តាម​ការ​ប្រាប់​ឲ្យ​ដឹង​ពី​មន្ត្រី​ជាន់​ខ្ពស់​នៃ​គណៈកម្មាធិ​ជាតិ​រៀប​ចំ​ពិធី​បុណ្យ​ជាតិ​និង​អន្តរ​ជាតិ​កាល​ពី​ព្រឹក​ថ្ងៃ​សុក្រ​នេះ។

លោក អ៊ំ​ កែមិកោ ប្រធាន​គណៈកម្មាធិជាតិ​ការ​រៀប​ចំ​ពិធី​បុណ្យ​ជាតិ​និង​អន្តរជាតិ បាន​ប្រាប់​ភ្នំពេញ​ប៉ុស្តិ៍​នា​ព្រឹក​ថ្ងៃ​សុក្រ​នេះ​ថា លោក​ឧកញ៉ា មហា​ភក្តី ហ៊ុន​នាង បាន​ទទួល​មរណៈភាព​ហើយ​ កាល​ពី​វេលា​ម៉ោង​៤​និង​១០​នាទី​ទាប​ភ្លឺ​ថ្ងៃ​សុក្រ​នេះ។

លោកថ្លែងថា៖​«ក្រុម​មន្ត្រី​យើង​ខ្ញុំ​កំពុង​រៀប​ចំ​ពីធី​នេះ ​នៅ​ឯគេហដ្ឋាន​របស់​សម្ដេច​នាយក​រដ្ឋ​មន្ត្រី​ហ៊ុន​ សែន»។

លោក សេង ទៀង ជំនួយ​ការ​ផ្ទាល់​លោក​នាយក​រដ្ឋ​មន្ត្រី​ក៏​បាន​បញ្ជាក់​ប្រាប់​ភ្នំពេញ​ប៉ុស្តិ៍​ដែរ​ថា ការ​ប្រកាស​ពី​មរណៈភាព​ឪពុក​លោក​នាយក​រដ្ឋ​មន្ត្រី បាន​ផ្សាយ​ផ្ទាល់​តាម​ស្ថានីយ៍​ទូរទស្សន៍ ហើយ​ពិធី​បុណ្យ​សព​ប្រារព្ធ​ឡើង​រហូត​ដល់​ថ្ងៃ​ទី ១៧ ខែ​កក្កដា។

លោក​នាយក​រដ្ឋ​មន្ត្រី ហ៊ុន​​ សែន ធ្លាប់​បាន​សម្តែង​នូវ​ការ​ព្រួយ​បារម្ភ ក្នុង​សុន្ទរកថា​ដល់​សាធារណៈ​អំពី​ស្ថានភាព​ជម្ងឺ​របស់​ឪពុក​លោក ដោយ​សារ​ស្ថាន​ភាព​របស់​ឪពុក​លោក​កាន់​តែ​ធ្ងន់ធ្ងរ​ទៅ។ លោក​នាយក​រដ្ឋ​មន្ត្រី​ពេល​ខ្លះ​បាន​លុប​ចោល​កម្មវិធី​ទៅ​តាម​ខេត្ត ដើម្បី​ទុក​ពេល​មើល​ថែរក្សា​ឪពុក​លោក​ដែល​មាន​អាយុ​ច្រើន។

Content image - Phnom Penh Post

យោង​តាម​សេចក្ដី​ជូន​ដំណឹង​ដែល​បាន​ផ្សព្វ​ផ្សាយ​ ​តាម​វិទ្យុ​និង​ទូទស្សន៍​ជាតិ កាលពី​ព្រឹក​ថ្ងៃ​សុក្រ​នេះ​ បាន​បញ្ជាក់​ថា ពិធី​បុណ្យ​សព ផ្តើម​ប្រារព្ធ​ធ្វើ​ចាប់ពី​ថ្ងៃ​ទី​១២​កក្កដា រហូត​ដល់​ថ្ងៃ​ពុធ​ទី​១៧​កក្កដា ឆ្នាំ​២០១៣ នៅ​ភូមិគ្រឹះ​របស់​លោក​នាយក​រដ្ឋមន្ត្រី​ហ៊ុន​សែន ក្បែរ​វិមាន​ឯករាជ្យ រាជធានី​ភ្នំពេញ។

លោក​ឧកញ៉ា មហា​ភក្តី ហ៊ុន នាង កើត​នៅ​ថ្ងៃទី​២៧ ខែ​សីហា ឆ្នាំ​១៩២៣ នៅ​ភូមិ​ពាម​កោះ​ស្នា ឃុំ​ពាម​កោះ​ស្នា ស្រុក​ស្ទឹងត្រង់ ខេត្ត​កំពង់ចាម​។ លោក​បាន​រៀប​ការ​ជាមួយ​អ្នកស្រី​ ឌី ប៉ុក នៅ​ក្នុង​ទសវត្សរ៍​ឆ្នាំ​១៩៤០ ។ អ្នកស្រី ឌី​ ប៉ុក បាន​ស្លាប់​នៅ​ឆ្នាំ​១៩៩៨ ក្នុង​ជន្មាយុ​៧៩ឆ្នាំ ។

លោក​ឧកញ៉ា មហា​ភក្តី ហ៊ុន នាង និង​​អ្នក​ស្រី​ ឌី​ប៉ុក មាន​កូនប្រុស​ស្រី​ចំនួន ៦ នាក់​ និង ​ចៅប្រុស​ស្រី​ចំនួន ៣០ នាក់ និង​ចៅទួត​ប្រុស​ស្រី​ចំនួន ៦០ នាក់ បន្ថែម​ទៀត។​

​នៅ​ខែ​កញ្ញា ឆ្នាំ​២០១១ លោក​ឧកញ៉ា​មហា​ឧបាសក ហ៊ុន នាង ត្រូវបាន​ព្រះ​ករុណា ព្រះ​បាទ​សម្តេច​ព្រះ​បរមនាថ នរោត្តម សីហមុនី ព្រះមហាក្សត្រ​នៃ​ព្រះ​រាជាណាចក្រ​កម្ពុជា បាន​ប្រោស​ព្រះ​រាជ​ទាន​គោរមងារ ជា​អ្នក​ឧកញ៉ា​មហា​ភក្តី​សប្បុរិសភោ​គា​ធិបតី​ហ៊ុន​នាង​។​

លោក​ ឧកញ៉ា​មហា​ភក្តី ហ៊ុន នាង ឪពុក​បង្កើត​របស់​លោក​នាយក​រដ្ឋ​មន្ត្រី ហ៊ុន សែន បាន​ធ្លាក់​ខ្លួន​ឈឺ​ធ្ងន់​អស់​រយៈកាល​ជិត ១​ឆ្នាំ​មក​ហើយ។ លោក​នាយក​រដ្ឋមន្ត្រី ហ៊ុន សែន ធ្លាប់​បាន​ប្រកាស​ជា​សាធារណៈ​អំពី​ស្ថានភាព​ជំងឺ​ឪពុក​របស់​លោក៕​

អត្ថបទគួរចាប់អារម្មណ៍