ភ្នំពេញ : សម្រាប់អ្នកដែលចូលចិត្តរសជាតិបែបហឹរជាប់មាត់ ថ្ងៃនេះភ្នំពេញប៉ុស្ដិ៍សូមណែនាំនូវអាហារពិសេសម៉្យាងដែលគ្រាន់តែ ឮឈ្មោះលោកអ្នកច្បាស់ជាឆ្ងល់ចង់ដឹងពីរសជាតិវាមិនខាន។
នោះគឺ «មីកាហាយ» ពីភោជនីយដ្ឋាន ស្វាងតារា។ តើមីកាហាយនេះចម្អិនពីអ្វីខ្លះទៅ?
គ្រឿងផ្សំ : មីដុំ (មីពងទា) ប្រហិតសាច់គោ សាច់គោស្រស់ហាន់ស្ដើងៗ សាលាដ ជីរ ម្ទេសម៉ដ្ឋក្រៀម ម្សៅស៊ុប និងស្ករស។
វិធីចម្អិន : ជាដំបូងត្រូវស្រុសមីដុំ ប្រហិតសាច់គោ និងចំណិតសាច់គោដោយឡែកពីគ្នាឲ្យឆ្អិនល្មម រួចទុកវាមួយអន្លើសិន។ គ្រឿងផ្សំរសជាតិរួមមានម្ទេសម៉ដ្ឋក្រៀម ម្សៅស៊ុប និងស្ករសត្រូវលាយចូលគ្នា ដើម្បីធ្វើជាទឹកជ្រលក់យកទៅញាំច្របល់ជាមួយមី សាច់ និងប្រហិតដែលស្រុសរួច។ ចុងក្រោយត្រូវដួសវាដាក់ចានមានទ្រាប់ជីរសាលាដ នោះជាការស្រេច។
រសជាតិរបស់មីកាហាយមានលក្ខណៈហឹរក្រហល់ក្រហាយតែម្ដង។ អាហារនេះក្នុងមួយចានមានតម្លៃ១០៥០០រៀល។
ក្រៅពីមីកាហាយ ភោជនីយដ្ឋានស្វាងតារា ក៏មានបម្រើនូវអាហារពេលព្រឹករួមមាន មីកាឡា គុយទាវកាត់ គុយទាវឆា និងមីឆាដែលមានរសជាតិប្រកបដោយភាពច្នៃប្រឌិត។ ហាងក៏មានបម្រើកាហ្វេ Nespresso ដែលល្បីមានរសជាតិឆ្ងាញ់ផងដែរ។
ចង់ដឹង ថាមីកាហាយមានរសជាតិបែបណា លោកអ្នកអាចអញ្ជើញទៅភ្លក្សផ្ទាល់នៅហាងស្វាងតារា ដែលមានអាសយដ្ឋាននៅផ្ទះលេខ៥៧២ ផ្លូវលេខ២៦ សង្កាត់បឹងកក់២ ខណ្ឌទួលគោក។ ទាក់ទងតាមទូរស័ព្ទលេខ០១២ ៦៩៩ ៦៦៩ និង ០១៥ ៦៩៩ ៦៦៩។ អ៊ីមែល coolykt.svd@gmail.com៕
