ភ្នំពេញ : ស្ថិតនៅផ្លូវលេខ៣៦០ ម្ដុំបឹងកេងកង១ អគារពណ៌សក្បុសដែលហ៊ុមព័ទ្ធដោយរុក្ខជាតិតូចធំគឺជាភោជនីយដ្ឋាន បម្រើអាហារអាស៊ីដ៏សែនមនោរម្យមានឈ្មោះថា «បៃតង»។ ថ្ងៃនេះយើងនឹងលើកយកម្ហូប «កាពិបៃតង» មកបង្ហាញជូនប្រិយមិត្តអ្នកអាន។
គឿងផ្សំ : កាពិ បង្គាក្រៀម ត្រីចំហុយសាប ក្រូចឆ្មារ ម្ទេស ខ្ទឹមស ខ្ទឹមក្រហម អំបិល ស្ករស និង ម្សៅស៊ុប។ បន្លែអន្លក់រួមមាន ការ៉ុត ផ្កាខាត់ណា ប្រពាយ សណ្ដែកកួរ ត្រសក់ ស្នៀតពោត ត្រប់ស្រួយ និងជីរវ៉ាន់ស៊ុយសម្រាប់រោយពីលើ។
របៀបចម្អិន : ដំបូងត្រូវយកបង្គាក្រៀមកិន ឬបុកឲ្យម៉ដ្ឋល្មមរួចទុកមួយអន្លើសិន។ ខ្ទឹមស ខ្ទឹមក្រហម និងម្ទេសត្រូវបុកចូលគ្នា ហើយបន្ថែមកាពិ និងបង្គា ក្នុងត្បាល់មុននឹងច្របាច់ក្រូចឆ្មារចូល។ ចាប់ផ្ដើមបន្ថែមគ្រឿងផ្សំរសជាតិដូចជា អំបិល ស្ករស និងម្សៅស៊ុបចូលហើយភ្លក្សតាមចំណូលចិត្ត។ ត្រីចំហុយសាបត្រូវយកទៅចៀនឲ្យក្រៀមបន្តិច។ សណ្ដែកកួរ និងផ្កាខាត់ណាត្រូវស្រុសក្នុងទឹកដែលមានដាក់ប្រេងឆាបន្តិច ដើម្បីឲ្យរក្សាពណ៌ស្រស់។ ចុងក្រោយត្រូវរៀបបន្លែ និងកាពិដាក់ចានតាមរបៀបរៀបរយនោះជាការស្រេច។
ភោជនីយដ្ឋាន បៃតង ស្ថិតនៅផ្ទះលេខ៧ ផ្លូវលេខ៣៦០ ទូរស័ព្ទ ០២៣៦៣០៣០០៥ និង០៩២៥០០៤០០៕
