.jpg)
ការីទ្រូងទាជាមួយទឹកឃ្មុំ មានការរចនាលើចានដ៏ស្អាត។ ហុង មិនា
សៀមរាប: ទាំងការរចនាភោជនីយដ្ឋានមានភាពទំនើបប្រណីត និងចានអាហារបែបហាយក្លាស (High Class) ម្ហូបខ្មែរ នៅហាង ម្ហូប (Mahob) ទាំងនេះបានទាក់ទាញភ្ញៀវទេសចរខ្មែរ និងពិសេសបរទេស មកភ្លក្សរសជាតិអាហារក្នុងស្រុក ជាមួយរសជាតិ និងសោភណភាពប្រកបដោយភាពច្នៃប្រឌិត។
ស្ថិតនៅក្នុងភូមិក្រាំង ឃុំស្លក្រាម ស្រុកស្វាយចេក ខេត្តសៀមរាប ភោជនីយដ្ឋាន ម្ហូប កំពុងតែសាងកេរ្តិ៍ឈ្មោះជាទីបម្រើអាហារខ្មែរដ៏ទំនើប និងប្រណីត។ ម្ហូបម្ហាត្រូវបានរៀបចំក្នុងចានធំៗ លម្អដោយបន្លែបង្ការ គ្រឿងទេសនានា មិនចាញ់សិល្បៈផ្ទះបាយចម្អិនម្ហូបបារាំងឡើយ។
អ្នកនាង ជូ សូនីតា (Chou sonita) ប្រធានផ្នែកលក់ប្រចាំភោជនីយដ្ឋានម្ហូបបាននិយាយថា៖ «ក្រៅពីការធ្វើម្ហូបនៅក្នុងចម្ការម្ហូបសរីរាង្គ ភ្ញៀវក៏អាចនាំគ្នាមកញ៉ាំអាហារពេលរសៀល ឬក៏ពេលល្ងាចបាន នៅភោជនីយដ្ឋាន «ម្ហូប»។
ភោជនីយដ្ឋាន ដែលមានការតុបតែងបែបខ្មែរ លាយរចនាប័ទ្មសម័យទំនើបមួយនេះមានផាសុកភាពងាយស្រួលដល់ភ្ញៀវមកលក្ខណៈគ្រួសារមិត្តភក្តិ និងជាគូស្នេហ៍បែបរ៉ូមេនទិក។
ម្ហូបដែលគួរឲ្យចាប់អារម្មណ៍មានដូចជាប្រហិតបង្គាជាមួយស្លឹកញ និងស្នូលអំពៅ បង្គាឆាអម្ពិលទុំ និងការីទ្រូងទាជាមួយទឹកឃ្មុំ ដោយបន្លែគ្រឿងផ្សំភាគច្រើនគឺត្រូវបានដាំដុះនៅក្នុងចម្ការសរីរាង្គរបស់ភោជនីយដ្ឋានផ្ទាល់តែម្ដង។
ចំពោះម្ហូបការីជាមួយទ្រូងទាវិញ សាច់ទាមានរសជាតិផុយល្មមឆ្ងាញ់។ បន្ថែមរសជាតិដោយទឹកការីលឿងទុំធុំក្លិនគ្រឿងទេសក្រអូបឈ្ងុយ និងស្លឹកជីរនាងវង សាច់ទ្រូងទាលាយស្បែកជាប់ខ្លាញ់ រឹតតែឆ្ងាញ់ អាចញ៉ាំជាមួយបាយក៏បាន ក្លែមក្រេបស្រាក្រហមក៏បាន។
ចង់ញ៉ាំម្ហូបខ្មែរច្នៃប្រឌិតឆ្ងាញ់ៗ ភោជនីយដ្ឋាន ម្ហូប មានលេខទំនាក់ទំនង ០១២ ៨៩១ ៩៦២៕
