.jpg)
ការតុបតែងហាង និងបរិយាកាស ធ្វើឲ្យភ្ញៀវមានអារម្មណ៍ល្ហែល្ហើយ ដូចបានវិលទៅកាន់អតីតកាល។ រូបថត យូសុះ អាប់ឌុលរ៉ាស់ហ៊ីម
ភ្នំពេញ៖ ទោះជាឆ្នាំ ២០២០ បានធ្វើឲ្យទូទាំងពិភពលោកជ្រួលច្របល់ តែអ្នកនៅតែអាចបន្សាបក្ដីកង្វល់ដោយការក្រេបភេសជ្ជៈនៅហាងកាហ្វេ ដែលនាំភ្ញៀវទៅកាន់ទសវត្សរ៍ ៦០។
ទិដ្ឋភាពវិលទៅរកអតីតកាល ជាមួយឥដ្ឋក្រឡាស-ក្រហមការប្រើលេខខ្មែរជាឈ្មោះហាង និងបទចម្រៀងបន្លឺយ៉ាងរងំញ៉ាំងឲ្យបរិយាកាសពោរពេញទៅដោយភាពស្ងប់សុខ។
ប៉ុន្តែលើសពីនោះ រសជាតិកាហ្វេ គឺជាអ្វីដែលអន្ទងចិត្តភ្ញៀវមកគាំទ្រជាហូរហែ។
ម្ចាស់ហាង កាហ្វេ ១៩៦៧ ជាអតីតសិស្សសាលាវិទ្យាស្ថានភាសាបរទេស មាន ពិទូ បានចាប់ផ្ដើមបើកហាងនេះកាលពីដើមខែឧសភា តែជាក់ស្ដែងហាងនេះ គឺផ្ដើមចេញពីអាជីវកម្មលក់់លើរទេះប៉ុណ្ណោះ។
អ្វីដែលជំរុញចិត្តម្ចាស់ហាងវ័យក្មេងរូបនេះ ប្រើរចនាប័ទ្ម និងដាក់ឈ្មោះអតីតកាលបែបនេះ គឺរឿងរ៉ាវដក់ក្នុងចិត្ត ដែលលោកតែងតែឮចាស់ៗនិទានប្រាប់ពីភាពរីករាយនាសម័យកាលនោះ ធ្វើឲ្យលោកចង់នាំបរិយាកាសទសវត្សរ៍ ៦០ ត្រឡប់មកវិញ។
អង្គុយសន្ទនាជាមួយ ភ្នំពេញ ប៉ុស្ដិ៍ ម្ចាស់ហាងកាហ្វេរូបនេះបាននិយាយថា៖ «ខ្ញុំពិតជាស្រឡាញ់វប្បធម៌ និងប្រពៃណីរបស់ខ្មែរកាលពីសម័យអំឡុង ឆ្នាំ ១៩៦០ ហ្នឹងណាស់ ពេលឮចាស់ៗ និងតាខ្ញុំផ្ទាល់រៀបរាប់ម្ដងៗ ខ្ញុំតែងចង់ឲ្យក្មេងសម័យក្រោយបានទទួលអារម្មណ៍ដូចគ្នា បានឃើញពីភាពរួសរាយរាក់ទាក់ ការគោរព ជួយគ្នា និងអធ្យាស្រ័យឲ្យគ្នាទៅវិញទៅមក។ មួយវិញទៀតខ្ញុំចង់អភិរក្សការប្រើប្រាស់លេខខ្មែរ»។
សម្ភារចាស់ៗប្រើជាគ្រឿងតាំងលម្អ។ រូបថត យូសុះ អាប់ឌុលរ៉ាស់ហ៊ីម
មុនពេលបើកជាហាង ពិទូ ឆ្លងកាត់បទពិសោធជំនួញជោកជាំ ដែលខ្លះដំណើរការមិនសូវល្អ។ ពេលនេះលោកនៅសល់តែហាងកាហ្វេ និងអាជីវកម្មចិញ្ចឹមឃ្មុំតែប៉ុណ្ណោះ។
មុនពេលបានឈានមកដល់ចំណុចនេះ ពិទូ និងដៃគូដែលជាមិត្តភក្តិជិតស្និទ្ធបានចំណាយពេលជិត ១ ឆ្នាំទៅរៀនសូត្រពីភេសជ្ជៈ និងកាហ្វេ។
លោករំឭកថា៖ «ខ្ញុំមិនមែនជាមនុស្សចូលចិត្តហូបកាហ្វេហើយក៏គ្មានចំណេះដឹងអ្វីបន្តិចដែរ។ ចាំបានថា កាលណោះខ្ញុំទៅរៀន ទៅសាក ជិត ១ ឆ្នាំយើងឡើងខ្យល់ព្រោះត្រូវសាករាល់ថ្ងៃ តែខ្ញុំចង់ជម្នះវា»។
ពេលនេះកាហ្វេ ១៩៦៧ មានរសជាតិពិសេសប្រចាំហាងដោយមានរូបលោកជាអ្នកចេញរូបមន្តខ្លួនឯងទាំងអស់។
កាហ្វេដែលភ្ញៀវមានការពេញនិយមជាងគេនោះ គឺកាហ្វេអូឡេ តែផាសិនទឹកឃ្មុំ និងកាហ្វេទឹកឃ្មុំ។
ពិទូ បានរៀបរាប់ពីរសជាតិនីមួយៗរបស់កាហ្វេយ៉ាងដូច្នេះថា៖ «កាហ្វេអូឡេជាកាហ្វេលាយជាមួយទឹកដោះគោខាប់ដែលហូបទៅរសជាតិកាហ្វេឈ្ងុយពេញមាត់។ កាហ្វេយើងជ្រើសរើសមកពីតំបន់មួយចំនួននៅអាមេរិកខាងត្បូង ឯតែផាសិនទឹកដោះគោពេលពិសាទៅភ្ញៀវនឹងទទួលបានរសជាតិផាសិន និងទឹកឃ្មុំពីធម្មជាតិ ១០០% ព្រោះយើងយកពីកន្លែងយើងចិញ្ចឹមផ្ទាល់។ ឯ តែ ក៏ជាថ្នាំខ្មែរជំនួយដល់តម្រងនោមផងដែរ។ មួយទៀតនោះគឺ កាហ្វេទឹកឃ្មុំជារូបមន្តថ្មី ទាំងឆ្ងាញ់ ទាំងជួយសម្រួលដល់សម្ពាធឈាមអ្នកដែលខ្សោយផងដែរ»។
នំប៉័ងប៉ាតេ នៅកាហ្វេ ១៩៦៧។ រូបថត យូសុះ អាប់ឌុលរ៉ាស់ហ៊ីម
តម្លៃរបស់ភេសជ្ជៈចាប់ពី ៥ ០០០ ទៅ ៨ ០០០ រៀល។
ចំណុចពិសេសនៃហាង ត្រូវបានលោករំលេចឡើងថា៖ «ទី១ គឺរសជាតិមិនចរចា មានន័យថា គុណភាព គឺគុណភាព គ្មានការថែមថយ បើកាហ្វេខ្សោយ ឬគ្រឿងផ្សំមិនល្អយើងនឹងប្ដូរភ្លាម និងពាក្យស្លោក ១ គឺ ចូលជាភ្ញៀវ ចេញជាគ្រួសារ ពួកយើងមានការស្វាគមន៍ភ្ញៀវយ៉ាងរាក់ទាក់ ធ្វើឲ្យភ្ញៀវមានអារម្មណ៍ដូចជានៅក្នុងផ្ទះរបស់ខ្លួន»។
ក្នុងថ្ងៃអនាគត ពិទូ ចង់ពង្រីកអាជីវកម្ម ហើយក៏ចង់លក់ឈ្មោះ ដើម្បីជួយដល់អ្នកដែលមានដើមទុនតិចតួចអាចបើកអាជីវកម្មខ្លួនឯងផ្ទាល់ និងចាប់អារម្មណ៍ទៅលើការបើកជាហាងកាហ្វេ៖ «ពួកយើងនឹងជួយឲ្យគាត់បើករកស៊ីហើយបង្រៀនគាត់គ្រប់យ៉ាង»។
ជាមួយនឹងការស្រឡាញ់បរិស្ថានហាងលោកក៏មានការបញ្ចុះតម្លៃ ៥០០ រៀល ដល់អ្នក ដែលយកកែវមកខ្លួនឯងផ្ទាល់៖ «ចំណុចសំខាន់ខ្ញុំគ្រាន់តែចង់បង្កើតទម្លាប់កុំឲ្យយើងប្រើហើយបោះចោល ដើម្បីកាត់បន្ថយការប្រើប្រាស់ប្លាស្ទិក ខ្ញុំក៏កំពុងស្វែងរកទីផ្សារណាដែលយកកែវក្រដាស ឬអ្វីក៏ដោយដែលអាចជំនួសប្លាសិ្ទកបាន»។
ទិដ្ឋភាពបែបក្លាសិកនៅមុខហាងកាហ្វេ ១៩៦៧។ រូបថត សហការី
ជាចុងក្រោយ ពិទូ បានផ្ដាំផ្ញើទៅកាន់អ្នកអានទាំងអស់ថា៖ «ខ្ញុំចង់លើកទឹកចិត្តដល់អ្នកដែលមិនពេញចិត្តហើយស្ទាក់ស្ទើរមិនដឹងថាខ្លួននឹងធ្វើអ្វី ឲ្យងើបចេញពីភាពអាប់អួនេះ ហើយដេញតាមក្ដីស្រមៃរបស់ខ្លួន បើគិតថាខ្លួនមិនទាន់មានសមត្ថភាពចូរទៅរៀន ដុសខាត់ខ្លួនឯងឲ្យពូកែ ហើយយកវាមកប្រើប្រាស់ក្នុងជីវិត»។
ហាងកាហ្វេ ១៩៦៧ ចាប់ផ្ដើមបើកពីម៉ោង ៧ ព្រឹក ដល់ម៉ោង ៧ ល្ងាច និងមានទីតាំងនៅផ្លូវ ១៣៤ សង្កាត់មិត្តភាព ខណ្ឌ ៧ មករា។
ពេលនេះមានការដឹកជញ្ជូនតាម Nham 24 ផងដែរ៕
វីដេអូ៖
