The Phnom Penh Post Search

Search form

Logo of Phnom Penh Post newspaper Phnom Penh Post - ខណៈ​សេដ្ឋកិច្ច​ស្ទុះ ម្ហូប​ចិញ្ចើមផ្លូវ​ផ្ដើម​តែង​កាយ​ដើរ​ចូល​ហាង​ស្អាតៗ




ខណៈ​សេដ្ឋកិច្ច​ស្ទុះ ម្ហូប​ចិញ្ចើមផ្លូវ​ផ្ដើម​តែង​កាយ​ដើរ​ចូល​ហាង​ស្អាតៗ

ចំណី​ចិញ្ចើម​ថ្នល់​ជាច្រើន​បាន​ប្រែ​មុខមាត់​ជា​អាហារ​បម្រើ​ក្នុង​ហាង​ដ៏​ស្អាត​សមរម្យ​។
ចំណី​ចិញ្ចើម​ថ្នល់​ជាច្រើន​បាន​ប្រែ​មុខមាត់​ជា​អាហារ​បម្រើ​ក្នុង​ហាង​ដ៏​ស្អាត​សមរម្យ​។ រូបថត Kimberley Mccosker

ខណៈ​សេដ្ឋកិច្ច​ស្ទុះ ម្ហូប​ចិញ្ចើមផ្លូវ​ផ្ដើម​តែង​កាយ​ដើរ​ចូល​ហាង​ស្អាតៗ

ភ្នំពេញៈ បបរ​មាន់​ស្រែ ទើប​បើក​​​នៅ​ក្បែរ​ផ្សារ​កណ្ដាល លើ​កំណាត់​ផ្លូវ​លេខ​ ១៥៤ កាលពី​ដើម​ខែ​ឧសភា បាន​បម្រើ​បបរ​គ្រឿង​ដ៏​ពេញ​និយម​របស់​ប្រជាជន​ខ្មែរ​ជា​អាហារ​សម្រន់ ស្ថិត​ក្នុង​បរិស្ថាន​ស្អាត​នៃ​តុ​ឈើ​រលោង និង​​បុគ្គលិក​មាន​ឯកសណ្ឋាន​បៃតង​ខ្ចី​។ ថ្វីដ្បិត​តែ​វា​មិនមែន​ហាង​លំដាប់​ផ្កាយ​យ៉ាង​ណា​ក៏ដោយ ក៏​វា​ខុស​ប្លែក​ឆ្ងាយ​ពី​រទេះ​រុញ​លក់​បបរ​តាម​ចិញ្ចើម​ផ្លូវ​ដទៃ​ទៀត​។

លោក សំកុល សង្វារ ជា​ម្ចាស់​ហាង បាន​និយាយ​ថា ជំនួញ​របស់​លោក​តែងតែ​ទទួល​បរាជ័យ​ជានិច្ច ប៉ុន្ដែ​ពេល​នេះ​លោក​ទទួល​ជោគជ័យ​ក្នុង​ការ​លក់​បបរ​ដែល​មាន​តម្លៃ ២៥០០ ​រៀល​ក្នុង​មួយ​ចាន ឬ​ ៤០០០ ​រៀល​សម្រាប់​ការ​បន្ថែម​សាច់មាន់ ក្នុង​បរិយាកាស​អង្គុយ​ស្រួល​ខ្លួន​។

លោក​បាន​ឲ្យ​ដឹង​ថា​៖ «​​ភរិយា និង​ម្ដាយ​របស់​ខ្ញុំ​មាន​គំនិត​បើក​លក់​បបរ ហើយ​ខ្ញុំ​សម្រេច​បង្កើត​គំនិត​ច្នៃប្រឌិត​ថ្មី ពីព្រោះ​អតិថិជន​ត្រូវការ​អ្វី​ដែល​ថ្មី​ និង​ទាន់​សម័យ​»។

លោក​មិនមែន​ជា​អាជីវករ​លក់​ដូរ​ដែល​ប្រែ​ក្លាយ​របរ​តាម​ចិញ្ចើមផ្លូវ​ទៅ​ជា​អាហារ​ក្នុង​ភោជនីយដ្ឋាន​នោះ​ទេ​។

ក្បែរ​ផ្សារ​ទួលទំពូង ភោជនីយដ្ឋាន​នំប៉័ង​សាំងវិច ដែល​សរសេរ​ជា​ភាសា​ឡាតាំង «​Num Pang Sandwich» មាន​លក់​នំប៉័ង​វែង​សាំងវិច​ដែល​វេចខ្ចប់​តាម​របៀប​ខ្មែរ​។

បបរ​មាន់​មាន​ថែម​សាច់​។
បបរ​មាន់​មាន​ថែម​សាច់​។ រូបថត Kimberley Mccosker

ជា​ម្ចាស់​ភោជនីយដ្ឋាន​ លោក ម៉ូនីរ៉ា ឌេនីញ៉ែល បាន​ថ្លែង​​ថា៖ «​ខ្ញុំ​គិត​ថា វា​ពិតជា​ល្អ​បើ​ភោជនីយដ្ឋាន​ច្រើន​ដែល​លក់​ម្ហូប​មាន​គុណភាព​ខ្ពស់ និង​បរិយាកាស​ផាសុកភាព​អម​ដោយ​តម្លៃ​ថោកសមរម្យ ពីព្រោះ​ប្រជាជន​កម្ពុជា​បច្ចុប្បន្ន​ចូលចិត្ដ​ទីកន្លែង​ស្អាត និង​មុខម្ហូប​សុខភាព​»។

លោក ស្រី ចាន់ធី ជា​សេដ្ឋវិទូ​ឯករាជ្យ​បាន​ឲ្យ​ដឹង​ថា ជាមួយ​នឹង​កំណើន​សេដ្ឋកិច្ច​ជា​មធ្យម​​ប្រមាណ​ ៧ ​ភាគរយ​ក្នុង​មួយ​ឆ្នាំ មុខ​ជំនួញ​តូចៗ​បែប​ច្នៃ​ប្រឌិត​កំពុង​រីក​ដុះដាល​ដូច​ផ្សិត​​ទូទាំង​ទីក្រុង​។

លោក​បាន​លើក​ឡើង​ថា​៖ «​គំនិត​ច្នៃប្រឌិត​ល្អៗ​ជាមួយ​នឹង​ការ​រចនា​ស្រស់​ស្អាត មាន​ម៉ាស៊ីន​ត្រជាក់ ម្ហូប​អនាម័យ​គុណភាព​ខ្ពស់ និង​សេវាកម្ម​ល្អ តម្លៃ​សមរម្យ កំពុង​តែ​ទាក់​ចិត្ដ​អតិថិជន​យ៉ាង​ខ្លាំង​»។

ប៉ុន្តែ​ប្រធាន​សមាគម​សេដ្ឋកិច្ច​កម្ពុជា​រូប​នេះ​បាន​ព្រមាន​ថា ម្ចាស់​​ជំនួញ​ថ្មីៗ​ដែល​ត្រៀម​​ខ្លួន​ដាក់​ទុន​ចូល​ទីផ្សារ​ត្រូវ​ធ្វើការ​សិក្សា​ស្រាវជ្រាវ​ជាមុន​សិន ដោយ​លើក​ហេតុផល​ថា​៖ «​អ្នក​ជំនួញ​ខ្លះ​ទទួល​ជោគជ័យ​​ដោយសារ​តែ​ពួកគេ​មាន​ផលិតផល​ល្អ តែ​ខ្លះ​ក៏​បរាជ័យ​ដែរ​»។

អ្នកស្រី ស៊ូ ស៊ីណេត ជាអ្នក​គ្រប់គ្រង​ភោជនីយដ្ឋាន Krahom Noodle Bar ស្ថិត​នៅលើ​ផ្លូវ​លេខ​ ៣២២ លក់​គុយទាវ​ស៊ុប​ក្រហម បាន​និយាយ​ថា យុទ្ធសាស្ដ្រ​ទីផ្សារ​របស់​ក្រុមហ៊ុន​គឺ​ផ្ដោត​លើ​អាហារ​សុខភាព និង​មាន​គុណភាព​ខ្ពស់​ក្នុង​បរិស្ថាន​ស្អាត​។

អ្នកស្រី បាន​បន្ដ​ថា​៖ «​យើង​សង្ឃឹម​ថា គ្រឿង​ផ្សំ​រសជាតិ​គុយទាវ​របស់​យើង​នឹង​ទាក់ទាញ​អតិថិជន​ច្រើន​។ យើង​បង្កើត​ផលិតផល​មាន​គុណភាព​ខ្ពស់ ច្នៃប្រឌិត​ខុស​ពី​គ្នា និង​គួរ​ឲ្យ​ចង់​ទទួលទាន​»។

យ៉ាង​ណា​មិញ អ្នកស្រី ស៊ីណេត ឲ្យ​ដឹង​ថា ក្រុមហ៊ុន​មិន​ត្រឹមតែ​មាន​គម្រោង​​​​បើក​សាខា​បន្ថែម​ក្នុង​រាជធានី​ភ្នំពេញ​ទេ ដោយ​អ្នកស្រី អះអាង​ថា​៖ «​គោលដៅ​របស់​យើង​គឺ​ចង់​ឃើញ​យីហោ​កម្ពុជា​របស់​យើង​ត្រូវ​បាន​ទទួល​ស្គាល់​ជា​លក្ខណៈ​អន្ដរជាតិ​ថែម​ទៀត​ផង​»៕ HR

អត្ថបទគួរចាប់អារម្មណ៍