ភ្នំពេញ: ចង់ញ៉ាំ តែដូចជាខ្ជិលជិះទៅញ៉ាំនៅម្តុំកៀនស្វាយ អ៊ីចឹងមានតែរកកន្លែងទទួលទានក្នុងក្រុង។
ស្ថិតនៅក្រោយសាលាវ៉ាន់ដា ហាងលក់ម្ហូបមួយដែលមានឈ្មោះអាហារដ្ឋាន ៣ ជំនាញ ដែលមានចុងភៅក្មេងៗពីរបីនាក់កំពុងតែអាំង ឈរចាក់ខ្ទិះចូលក្នុងខ្យង មានក្លិនឈ្ងុយហើរមកប៉ះច្រមុះអ្នកដំណើរឆ្លងកាត់ទីនោះ មិនឲ្យជិះហួស ហើយក៏បានឈប់ម៉ូតូចូលភ្លក្សសិន។
លោក សយ វិរៈ ម្ចាស់អាហារដ្ឋាន ៣ ជំនាញ និយាយថា៖ «បើសិនជាបងប្អូនដែលខ្ជិលជិះទៅឆ្ងាយដើម្បីញ៉ាំខ្យង គឺអាចមកភ្លក្សខ្យងនៅហាងខ្ញុំបាន ដោយសារតែនៅទីនេះគឺខ្ញុំបាននឹកឃើញបង្កើតជាគ្រឿងផ្សំថ្មីៗដើម្បីច្នៃខ្យងមកធ្វើជាម្ហូបដែលមានរសជាតិខុសប្លែកពីគ្នា គឺមានច្រើនរសជាតិ ដែលហាងខាងក្រៅមិនមានដូចនៅទីនេះ ដូចជាខ្យងឆាខ្ទិះដូងខ្ទឹមបំពង និងខ្យងខ្ទិះអាំងជាដើម ដោយម្ហូប ២ មុខនេះគឺពិសេសខ្លាំងប្រចាំហាងតែម្តង ទាំងរសជាតិប្លែកមាត់ជាមួយទឹកជ្រលក់ និងគ្រឿងផ្សំដែលខ្ញុំធ្វើពិសេសប្រចាំត្រកូល»។
ក្រៅពីខ្យង នៅក្នុងអាហារដ្ឋាន ៣ ជំនាញមានម្ហូបសម្រាប់អ្នកមកញ៉ាំជាគ្រួសារ ឬក៏មិត្តភក្ដិដូចជា ឆាងាវក្រូច ដែលជាម្ហូបថ្មីប្រចាំហាង ដោយពីមុនយើងធ្លាប់តែឃើញគេឆាងាវអម្ពិលទុំ តែឥឡូវនេះម្ចាស់ហាងបានច្នៃយកក្រូចឆ្មារមកឆាជាមួយងាវជំនួសអម្ពិលទុំវិញ បង្កើតបានជារសជាតិឆ្ងាញ់ប្លែកពីឆាងាវអម្ពិលទុំ។
ចំពោះតម្លៃវិញ ខ្យងអាំងខ្ទិះដូងខ្ទឹមបំពងមួយចានត្រឹមតែ ៥ ០០០ រៀល កង្កែបអាំង ១២ ០០០ រៀល ក្នុងមួយចាន ឆ្អឹងជំនីរជ្រូក ១ ចានតម្លៃ ៨ ០០០ រៀល។ អាហារដ្ឋាន ៣ ជំនាញ មានទូរស័ព្ទលេខ ០៨៩ ៧៧៨ ៨៧៧៕