.jpg)
គុយទាវកាត់ស្នូលប៉ិកួៈ ផ្សិតត្រចៀកកណ្ដុរ សាច់ជ្រូកចិញ្ច្រាំជាមួយសាច់ប៉ាតេ ណែម និងនំជើងជ្រូក។ ហេង ជីវ័ន
ភ្នំពេញ: អ្នកដំណើរលើផ្លូវសុកហុក មុខជាស្គាល់ប្លុកលក់គុយទាវកាត់ ល្បីមានមនុស្សចេញចូល និងខ្លះចូលចតយានជំនិះខ្ចប់ទាំងប្រអប់ៗ ខណៈទាំងអ្នកបកគុយទាវ និងអ្នកមូរស្នូលសុទ្ធតែញាប់ដៃគ្រប់ៗគ្នា។
ចំណោមហាងទាំងនោះ គុយទាវកាត់ ៥៥៥ មានអាយុកាលចំណាស់ជាងគេ ដោយម្ចាស់ហាងបានរក្សានូវរសជាតិដដែលអស់រយៈកាលប្រមាណ ២ ទសវត្សរ៍មកហើយ។
អ្នកមើលការខុសត្រូវហាង លោក សិដ្ឋ សិលា បានរៀបរាប់ថា៖ «បើគិតពីមុខរបរគុយទាវកាត់នេះគឺតតាំងពីជំនាន់បងឪពុកម្ដាយក្មេកខ្ញុំមកម្ល៉េះរហូតដល់តំណគាត់ ហើយខ្ញុំគ្រាន់តែមើលការខុសត្រូវឲ្យគាត់ទេ។ រយៈពេលដែលពួកគាត់បើកដូចជាបើតាមខ្ញុំចាំចង់ ២០ ឆ្នាំអីហើយ»។
គុយទាវចំហុយ និងមូរដាក់ស្នូលរួចកាត់ដាក់ចានភ្លាមៗ។ ហេង ជីវ័ន
ទោះជានៅលើវិថីសុខហុកមានហាងគុយទាវកាត់ដទៃទៀតក៏ដោយ ក៏អ្នកមើលការខុសត្រូវហាងគុយទាវកាត់ ៥៥៥ រូបនេះអះអាងថាដោយសារការចម្អិនមានរូបមន្តត្រឹមត្រូវ អនាម័យ ហើយរសជាតិរក្សានៅឆ្ងាញ់ ទើបភ្ញៀវចេះតែកើនឡើងជាលំដាប់។
អ្នកមើលការខុសត្រូវវ័យ ២៩ ឆ្នាំរូបនេះបានបន្តថា៖ «យើងធ្វើគឺមានក្រឹត្យក្រម យើងអត់អាចចេះតែធ្វើទេ។ អ៊ីចឹងតាំងពីដើមដល់ឥឡូវគឺរសជាតិនៅតែដដែល ហើយដោយសារពួកខ្ញុំលក់មុនគេ អ៊ីចឹងបានចេះតែមានអតិថិជនមកគាំទ្រពួកខ្ញុំច្រើនទៅៗ។
លោក សិលា បានរៀបរាប់ថាគុយទាវកាត់ធ្វើពីម្សៅអង្ករខ្សាយដោយកិនដូចម្សៅនំបញ្ចុកដែរ។ បន្ទាប់មកម្សៅត្រូវយកមកចំហុយ រួចបកវាមកមូរជាមួយស្នូលប៉ិគួៈ លាយជាមួយផ្សិតត្រចៀកកណ្ដុរ និងសាច់ជ្រូក។ រីឯបន្លែមានសណ្ដែកបណ្ដុះ ជីរ និងសាលាដ។ សាច់ផ្ទាប់នឹងគុយទាវកាត់មានជម្រើសសាច់ប៉ាតេ នំជើងជ្រូក និងណែមរួមផ្សំជាមួយទឹកត្រីរសជាតិជូរប្រៃផ្អែម។
ហាងតម្លៃសមរម្យ និងអនាម័យធ្វើឲ្យអតិថិជនគ្រប់វ័យមកគាំទ្រ។ហេង ជីវ័ន
ជារៀងរាល់ថ្ងៃហាងគុយទាវកាត់ ៥៥៥ មានភ្ញៀវមកញ៉ាំ និងខ្ចប់ជាហូរហែ តែនៅចុងសប្ដាហ៍មានភាពមមាញឹកជាងគេ។ ក្រៅពីគុយទាវកាត់តម្លៃ ៧ ០០០ រៀលហាងក៏មានបម្រើបាញ់ស្រ៊ុង បាញ់ហយ នំប៉័ងប៉ាតេ ពងមាន់ចៀន តម្លៃ ៧ ០០០ រៀល។ ប្រភេទខគោ មានគុយទាវ មី និងនំប៉័ង តម្លៃ ១០ ០០០ រៀល។
គុយទាវកាត់ ៥៥៥ ស្ថិតនៅផ្ទះលេខ ៨៣ ផ្លូវ ១០៧ ទូរស័ព្ទលេខ ០៩២ ៨២ ៨៨ ៩៨៕
Yousos Apdoulrashim
វីដេអូ៖
