.jpg)
គុយទាវទូកលើគោកមានបន្ថែមគាវ និងជើងមាន់។ ហុង មិនា
ភ្នំពេញ: មានទីតាំងនៅបរិវេណសំយាបផ្ទះ លើផ្លូវ ៣១៣ និង ៦០២ ក្រោយផ្សារមាន់អាំង ក្បែរភោជនីយដ្ឋាន The Street TK តូបរទេះលក់គុយទាវ ឈ្មោះថា «គុយទាវទូកលើគោក» ដោយគ្រាន់តែឮឈ្មោះ ក៏មានអារម្មណ៍ថាប្លែកគួរឲ្យចង់សាកភ្លក្សរសជាតិរបស់វាដែរ។
ជាមួយការតុបតែងស្ទីលបែបសាមញ្ញា ដោយមានតុឈើអង្គុយ ជាលក្ខណៈអាហារតាមផ្លូវ គុយទាវទូកលើគោក មានការរៀបចំសណ្ដាប់ធ្នាប់ល្អ ហើយអនាម័យវិញមិនចាញ់ហាងនោះទេ។
លោក គង់ គីមសួរ ម្ចាស់រទេះលក់ គុយទាវទូកលើគោកបាននិយាយថា៖ «ដោយសារបច្ចុប្បន្ននេះខ្ញុំឃើញថាមិនសូវជាមានអ្នកលក់គុយទាវទូកនៅតាមចិញ្ចើមផ្លូវប៉ុន្មានទេ ណាមួយគឺនៅកន្លែងនេះមានសិស្សសាលា និងទីប្រជុំជនច្រើន អ៊ីចឹងបានជាខ្ញុំសម្រេចចិត្តបើកលក់នៅតាមចិញ្ចើមផ្លូវតែម្តង ដើម្បីឲ្យភ្ញៀវទាំងអស់បានភ្លក្សគុយទាវទូកឆ្ងាញ់ និងមានតម្លៃថោកសមរម្យ»។
ម្ចាស់ហាងរូបនេះបានរៀបរាប់ថា៖ «ខ្ញុំចាប់ផ្តើមបើកលក់គុយទាវទូកលើគោកបានរយៈពេលកន្លះឆ្នាំមកហើយ គឺមានភ្ញៀវច្រើនគាត់មកញ៉ាំ មិនថា ក្មេង ឬចាស់ទេ គាត់តែងតែមកគាំទ្រច្រើន ពីព្រោះពួកគាត់នៅតែចង់ញ៉ាំគុយទាវទូកនេះ»។
ដើម្បីផ្ដល់ជម្រើសឲ្យភ្ញៀវកាន់តែច្រើនលោក គង់ គីមសួរ បានឲ្យដឹងទៀតថា៖ «សម្រាប់គុយទាវទូកនេះ គឺខ្ញុំពង្រឹងរសជាតិវាឲ្យមុតឆ្ងាញ់ជាប់មាត់ និងបន្ថែមជា ២-៣ ជម្រើសឲ្យភ្ញៀវគាត់អាចរើសបានទៅតាមចំណង់ចំណូលចិត្ត ដូចជា គុយទាវតុមយុំា គុយទាវទូក គាវ និងជើងមាន់ជាដើម»។
ទើបតែបើកបានកន្លះឆ្នាំ តែលោក គង់ គីមសួរ បានបញ្ជាក់ថា៖ «មានការគាំទ្រពីអតិថិជនច្រើន ដោយមួយថ្ងៃលក់បានពី ៥០ ទៅ ១០០ ចាន ដោយមួយចានសម្រាប់គុយទាវទូកធម្មតាមានតម្លៃ ៦០០០ រៀល រីឯគុយទាវទូកពិសេស វិញ ១០០០០ រៀល»។
សម្រាប់អ្នកដែលនិយមញ៉ាំអាហារបែបថៃ គុយទាវទូកលើគោក ស្ថិតនៅក្រោយផ្សារមាន់អាំង។ សម្រាប់ការកុម្ម៉ង់ ដឹកជញ្ជូន ទាក់ទងតាមទូរស័ព្ទ ០៩៣ ២២ ៦៥៦៦៕
