ក្រុងប៉េកាំង: ភោជនីយដ្ឋានចិនមួយក្នុងក្រុងស៊ីជាហ្សួង ខេត្ដបេបៃ បង្កការភ្ញាក់ផ្អើលដោយការលក់ស៊ុបគុយទាវដ៏ថ្លៃបំផុតក្នុងលោក តម្លៃ ១៣ ៨០០ យន់ (៨,២ លានរៀល)។
ស៊ុបគុយទាវ ហាវហ្សុងហាវ ដ៏ថ្លៃនេះលក់នៅភោជនីយដ្ឋាន Niu Gengtian ទាក់ទាញចំណាប់អារម្មណ៍ពលរដ្ឋជាច្រើន ក្រោយរូបថតតារាងមុខម្ហូបបង្ហាញពីតម្លៃលើអនឡាញ។ គួររំឭកថា ស៊ុបគុយទាវថ្លៃបំផុតលំដាប់ទី ២ គឺនៅភោជនីយដ្ឋាន Niu Ba Ba តៃវ៉ាន់ ក្នុងតម្លៃមួយចាន ៣២៩ ដុល្លារ (១,៣២ លានរៀល)។
ចុះហេតុអ្វីគុយទាវនេះអីក៏ថ្លៃម្ល៉េះ? សំណួរនេះត្រូវបានបង្វែរសួរអ្នកគ្រប់គ្រងហាង ឈ្មោះ យ៉ាន ដែលបកស្រាយបែបស្រពេចស្រពិលថា គុយទាវនេះផលិតឡើងពីគ្រឿងផ្សំថ្លៃៗបំផុត ១២ មុខ រួមមាន ៤ សមាសធាតុពីលើមេឃ ៤ នៅលើដី និង ៤ ទៀតពីសមុទ្រ តែមិនបានបញ្ជាក់លម្អិតឡើយ។ លោកក៏អះអាងថា ស៊ុប ១ ចាននេះកើតឡើងពីស្នាដៃមេចុងភៅ ១២ នាក់ ហើយការកុម្ម៉ង់ត្រូវតែធ្វើឡើង ១ ខែមុន។
ស៊ុប ហាវហ្សុងហាវ ត្រូវបានដាក់បញ្ចូលក្នុងតារាងម្ហូបកាលពី ៦ ខែមុន ហើយលោក យ៉ាន បាននិយាយថា លោកបានលក់ស៊ុបគុយទាវនេះ ៤ ចានឲ្យទៅអ្នកជំនួញទ្រព្យស្ដុករួចទៅហើយ។
ដំបូងឡើយ មនុស្សភាគច្រើនដែលបានឃើញតម្លៃរហូតដល់ ១៣ ៨០០ យន់ក្នុង ១ ចាន គិតថា វាគ្រាន់តែជា ការលេងសើច តែកាសែត Sin Chew Daily និងបណ្ដាញផ្សព្វផ្សាយផ្សេងៗទៀត បានទៅដល់ភោជនីយដ្ឋាននេះ និងបានបញ្ជាក់ថា វាជាតម្លៃពិតប្រាកដ។
ដូច្នេះ បើលោកអ្នកហ៊ានចំណាយប្រាក់ជាង ២ ០០០ ដុល្លារទិញស៊ុបគុយទាវ ១ ចាន សូមធ្វើដំណើរទៅកាន់ក្រុងស៊ីជាហ្សួង។ ចូរចងចាំថា អ្នកត្រូវកុម្ម៉ង់មុន ១ ខែ ទើបអាចទៅទទួលទានបាន៕HR