ភ្នំពេញ : គ្រាន់តែឈានជើងចូលភោជនីយដ្ឋានFish & Co នេះភ្លាម ការរចនាខាងក្នុងបានធ្វើឲ្យខ្ញុំមានអារម្មណ៍ហាក់បីដូចជាបានចូលទៅក្រោមបាតសមុទ្រ។
ផ្កាយសមុទ្រ ខ្យងនិងត្រីសមុទ្រធំមួយត្រូវបានព្យួរតាមជញ្ជាំងហាង ដែលមានលាបពណ៌ទឹកសមុទ្រលើពិតាន មើលទៅខៀវស្រងាត់ដូចផ្ទៃសាគរអ៊ីចឹង។ ថ្វីដ្បិតតែយីហោហាងសរសេរថា «ត្រី» ក៏ពិតមែន ប៉ុន្តែភោជនីយដ្ឋានល្បីនៅសិង្ហបុរីមួយនេះមានបម្រើនូវជម្រើសគ្រឿងសមុទ្រនិងសាច់សត្វដទៃទៀតជាច្រើន។
សម្រាប់ថ្ងៃនេះ ខ្ញុំបានជ្រើសរើសយកម្ហូប«គ្រំសមុទ្រឆាគ្រឿងស្លឹកកន្ទ្រោក» ដែលមានរសជាតិបែបអាស៊ីកាត់អឺរ៉ុបធ្វើឲ្យលោកអ្នកញ៉ាំហើយចង់ញ៉ាំទៀតមិនសូវរងាន់។ សូមរីករាយនិងសិក្សាពីវិធីចម្អិនជាមួយនាងខ្ញុំដូចតទៅ។
គ្រឿងផ្សំ: គ្រំសមុទ្រ ស្លឹកកន្ទ្រោក ទឹកក្រែម គ្រឿងផ្សំរសជាតិសិង្ហបុរី អំបិល និងម្សៅស៊ុប។
វិធីចម្អិន : មុនដំបូងត្រូវយកគ្រំសមុទ្រទៅដុះលាងឲ្យស្អាត ហើយទុកឲ្យស្រស់ទឹក។ បន្ទាប់មកយកគ្រំទៅរោយគ្រឿងរសជាតិដើមដែលនាំចូលពីសិង្ហបុរី។ ក្រោយពីគ្រឿងផ្សំចូលជាតិជាមួយសាច់គ្រំហើយ ត្រូវដាក់វាឆានៅក្នុងខ្ទះដោយមានគ្រឿងផ្សំរសជាតិសិង្ហបុរី (ពណ៌លឿងរសជាតិដើម) និងទឹកក្រែម រួចទុកមួយអន្លើសិន។ ស្លឹកកន្ទ្រោកត្រូវយកវាទៅឆ្អើរភ្លើងបន្តិច រួចបេះដាក់ចូលពីលើឆាគ្រំនោះជាការស្រេច។
បើលោកអ្នកចង់ភ្លក្សរសជាតិដើមនៃគ្រំសមុទ្រឆាគ្រឿងស្លឹកកន្ទ្រោក សូមអញ្ជើញទៅកាន់ភោជនីយដ្ឋានFish & Co នៅផ្ទះលេខ១៣៩-១៤១ វិថីស៊ីសុវត្ថិសង្កាត់វត្តភ្នំ ខណ្ឌដូនពេញ រាជធានីភ្នំពេញ ឬទាក់ទងតាមទូរស័ព្ទលេខ ០២៣ ៩៦៦ ៩៦៩៕
