The Phnom Penh Post Search

Search form




Logo of Phnom Penh Post newspaper Phnom Penh Post - ងៀតក្របី​ល្បី​នៅ​ត្បូងឃ្មុំ ភ្ញៀវ​ដង្ហែ​គ្នា​ចូល​ញ៉ាំ​មិន​ស្បើយ

ងៀតក្របី​ល្បី​នៅ​ត្បូងឃ្មុំ ភ្ញៀវ​ដង្ហែ​គ្នា​ចូល​ញ៉ាំ​មិន​ស្បើយ

Content image - Phnom Penh Post
ងៀតក្របី​អាំង​លើ​ចង្អើរ បង្ហើរ​ក្លិន​ទាក់ទាញ​អ្នក​ដំណើរ​ឲ្យ​ចូល​ទទួលទាន​។ រូបថត យូសុះ អាប់ឌុលរ៉ាស់ហ៊ីម

ងៀតក្របី​ល្បី​នៅ​ត្បូងឃ្មុំ ភ្ញៀវ​ដង្ហែ​គ្នា​ចូល​ញ៉ាំ​មិន​ស្បើយ

ត្បូងឃ្មុំៈ ក្នុង​ដំណើរ​ពី​រាជធានី​ភ្នំពេញ​ទៅ​ខេត្ត​ត្បូងឃ្មុំ​តាម​បណ្តោយ​ផ្លូវជាតិ​លេខ​ ៨ ពេល​អ្នក​ទៅ​ដល់​ភូមិ​អភិវឌ្ឍន៍​សម្តេច​អគ្គមហាពញាចក្រី ហេង សំរិន ពញាក្រែក អ្នក​នឹង​ឃើញ​ក្យូស​ជាច្រើន​សង់​ពី​ឈើ​ប្រក់ស្បូវ ជា​កន្លែង​លម្ហែកាយ​ក្រោម​ជំនោរ​ខ្យល់​ត្រជាក់​លម្អ​ដោយ​ទេសភាព​ទឹក​បឹង​ដ៏ធំ​។

បណ្ដុំ​ក្យូស​សម្រាក​អង្គុយលេង​មួយ​នេះ​ក៏​បាន​ទាក់ទាញ​ភ្ញៀវ​ចូល​សម្រាក និង​ភ្លក្ស​រសជាតិ​សាច់​ក្របី​ងៀត​ដែល​ល្បី​តៗ​គ្នា​ថា ឆ្ងាញ់​ពិសា​។

Content image - Phnom Penh Post
ក្យូស​លម្ហែកាយ​ល្បី​លក់​ងៀត​ក្របី​ឆ្ងាញ់​មាន​រថយន្ត​ចត​តម្រៀប​គ្នា​។ រូបថត យូសុះ អាប់ឌុលរ៉ាស់ហ៊ីម

ឈរ​មុខ​ចង្ក្រាន​អាំង​ងៀត​ក្របី​ ផ្សែងហុយ​ចេញ​តិចៗ ក្លិន​ឈ្ងុយ​ងៀតក្របី​ហើរ​មក​ប៉ះ​ច្រមុះ អ្នកស្រី ហៀប ស្រីតូច ម្ចាស់​តូប​អ្នកគ្រូ​តូច​លក់​ងៀតក្របី​បាន​បញ្ជាក់​ថា​៖ «​សាច់​ក្របី​ហ្នឹង ខ្ញុំ​យក​មកពី​ស្វាយអន្ទរ សាច់​ក្របី​ខ្មែរ សាច់​ក្របី​ធម្មជាតិ​គឺ​យក​មកពី​ដេប៉ូ​ផ្ទាល់​តែ​ម្តង​។ ខ្ញុំ​ផ្សំ​គ្រឿង​ខ្លួនឯង​ទាំងអស់ ធានា​ថា​ឆ្ញាញ់ អត់​មាន​ជាតិ​ជូរ​ទេ ដោយសារ​យើង​វេចខ្ចប់​បាន​ត្រឹមត្រូវ​»​។

អ្នកស្រី​ក៏​បាន​បង្ហើប​ដែរ​ថា​៖ «​ខ្ញុំ​ប្រឡាក់ ខ្ញុំ​អត់​យក​សាច់​ដែល​មាន​ជាតិ​ខ្លាញ់​ច្រើន​ទេ បើ​ដុំ​ណា​មាន​ជាតិ​ខ្លាញ់ និង​សស យើង​ចៀរ​វា​ចេញ កុំ​ឲ្យ​ស្វិត ហើយ​គេ​ល្បី​ណាស់ សាច់​ក្របី​ងៀត​មាន​រសជាតិ​ឆ្ងាញ់ គឺ​មាន​តែ​នៅ​ទី​នេះ​ទេ អ្នកណា​ក៏​ស្គាល់​ដែរ »​។

ប្រកបមុខរបរ​លក់​ងៀតក្របី​នេះ​អស់​រយៈពេល​ជាង ៤ ​ឆ្នាំ អ្នកស្រី ហៀប ស្រីតូច បាន​រំឭក​ថា​ដំបូង​ឡើយ​អ្នកស្រី​ជា​អ្នកលក់​គ្រួច និង​សាច់​អាំង​បន្តិចបន្តួច​តែ​ប៉ុណ្ណោះ​។ តែ​នៅ​ដើម​ឆ្នាំ​ ២០១៥ អ្នកស្រី បាន​ចាប់ផ្តើម​លក់​ងៀតក្របី​តាម​ការណែនាំ​របស់​បងប្រុស​ក្នុង​ចំនួន​ត្រឹម​តែ​ ១ ​គីឡូ ២ ​គីឡូ​តែប៉ុណ្ណោះ​។ ដោយសារ​តែ​ស្នាដៃ​ប្រឡាក់​សាច់​ក្របី​មាន​រសជាតិ​ឆ្ងាញ់ មុខរបរ​លក់​មួយ​នេះ​ក៏​កាន់តែ​កាក់កប​ពី​ ១ ​ថ្ងៃ​ទៅ​ ១ ​ថ្ងៃ​នឹង​ធ្វើឲ្យ​អ្នកស្រី បន្ថែម​ចំនួន​ងៀត​ក្របី​កាន់តែ​ច្រើន​ឡើងៗ​។

Content image - Phnom Penh Post
ងៀត​ក្របី​តម្លៃ​ពី​ ៤ ទៅ ៦ ​ម៉ឺន​រៀល​។ រូបថត យូសុះ អាប់ឌុលរ៉ាស់ហ៊ីម

អ្នកលក់​ងៀត​ក្របី វ័យ ២៩ រូប​នេះ​បាន​ឲ្យ​ដឹងថា​៖ «​ងៀត​ក្របី​ខ្ញុំ បើ​ថ្ងៃ​ធម្មតា​អាច​លក់​អស់​ពី ១៨ ​គីឡូ​ដល់ ២០ គីឡូ បើ​ថ្ងៃ​បុណ្យ​ធំៗ​ដូចជា​បុណ្យ​ភ្ជុំបិណ្ឌ​អី អាច​លក់​ដល់​ជាង ១០០ ឬ ២០០ ​គីឡូ​គឺ​ភ្ញៀវ​មក​ច្រើន​មែនទែន​សឹង​តែ​រក​កន្លែង​អង្គុយ​គ្មាន​។ ក្រៅពី​លក់​ដាច់​នៅ​កន្លែង​ក៏​មាន​គេ​​កុម្ម៉ង់​ច្រើន​ដែរ មាន​អ្នក​រតនគិរី មណ្ឌលគិរី សៀមរាប កំពង់ចាម ភ្នំពេញ​អ៊ីចឹង​»​។

ងៀតក្របី​ឆ្ងាញ់​នៅ​ទី​នេះ​មាន​ ៣ ​ប្រភេទ​គឺ ងៀត​ធ្វើ​ភ្លាម​ប្រឡាក់​ភ្លាម ១ ​គីឡូក្រាម តម្លៃ ៤ ​ម៉ឺន​រៀល​។ ងៀតក្របី​ប្រឡាក់ និង​ហាល​រយៈពេល​ ១ ​ថ្ងៃ​តម្លៃ ៥ ​ម៉ឺន​រៀល និង​ងៀត​ក្របី​ប្រឡាក់​ហាល​ចាប់ពី​ ២-៣ ​ថ្ងៃ​ទៅ តម្លៃ ៦ ​ម៉ឺន​រៀល​។

បន្ថែម​ពី​ការលក់​សាច់​ក្របីងៀត​ដែល​ជា​ម្ហូប​ពិសេស​ប្រចាំ​ហាង ហាង​អ្នកស្រី ហៀប ស្រីតូច ក៏​មាន​លក់​ម្ហូប​ជាច្រើន​ផង​ដែរ​ដូចជា ខ្ចងស្រែ ក្រួច កង្កែប ត្រី និង​អាហារ​កុម្ម៉ង់​ផ្សេងៗ ដើម្បី​បំពេញ​តម្រូវការ​របស់​អតិថិជន​។ នៅ​រដូវវស្សា ពិសេស​អំឡុង​ខែ​កក្កដា និង​សីហា​ទេសភាព​នៅ​តំបន់​នេះ​មាន​សភាព​ស្រស់ស្អាត​ដោយ​ទឹក​ឡើង​ពេញ​បឹង និង​ទាក់ទាញ​អ្នក​ដំណើរ​មក​សំចត​ទទួលទាន​អាហារ និង​លេង​ទឹក​កម្សាន្ត​យ៉ាង​ច្រើន​កុះករ​។

ហាង​អ្នកគ្រូ តូច លក់​ងៀតក្របី​ឆ្ងាញ់ បើក​លក់ ២៤ ​ម៉ោង និង​មាន​លេខ​ទូរស័ព្ទ​ទំនាក់ទំនង​ ០៦០ ៨៧៧ ៧៥៤៕

អត្ថបទគួរចាប់អារម្មណ៍

  • ភ្នំពេញៈ ក្រសួង​សាធារណការ និង​ដឹកជញ្ជូន​នឹង​ចេញ​ស្លាក​លេខ និង​បណ្ណ​បើកបរ​បណ្ដោះអាសន្ន​សម្រាប់​រថយន្ត​កែច្នៃ ដែល​បម្រើ​ដល់​វិស័យ​កសិកម្ម​តាម​ការស្នើសុំ​របស់​អគ្គស្នងការ​នគរបាល​ជាតិ ដើម្បី​បង្ការ​គ្រោះថ្នាក់​ចរាចរណ៍ និង​ងាយស្រួល​គ្រប់គ្រង​ព្រម​ទាំង​សម្រួល​ដល់​ការដឹកជញ្ជូន​របស់​កសិករ​។

  • ភ្នំពេញៈ ការនាំចេញ​ចេក​អំបូង​លឿង​ស្រស់​ពី​កម្ពុជា​ទៅ​ទីផ្សារ​អន្តរជាតិ​គិត​ចាប់ពី​ដើមឆ្នាំ​ ២០២០ រហូត​មក​ដល់​ថ្ងៃទី ​៨ ខែ​កក្កដា​ នេះ ​សម្រេច​បាន​ជិត ១៥ ​ម៉ឺន​តោន​ កើនឡើង​ជាង ១៥០ ​ភាគរយ​បើ​ធៀប​ទៅ​នឹង​រយៈពេល​ដូចគ្នា​កាលពី​ឆ្នាំមុន​។ នេះ​បើ​តាម​លោក វេង សាខុន រដ្ឋមន្ត្រី​ក្រសួង​កសិកម្ម រុក្ខាប្រមាញ់ និង​នេសាទ​។

  • ភ្នំពេញៈ អ្នកនាំពាក្យ​មជ្ឈមណ្ឌល​ជាតិ​រក្សា​សន្តិភាព លោកស្រី កុសល ម៉ាលីនដា បាន​ប្រាប់​ឲ្យ​ដឹង​នៅ​ថ្ងៃ​ម្សិលមិញ​ថា កងកម្លាំង​មួកខៀវ​កម្ពុជា​ ៨០ ​នាក់​ដែល​បញ្ចប់​បេសកកម្ម​រក្សា​សន្តិភាព​ក្រោម​ឆត្រ​របស់​អង្គការ​សហប្រជាជាតិ​នៅ​ប្រទេស​ម៉ាលី​នឹង​ត្រូវធ្វើ​មាតុភូមិ​និវត្តន៍​មក​កម្ពុជា​វិញ​នៅ​ថ្ងៃទី​ ១០ កក្កដា ២០២០​។

  • ភ្នំពេញៈ ការស្នើសុំ​ឥណទាន​ពី​កម្មវិធី​ពិសេស​របស់​រដ្ឋាភិបាល​ដែលមាន​ទឹកប្រាក់ ៥០ ​លាន​ដុល្លារ តាមរយៈ​ធនាគារ​អភិវឌ្ឍន៍ជនបទ និង​កសិកម្ម​ (ARDB) បាន​កើន​ដល់​ទឹកប្រាក់​ជាង ៣៧ ​លាន​ដុល្លារ​ ហើយ​គិត​ត្រឹម​ថ្ងៃទី​ ៩ ខែកក្កដា នេះ​។

  • ភ្នំពេញៈ ប្រទេស​កម្ពុជា​ កំពុង​សិក្សា​ពី​លទ្ធភាព​នៃ​ការបង្កើត​កិច្ចព្រមព្រៀង​ពាណិជ្ជកម្ម​សេរី​ជាមួយ​នឹង​ប្រទេស​ឥណ្ឌា​ ដើម្បី​ជា​ការបើក​ទីផ្សារ​ថ្មី​មួយ​ទៀត​ទៅកាន់​ប្រទេស​ដែល​មាន​សេដ្ឋកិច្ច​ធំ​ក្នុង​តំបន់ បន្ទាប់ពី​កិច្ចចរចា​ពាណិជ្ជកម្ម​សេរី​ជាមួយ​ប្រទេស​ចិន​គ្រោង​នឹង​បញ្ចប់​ក្នុង​ខែ​សីហា​ខាងមុខ​។

  • ភ្នំពេញៈ កម្លាំង​នគរបាល​ខណ្ឌ​សែនសុខ​នៅ​រសៀល​ថ្ងៃ​ព្រហស្បតិ៍​ម្សិលមិញ​បានសម្រេច​បញ្ជូន​ខ្លួន​ចៅក្រម​នៃ​សាលាដំបូង​ខេត្ត​កោះកុង​ម្នាក់​ទៅ​សាលាដំបូង​រាជធានី​ភ្នំពេញ ដើម្បី​ចាត់ការ​បន្ត​តាម​នីតិវិធី​ច្បាប់ បន្ទាប់ពី​ចៅក្រម​រូបនេះ​បាន​បង្ក​គ្រោះថ្នាក់​ចរាចរណ៍​បណ្ដាល​ឲ្យ​ស្ត្រី​ម្នាក់​ស្លាប់​កាលពី​រសៀល​ថ្ងៃ​ពុធ ហើយ​អះអាង​ថា ស្ត្រី​រូប​នោះ​ជា​ចោរឆក់​។