The Phnom Penh Post Search

Search form




Logo of Phnom Penh Post newspaper Phnom Penh Post - ចង់​ភ្លក្ស​ស្រា​ក្រឡុក​ពូម៉ុក និង​ការី​មាន់​អាំង​ទៅ​ហាង ពូ នៅ​សៀមរាប




ចង់​ភ្លក្ស​ស្រា​ក្រឡុក​ពូម៉ុក និង​ការី​មាន់​អាំង​ទៅ​ហាង ពូ នៅ​សៀមរាប

Content image - Phnom Penh Post
បាយ​ល្មៀត​ត្រីសាបាក់ និង​ការីមាន់​អាំង​។ Alessandro Marazzi Sassoon

ចង់​ភ្លក្ស​ស្រា​ក្រឡុក​ពូម៉ុក និង​ការី​មាន់​អាំង​ទៅ​ហាង ពូ នៅ​សៀមរាប

ភ្នំពេញ: ដោយ​សារតែ​ធ្លាប់​ជួប​ភាព​បរាជ័យ​ជា​ច្រើន​ដង​ទើប​បាន​ធ្វើ​ឲ្យ​ចុងភៅ​វ័យក្មេង​ម្នាក់​សម្រេច​ចិត្ត​ជម្នះ​នូវ​ភាព​បរាជ័យ​ដោយ​បើក​ហាង​តូច​មួយ​របស់​ខ្លួន​នៅ​ខេត្ត​សៀមរាប បើក​ហាង​បែប​ម្ហូប​ខ្មែរ​រសជាតិ​ដើម ដោយ​ច្នៃ​ប្រឌិត​សោ​ភណភាព​បែប​អឺរ៉ុប។

ចុងភៅ​វ័យក្មេង លោក ម៉ក់ ម៉េង​លី និយាយ​ទាំង​ដៃ​កំពុង​តែ​តុប​តែង​ម្ហូប​ថា៖ «មុន​ដំបូង​ទម្រាំ​ខ្ញុំ​សម្រេច​ចិត្ត​បើក​ហាង​នេះ​ឡើង​គឺ​ដោយសារ​តែ​ខ្ញុំ​ចង់​បង្ហាញ​ពី​ស្នាដៃ​ធ្វើ​ម្ហូប ដែល​ខ្ញុំ​មាន​បទពិសោធ​ជាច្រើន​ឆ្នាំ​ដល់​ភ្ញៀវ​ជាតិ និង​អន្តរជាតិ​ទាំងអស់​ភ្លក្ស​ជា​ពិសេស​ជាង​នេះ​ទៅ​ទៀត គឺ​ខ្ញុំ​ចង់​ជម្នះ​រាល់​ឧបសគ្គ​ទាំង​នោះ​ផងដែរ។

ដោយ​កាល​ពីមុន​ខ្ញុំ​ធ្លាប់​ធ្វើ​មេ​ចុងភៅ​នៅ​សណ្ឋាគារ Rambutant នៅ​ភ្នំពេញ ហើយ​នៅ​ទីនោះ ខ្ញុំ​ទទួល​បាន​បទពិសោធ​ច្រើន ធ្លាប់​ប្រឡង​ជាប់​បាន​មេដាយ​ប្រាក់​​ ហើយ​គេ​បញ្ជូន​ខ្ញុំ​ទៅ​រៀន​នៅ​ស្រុក​ក្រៅ​ច្រើន អ៊ីចឹង​ខ្ញុំ​មាន​អារម្មណ៍​ថា​ជំនាញ​ចុងភៅ​នេះ គឺ​ល្អ​ប្រសើរ ហើយ​ខ្ញុំ​ក៏ចង់​ក្លាយជា​មនុស្ស​ណា​ម្នាក់​នៅ​ថ្ងៃ​អនាគត ដូចជា​លោក​មេ​ចុងភៅ លូ ម៉េង អ៊ីចឹង​ដែរ។

ក្រោយ​ពី​ធ្វើការ​បាន​រយៈពេល ២ ឆ្នាំ​កន្លះ ខ្ញុំ​ក៏​សម្រេច​ចិត្ត​ប្តូរ​មក​សៀមរាប​វិញ​ដើម្បី​ឆ្លង​កាត់​ឧបសគ្គ​ឲ្យ​ហើយ​ទាន់​ខ្លួន​នៅ​ក្មេង ដោយ​មិនទាន់​ដឹង​ថា តើ​ខ្ញុំ​ត្រូវ​ជួប​បញ្ហា​អ្វីខ្លះ​នៅ​ពេល​មក​ទីនេះ។ មក​ដល់​សៀមរាប​ភ្លាម ខ្ញុំ​ចាប់​ផ្តើមធ្វើ​មេ​ចុងភៅ​នៅ​ក្នុង​បារ៍​បាន​កន្លះ​ឆ្នាំ តែ​ការងារ​នេះ​ដូចជា​មិន​សូវ​ត្រូវចិត្ត​របស់​ខ្ញុំ​ប៉ុន្មាន​ទេ ខ្ញុំ​ក៏ដូរ​ជាច្រើន​កន្លែង​រហូតដល់​មាន​គំនិត​បើក​ហាង​ខ្លួនឯង ដោយ​ដាក់​ឈ្មោះ​ថា ភោជនីយដ្ឋាន ពូ ឲ្យ​ប្លែក​តែម្តង»។

Content image - Phnom Penh Post
លោក ម៉ក់ ម៉េងលី។ រូបថត កែវ រតនា

ម្ហូប​នៅ​ក្នុង​ហាង​ពូ​នេះ សុទ្ធតែ​ជា​ម្ហូប​ខ្មែរ​រសជាតិ​ដើម ក៏ប៉ុន្តែ​មេ​ចុងភៅ​បាន​ប្រើ​ជំនាញ​ច្នៃ​ប្រឌិត​ខ្ពស់​ដោយ​យក​ម្ហូប​អាម៉ុក​មក​ធ្វើជា​ស្រា​ក្រឡុក​វិញ ក៏ប៉ុន្តែ​មិន​មាន​ត្រី​ទេ។ រីឯ​សម្លការី គឺ​មិន​មែន​ស្ល​ទេ បែរ​ជា​យក​ការី​ទៅ​អាំង​ជំនួស​វិញ។

ចង់​សាក​ស្រា​ក្រឡុក ស្រា​ក្រឡុក​ពូម៉ុក, ការី​មាន់​អាំង, នំគ្រក់ ឃ្មុំ​អាំង និង​ត្រី​សាបាក់ បាយ​ល្មៀត​ទេ? អាច​ទាក់ទង​តាម​ទូរស័ព្ទ​លេខ ០៩៦ ៩៧១ ៨០៨៨៕

អត្ថបទគួរចាប់អារម្មណ៍