.jpg)
មុខម្ហូបឈ្មោះថា Chilli Crab Sauce។ រូបថត យូសុះ អាប់ឌុលរ៉ាស់ហ៊ីម
ភ្នំពេញ៖ ស្ថិតនៅលើអគារពណ៌សប្រណីត ២ ជាន់ មានទីធ្លាធំទូលាយអាចទទួលភ្ញៀវបានច្រើនរយនាក់ មានជំនោរខ្យល់ត្រជាក់ និងជ្រកក្រោមម្លប់ដើមឈើកម្រៗមានគ្រញូង បេង និងរុក្ខជាតិបៃតង ដាំជាជួររំលេចដូចសួនស្រស់ស្អាតអង្គុយគយគន់ផ្កា ភ្លក្សម្ហូបអាហារចិន ក្រេបតែក្តៅ ផ្តល់នូវផាសុខភាពដល់ភ្ញៀវគ្រប់រូប និងមានបន្ទប់សម្រាប់ការជួបជុំលក្ខណៈគ្រួសារ មិត្តភក្តិ ពិភាក្សាការងារជប់លៀង និងជាន់ក្រោម តម្រៀបកៅអីតុតាមស្តង់ដាសិង្ហបុរី ព្រមទាំងមានលក់ស្រាក្រឡុក នៅខាងក្រៅអគារអមផងក្រោមបរិយាកាសភ្លើងពណ៌យ៉ាងរ៉ូមេនទិក។
អ្នកស្រី Amy Chiv វ័យ ៤៥ ឆ្នាំ ជាតិសិង្ហបុរី ជាម្ចាស់ភោជនីយដ្ឋាន Tunglok Signatures ប្រាប់ភ្នំពេញ ប៉ុស្តិ៍ ថា៖ «ខ្ញុំបើកភោជនីយដ្ឋាននៅកម្ពុជា ព្រោះខ្ញុំមានស្វាមី ដែលជាជនជាតិខ្មែរធ្លាប់រស់នៅអាមេរិក ពួកយើងបានគិតតាំងពីមុនមកទីនេះថា ចង់ជួយប្រជាជនឲ្យមានការងារធ្វើ ហើយក៏ចង់នាំយកម្ហូបស្តង់ដាដែរ»។
ភ្ញៀវអាចកុម្ម៉ង់មុខម្ហូបទៅតាមចំណូលចិត្តនៅភោជនីយដ្ឋានបែបសិង្ហបុរី TungLok Signatures។ រូបថត យូសុះ អាប់ឌុលរ៉ាស់ហ៊ីម
ជ្រូកខ្វៃ ចម្អិនដោយចុងភៅ បទសោធច្រើនឆ្នាំមកពីសិង្ហបុរី ប្លែកទាំងរសជាតិ និងវិធីក្នុងការចម្អិន។ មុនពេលយកទៅចម្អិន ចុងភៅយកទៅសម្ងួតនៅក្នុងទូរហូតដល់ស្ងួត (ប្រហែលជា ២៤ ម៉ោង) ទើបយកទៅខ្វៃ ដោយមានបន្ថែមបាយដំណើប តម្លៃ ២៣០ ដុល្លារ សម្រាប់ជ្រូក ១ ក្បាល។ អតិថិជនដែលនិយមជ្រូកខ្វៃសម្រាប់ពិធីបុណ្យផ្សេងៗដូចជាចូលឆ្នាំចិន សែនឆេងម៉េង ជាដើម អាចធ្វើការកុម្ម៉ង់មុនពេល ៤៨ ម៉ោង សម្រាប់ការចម្អិន។
អ្នកស្រី Amy Chiv ដែលធ្លាប់បើកហាងកាហ្វេនៅឯទឹកដីអាមេរិក និងចេះជំនាញចម្អិនម្ហូបដែរនោះបន្តថា៖ «Tunglok គឺជាភោជនីយដ្ឋានដែលល្បីស្រាប់នៅសិង្ហបុរី ហើយក៏មានច្រើនសាខាដែរ។ ចំពោះមុខម្ហូបវិញយើងមានម្ហូបកែច្នៃខ្លះ និងបែប Original ម្ហូបចិនកន្តាំង។ ភោជនីយដ្ឋាននេះ មានការកែច្នៃមុខម្ហូបជាច្រើន ព្រោះយើងធ្វើតម្រូវតាមភ្ញៀវតាមតំបន់»។
Tunglok Signature មានមុខម្ហូបជាច្រើនដូចជា Braised shark''s Fin with Crab Meat (៦៨ ដុល្លារ) Chilli Crab Sauce (តម្លៃតាមទម្ងន់ក្តាម) Tunglok Signatures Roasted Duck (ទាខ្វៃ ៣៨ ដុល្លារ) Nyonyastyle Fried (តម្លៃតាមទំហំត្រី) និងម្ហូបជាច្រើនទៀត សម្រាប់ជម្រើសភ្ញៀវ។ គួរឲ្យកត់សម្គាល់នោះ ស៊ុបត្រីឆ្លាម (Double boiled Sharks Fin in Sharks Cartilage Soup និង Braised Sharks Fin with Crab Meat) ក៏ជាមុខម្ហូបដែលល្បីប្រចាំភោជនីយដ្ឋាននេះដែរ ខណៈទឹកស៊ុបមានការរម្ងាស់រយៈពេល ២៤ ម៉ោង ជាមួយបន្លែ ត្រីសាច់ និងក្បាលបង្កង តាមក្បួនរូបមន្តដើម ដែលតម្លៃ ១ ចាន ៦០ ដុល្លារ។
បង្អែម Chilled Pumpkin Cream with Purple Rice topped & Coconut Ice-cream។ អាប់ឌុលរ៉ាស់ហ៊ីម
ចំពោះប្រភេទសាច់ ដូចជាសាច់ទា សាច់គោ និងគ្រឿងសមុទ្រ ដែលបាននាំចូលមកពីប្រទេស អូស្ត្រាលី ជប៉ុន និងសហរដ្ឋអាមេរិក និងភាគតិចបានប្រើប្រាស់ផលិតផលនៅក្នុងស្រុក ដោយសារមិនមានការផ្គត់ផ្គង់ឲ្យបានគ្រប់គ្រាន់តាមតម្រូវការភោជនីយដ្ឋានយើង។ ឯបន្លែវិញ បាននាំចូលពីអង្គការ ដែលជាដៃគូ និងភាគតិចបំផុត នាំចូលពីក្រៅប្រទេសដូចគ្នា។
ក្រៅពីប្រភេទអាហារដែលល្បីប្រចាំ Tunglok Signatures ក៏មានជាប្រភេទបង្អែមមានរសជាតិឆ្ងាញ់ប្លែកដូចជា Deep-fried Sesame Ball, Double-boiled Almond Cream with ''Tang Yuan'' (៨ ដុល្លារ) Warm Valrhona Chocolate Lava Cake Served with Vanilla Ice-cream (១២ ដុល្លារ) និងបង្អែម មានរសជាតិមិនផ្អែមខ្លាំង ការ៉ែមលាយនឹងអង្ករដំណើបបំពង Chilled Pumpkin Cream with Purple Rice topped with Coconut Ice-cream (៨ ដុល្លារ)។
ពាក់ព័ន្ធនឹងតម្លៃមុខម្ហូបនីមួយៗរាងខ្ពស់នោះ អ្នកស្រី Amy Chiv ក៏បញ្ជាក់ថា៖ «នេះជាតម្លៃដែលបានកំណត់តាមស្តង់ដាពីសិង្ហបុរី ម្យ៉ាងទៀតយើងប្រើប្រាស់គ្រឿងផ្សំ ដែលមានគុណភាពខ្ពស់បំផុត។ ចំណែកឯអាហារសមុទ្រនាំចូលមកស្រស់ៗ មានគុណភាពខ្ពស់ មិនឲ្យអតិថិជនខកចិត្តឡើយ»។
ម្ចាស់ភោជនីយដ្ឋានTunglok Signatures អ្នកស្រី Amy Chiv ដែលបញ្ចប់បរិញ្ញាបត្រជាន់ខ្ពស់ផ្នែកទីផ្សារ និងពាណិជ្ជកម្មនៅសាកលវិទ្យាល័យ Murdoch ថ្លែងថា៖ «នៅពេលនេះ យើងមិនទាន់រៀបចំរួចរាល់ទេ ហើយក៏ទើបបើកសាកដំបូងទទួលភ្ញៀវតែពេលល្ងាចប៉ុណ្ណោះ រហូតដល់ថ្ងៃទី ១ ខែ មករា ដើមឆ្នាំ ២០២០ ទើបបានមានលក់អាហារថ្ងៃត្រង់ពីម៉ោង ១១:៣០ ដល់ម៉ោង ២:៣០ រសៀល និងល្ងាចពីម៉ោង ៦ ល្ងាច ដល់ម៉ោង ១២ យប់។ បន្ថែមពីនេះក៏មានលក់ស្រាក្រឡុកផងដែរ»។
ភោជនីយដ្ឋាននេះ ទើបតែបានដំណើរការពីថ្ងៃទី ២ ខែ ធ្នូ ឆ្នាំ ២០១៩ មកនេះ មានលក់តែអាហារពេលល្ងាចតែប៉ុណ្ណោះ ចាប់ពីម៉ោង ៦ ល្ងាច ទៅ ដែលទទួលភ្ញៀវ ៣-៤ តុ ក្នុងមួយថ្ងៃ ភាគជាភ្ញៀវខ្មែរ និងមានទីតាំងស្ថិតនៅផ្ទះលេខ ៣០ ផ្លូវលេខ ២២២ កែងផ្លូវ ៥៥ ក្នុងសង្កាត់បឹងរាំង ខណ្ឌដូនពេញ។ លោកអ្នកអាចទំនាក់ទំនងតាមទូរស័ព្ទលេខ ០៦៩ ៩៣១ ៨៨៨ ឬតាមរយៈហ្វេសប៊ុកផេក Tunglokcambodia៕
វីដេអូ៖
