ភ្នំពេញ: ស្ថិតនៅលើផ្លូវមុនីវង្ស ម្តុំមីទាញឆ្ងាញ់ពេទ្យចិន រទេះលក់បង្អែមចាប់លៀងល្បីឆ្ងាញ់មួយកន្លែង មានភ្ញៀវអង្គុយញ៉ាំ ហើយអ្នកខ្លះឈររង់ចាំខ្ចប់យកទៅផ្ទះយ៉ាងកុះករ។
កញ្ញា ដានិក ដែលជាម៉ូយប្រចាំនៅកន្លែងលក់បង្អែមចាប់លៀងនេះបាននិយាយថា៖ «ខ្ញុំមកញុំាបង្អែមចាប់លៀងនេះតាំងពីជំនាន់ខ្ញុំរៀនថ្នាក់ទី ៨ មកម្ល៉េះ ហើយឥឡូវខ្ញុំចូលធ្វើការបានច្រើនឆ្នាំហើយឃើញថាគាត់នៅតែលក់ដដែល។ សម្រាប់ចាប់លៀងកន្លែងគាត់នេះគឺឆ្ងាញ់ជាងគេតាំងពីខ្ញុំញ៉ាំមក។ ដោយសារតែកន្លែងគាត់ធ្វើស្អាត លក់មិនដែលសល់ គឺអស់ៗតែម្តង ណាមួយគ្រឿងបង្អែមចាប់លៀងទាំងអស់គាត់ធ្វើដោយខ្លួនឯងសឹងតែគ្រប់មុខ ដូចជាសណ្តែកចំហុយ ត្រាវដំឡូងឆឹង គ្រាប់ឈូក មើមឈូកចំហុយ ស្រូវសាលីចំហុយ គ្រាប់ពុទ្រាក្រហមចំហុយ និងគ្រាប់ធញ្ញជាតិជាច្រើនមុខទៀត»។
កញ្ញាបានបន្តថា៖ «បើតាមខ្ញុំដឹងអ៊ីលក់បង្អែមចាប់លៀងនេះគឺគាត់លក់យូរមកហើយ ប្រហែលជា ២០ ឆ្នាំ តាំងពីគាត់នៅជួយលក់ជាមួយថៅកែចិន អ៊ីចឹងហើយគេបង្រៀនឲ្យគាត់ ធ្វើគ្រប់មុខទាំងអស់ ហើយរៀនបានជំនាញច្រើនចំពោះការធ្វើបង្អែមចាប់លៀងនេះ»។
លក្ខណពិសេសជាងគេនៃបង្អែមចាប់លៀងរបស់គាត់ត្រង់ទឹកស្ករ គឺគាត់ធ្វើឆ្ងាញ់ សម្រាប់លក់មួយថ្ងៃៗ រីឯគ្រឿងបង្អែមវិញគឺមិនដែលលក់សល់ដល់ថ្ងៃស្អែកនោះទេ។
ចង់ញ៉ាំបង្អែមចាប់លៀង ស្នាដៃជំនាញជាង២០ឆ្នាំទេ? អាចទៅរកញ៉ាំបាននៅកន្លែងលក់របស់ អ៊ីចាប់លៀង ពេទ្យចិន មួយចានតម្លៃត្រឹមតែ ៤០០០ រៀល តែប៉ុណ្ណោះ ឆ្អែតល្មមសម្រាប់អ្នកញ៉ាំតិច តែបើអ្នកញ៉ាំច្រើនអាចថែមមួយចានទៀតគឺឆ្អែតតែម្តង។ ទំនាក់ទំនងទូរស័ព្ទ កុម្ម៉ង់ ០៩៦ ២៨៤ ៤៩៩៤៕