.jpg)
អ្នកអាំងឧស្សាហ៍មើលភ្លើង លាបទឹក sauce និងឈរប្រែចេក យ៉ាងយកចិត្តទុកដាក់។ ហុង មិនា
ភ្នំពេញ: នៅមុខហាងលក់វត្ថុអនុស្សាវរីយ៍ Best Buy Station ក្រៅពីសម្រស់តុក្កតាដ៏គួរឲ្យស្រឡាញ់ ទាក់ភ្នែកអ្នកដំណើរ នៅមានក្លិនចេកអាំងដ៏ឈ្ងុយឆ្ងាញ់ ដែលធ្វើឲ្យមនុស្សឆ្លងកាត់ ចង់តែចូលសំចតចុះទិញញ៉ាំឲ្យឆ្ងាញ់មាត់។
ចេកអាំងទឹកឃ្មុំ ចេកអាំងដូងទឹកឃ្មុំ ជាមួយជម្រើសទឹកជ្រលក់ទឹកខ្ទិះ និងទឹកទុរេន រួមទាំងដំឡូងឆឹង ចេកឆឹងដូង តម្លៃ ១ ប្រអប់ពី ៥ ០០០ រៀល ទៅ ១០ ០០០ រៀល។
រូបមន្តចេកអាំងឆ្ងាញ់នេះកើតចេញពីចំណូលចិត្តចំណីទឹកខ្ទិះរបស់កញ្ញា ស៊ាងហៃ សុវណ្ណលីនដា និងម្ដាយនាង ជាអ្នកចូលចិត្តញ៉ាំទុរេន។
គំនិតច្នៃអាហារសម្រន់ជាស្នាដៃអ្នកម្ដាយ ត្រូវបានកញ្ញា លីនដា រំឭកឲ្យដឹងថា៖ «មកពីកាលពីក្មេងហ្នឹង ខ្ញុំចូលចិត្តញ៉ាំនំប៉័ងទឹកខ្ទិះខ្លាំងមែនទែន ហើយទឹកខ្ទិះហ្នឹងសម្រាប់ខ្ញុំគឺជ្រលក់ជាមួយអីក៏ឆ្ងាញ់ដែរ។ និយាយរួមទៅខ្ញុំអ្នកចូលចិត្តទឹកខ្ទិះ ហើយម៉ាក់ខ្ញុំគាត់ចូលចិត្តទុរេន ទើបខ្ញុំគិតថា ចង់លក់ចំណីអ៊ីចឹង»។
ទាំងក្លិន រសជាតិប្លែកពីចេកអាំងដោតចង្កាក់ទូទៅ ចេកអាំងឆ្ងាញ់ល្បីនៅផ្លូវ ៣១០ មានវិធីចម្អិនចិបចុបច្រើន។
អ្នកលក់វ័យ ២១ ឆ្នាំរូបនេះ បានរៀបរាប់ថា៖ «ចំណុចខុសប្លែកពីគេគឺដោយសារចេកអាំងខ្ញុំហ្នឹង ពេលអាំងគឺទឹកជ្រលក់អាំងមានទឹកឃ្មុំ ដូង និងល្ង ហើយមានលាយគ្រឿងថែមទៀត។ ចេកអាំងខ្ញុំខុសពីគេ ព្រោះពេលអាំងហ្នឹងមានលាបទឹក sauce ហ្នឹងទៀត»។
ចាប់តាំងពីចេកនៅស្រស់ រហូតដល់លើចង្អើរ វិធីអាំងនោះទៀតសោតក៏មានច្រើនដំណាក់កាល និងទាមទារការយកចិត្តទុកដាក់គ្រប់វិនាទី។
ចេកឆឹង និងដំឡូងឆឹងដូង ១ប្រអប់ថ្លៃ ៥០០០ ទៅ ១០ ០០០ រៀល។ ហុង មិនា
កញ្ញា លីនដា បានឲ្យដឹងទៀតថា៖ «ការចម្អិនចេកអាំងកន្លែងខ្ញុំមិនមែនជារឿងងាយស្រួលទេ។ ចេកពេលដែលទិញមកភ្លាម ពួកខ្ញុំបក យកមកហាលឲ្យរាងរឹងហើយ យកទៅអាំងឲ្យឆ្អិននៅមូល មុននឹងយកទៅដំ លាបទឹកជ្រលក់ រួចអាំងទៀត ហើយមានលាបទឹក sauce អាំងទៀត។ និយាយរួមទៅ Process វារាងយូរ អ៊ីចឹងជួនកាលពេលភ្ញៀវគាត់មកចាំ វារាងយូរអ៊ីចឹង»។
អ្នកលក់រូបនេះបានបញ្ជាក់ដែរថា៖ «អ្នកអាំងត្រូវមើល អត់អាចដកភ្នែកពីចេកហ្នឹង ព្រោះថាតែមួយភ្លែតខ្យល់បក់ម៉ាភ្លើងអ៊ីចឹង ចេកហ្នឹងអាចខ្លោចហ្មង អ៊ីចឹងទាមទារអ្នកអាំងហ្នឹងមើលចេករហូត ហើយត្រឡប់ មើលភ្លើងជាប់»។
ចេកទន់ ឬរឹង អាថ៌កំបាំងរសជាតិឆ្ងាញ់ស្ថិតនៅលើទឹកខ្ទិះ ទឹកទុរេន។ ហុង មិនា
ចាប់តាំងពីបើកលក់បានជាង ២ ខែមក ចេកអាំងឆ្ងាញ់ Best Buy Station ទទួលបានការគាំទ្រច្រើនពីអ្នកទិញ ដោយមួយថ្ងៃកញ្ញា លីនដា អាចលក់បានប្រមាណ ២០០ ប្រអប់តូចធំ ទាំងមិនគិតចេកឆឹង និងដំឡូងឆឹងទេ។
យ៉ាងណាចំពោះរសជាតិ កញ្ញាក៏ទទួលស្គាល់ថា៖ «ចេកអាំងប្រែប្រួលតាមថ្ងៃ ព្រោះពេលខ្លះចេកទិញមកវារាងរឹង ខ្លះវារាងទន់បន្តិច តែភ្ញៀវភាគច្រើនគាត់និយាយថា ចេកអាំងខ្ញុំឆ្ងាញ់ សំខាន់គឺរសជាតិទឹកជ្រលក់ខ្ញុំ ធ្វើឲ្យចេកអាំងមិនថាទន់ ឬរឹងនោះទេ គឺនៅតែមានរសជាតិឆ្ងាញ់»។
ចេកអាំងឆ្ងាញ់ Best Buy Station ស្ថិតនៅផ្ទះលេខ ៤៥៤ ផ្លូវ ៣១០ (ទល់មុខ Moly Care លាងឡាន ស្តុប សាលាចិន ទួនហ្វារ) ទូរស័ព្ទលេខ ០១០ ៤៦៦ ៤៤៤ និង ០៨៧ ៥៩ ៥៣ ៨៣៕
