ភ្នំពេញ : គ្រាន់តែមកដល់អគារឡារ៉ូស ពណ៌សដ៏ស្កឹមស្កៃលើដងវិថីព្រះនរោត្តម ក្លិនស្លឹកគ្រៃដ៏ក្រអូបឈ្ងុយឈ្ងប់បានភាយចេញមកធ្វើឲ្យបណ្ដាភ្ញៀវដែលមកទីនេះមានអារម្មណ៍ល្ហែល្ហើយផ្លូវកាយចិត្ត។ ក្រៅពីបម្រើការជាសណ្ឋាគារប្រភេទប៊ូទិក និងកន្លែងស្ប៉ានោះ ឡារ៉ូសក៏មានភោជនីយដ្ឋាននៅជាន់ក្រោមដែលមានបរិយាកាសដ៏សែនមនោរម្យបំភ្លឺដោយពន្លឺភ្លើងដ៏ស្រទន់។ ផ្ទាំងគំនូរ កញ្ចក់ក្បាច់ ទម្រទៀន និងវាំងននស្បៃធ្វើឲ្យបន្ទប់ទទួលទានជញ្ជាំងពណ៌ក្រហមនេះមានភាពប្រពៃឥតខ្ចោះ។
គ្រាន់តែចូលអង្គុយភ្លាម បុគ្គលិកនារីដ៏រួសរាយរាក់ទាក់បានចេញមកជម្រាបសួរស្វាគមន៍យ៉ាងកក់ក្ដៅ ជាមួយនឹងបញ្ជីរាយនាមមុខម្ហូប ភេសជ្ជៈ បង្អែម និងស្រាក្រឡុកជាច្រើនមុខផងដែរ។
ចំណីគួរឲ្យទាក់ភ្នែកជាងគេនោះគឺ Banana Palm ដែលចម្អិនដោយប្រើចេកពងមាន់ ស្ករត្នោត ទឹកក្រែម ទឹកដូង សម្រាប់ទទួលទានជាមួយចំណិតផ្លែម្នាស់ និងឪឡឹក។ វិធីចម្អិនបង្អែមកូនកាត់នេះគឺដំបូងត្រូវយកស្ករត្នោតរម្ងាស់ជាមួយទឹកដូងឲ្យឡើងខាប់អន្ធិល រួចចាក់ទឹកក្រែមចូល។ ចាប់ផ្ដើមរៀបផ្លែឈើលើចាន រួចយកទឹកខ្ទិះស្កររម្ងាស់រួចនោះទៅស្រូបពីលើចេកនោះជាការស្រេច។
ឡារ៉ូស ដែលមានបម្រើអាហារបីពេល ព្រមទាំងកាហ្វេភេសជ្ជៈផ្សេងៗភ្ជាប់នឹងសេវា wifi នោះស្ថិតនៅអគារលេខ១៦៤B មហាវិថីព្រះនរោត្តម។ ទាក់ទងទូរស័ព្ទលេខ ០៦៨ ៧៧ ៧៧ ៧៧៕
