ភ្នំពេញ : ស្ថិតនៅខាងកើតពហុកីឡដ្ឋានជាតិអូឡាំពិក ភោជនីយដ្ឋានអាយហ្វូត (iFood) ដែលមានការតុបតែងដោយសិង្ហរិមពណ៌ខ្មៅរលោងលាយពូកអង្គុយពណ៌ក្រហមនោះ មិនត្រឹមតែមានលក់នូវស៊ុបក្ដៅៗលើចង្ក្រានជាមួយបន្លែ និងសាច់នោះទេ។ អាយហ្វូតក៏មានជម្រើសម្ហូបជាច្រើនប្រភេទសម្រាប់ទទួលទានជាមួយបាយផងដែរ។
ក្នុងចំណោមម្ហូបទាំងនោះ ឆាសាលាដសងជាមួយសាច់ជ្រូកចិញ្ច្រាំពិតជាម្ហូបសាមញ្ញក៏ពិតមែន ប៉ុន្តែមានរសជាតិគួរឲ្យចាប់ចិត្តមែន ដោយសារតែតុល្យភាព បន្លែ សាច់ និងស៊ុត ធ្វើឲ្យរសជាតិអាហារនេះឆ្ងាញ់ត្រូវមាត់ និងផ្ដល់គុណប្រយោជន៍សុខភាពដល់អ្នកទទួលទានថែមទៀតផង។
គ្រឿងផ្សំរបស់ម្ហូបនេះរួមមាន សាលាដសង សាច់ជ្រូក ពងទា ខ្ទឹមស ស្ករស អំបិល និងម្សៅស៊ុប។ សាច់ជ្រូកត្រូវបានយកទៅចិញ្ច្រាំរួចឆាជាមួយនឹងខ្ទឹមស មុននឹងដាក់គ្រឿងផ្សំរួមមានអំបិល ស្ករស និងម្សៅស៊ុបចូល។ រីឯបន្លែសាលាដសងត្រូវបានគេបង់ក្នុងខ្ទះឆាចុងក្រោយ ដោយប្រើវែកឆាកូរមួយត្រឡប់ នោះបន្លែក៏ឆ្អិនរួចជាស្រេច។ បន្ទាប់មក គេអាចដួសឆាដាក់ចាន អមជាមួយនឹងចំណិតពងទាស្ងោរបីបួនដុំ។
ម្ហូបនេះមានរសជាតិស្រាលស្រទន់ ហើយបន្លែក៏នៅរក្សាពណ៌បៃតងស្រស់។ ឆាសាលាដសងសាច់ជ្រូកចិញ្ច្រាំនេះមានតម្លៃប្រមាណជា៣ដុល្លារក្នុងមួយចាន។ ភោជនីយដ្ឋានអាយហ៊្វូត ស្ថិតនៅផ្ទះលេខ ៤៩ ផ្លូវលេខ ១៦១ សង្កាត់បឹងព្រលឹត ខណ្ឌ៧មករា រាជធានីភ្នំពេញ។ ទាក់ទងទូរស័ព្ទលេខ ០២៣ ២១៦ ៣៥៨ និង ០៩៨ ២១៦ ៣៥៨៕
