The Phnom Penh Post Search

Search form




Logo of Phnom Penh Post newspaper Phnom Penh Post - ជើងមាន់​ឆ្ងាញ់​កប់លូ ម្ចាស់​ហាង និង​ភ្ញៀវ​ញ៉ាំ​ស្មើ​ដៃ​គ្នា




ជើងមាន់​ឆ្ងាញ់​កប់លូ ម្ចាស់​ហាង និង​ភ្ញៀវ​ញ៉ាំ​ស្មើ​ដៃ​គ្នា

Content image - Phnom Penh Post
ជើង​មាន់​ផ្ទះលូ ១ ប្រអប់​មាន​តម្លៃ ១ ម៉ឺនរៀល។ ហុង មិនា

ជើងមាន់​ឆ្ងាញ់​កប់លូ ម្ចាស់​ហាង និង​ភ្ញៀវ​ញ៉ាំ​ស្មើ​ដៃ​គ្នា

ភ្នំពេញ: រសជាតិ​ឆ្ងាញ់​ប្លែក និង​ឈ្មោះ​ហាង​ចម្លែក បាន​ធ្វើឲ្យ ហាង «ជើងមាន់​ផ្ទះលូ» ល្បី​ពីមាត់​មួយ​ទៅ​មាត់​មួយ។

លោក ជា ពិសី ម្ចាស់​ហាង​ជើង​មាន់ផ្ទះ​លូ បាន​និយាយ​ទាំង​ទឹកមុខ​ញញឹម​ថា៖ «ខ្ញុំចង់​ធ្វើអ្វី​ឲ្យ​ប្លែក​ពីគេ ហើយ​បែប​ខ្មែរ​តែម្តង ជាមួយ​នឹង​រូបភាព​ការ​តុបតែង​ហាង​ឲ្យស្អាត​ប្លែក​ពីគេ ជាពិសេស​គឺមិន​ចម្លង​ពី​ប្រទេស​ដទៃ។ សំខាន់​បំផុត​យើង​ចង់​ផ្សព្វផ្សាយ និង​លើក​ស្ទួយ​ម្ហូប​ខ្មែរ​ឡើង​វិញ ដែល​ធ្វើឡើង និង​ច្នៃប្រឌិត​ពីចុងភៅ​ខ្មែរ​ដែល​គាត់​មាន​បទពិសោធ​ជាង ១០ ឆ្នាំ​មក​ហើយ»។

លោក​បន្តថា៖ «ជើងមាន់​ផ្ទះ​លូនេះ​គឺ​ចាប់ផ្តើម​បើក​លក់​បាន​មួយឆ្នាំ​ជាង​ហើយ មាន​ការ​គាំទ្រ​ច្រើនពី​អតិថិជន ជាពិសេស​អ្នក​យក​ទៅ​ក្លែម​និង ខ្លះទៀត​ក៏កុម្ម៉ង់​សម្រាប់​កម្មវិធី​ជប់លៀង​នៅ​ផ្ទះ​ជាដើម»។

អ្វីដែល​ពេញ​និយម​ខ្លាំង​បំផុត​នៅ​ជើងមាន់​ផ្ទះលូ គឺ រសជាតិ​ហឹរ រសជាតិ​ពិសេស និង​រសជាតិ​ថ្មី​មួយទៀត​គឺមាន់​លីង​អំបិល​ម្ទេស។ ក្រៅពី​ប្រភេទ​ជើងមាន់ ហាង ជើងមាន់​ផ្ទះលូ ក៏មាន​បាយ​លីង​រមៀត ដែល​ចុងភៅ​ច្នៃ​យក​រមៀត​មកលីង​ជាមួយ​បាយ និង​សាច់មាន់​ចៀន​ធ្វើឲ្យ​បាយ​នេះ​មាន​រសជាតិ​ប្លែក​មាត់ និងមាន​ក្លិន​រមៀត​ឈ្ងុយ​រមៀត។ នៅ​ពេល​ញ៉ាំ​បន្ថែម​រសជាតិ​ទឹកត្រី​កោះកុង បាយ​លីង​រមៀត​រឹតតែ​ឆ្ងាញ់​តែម្ដង។

ចំពោះ​តម្លៃ​នៅ​ហាង ជើងមាន់​ផ្ទះលូ ជើងមាន់​រសជាតិ​ហឹរ រសជាតិ​ពិសេស មាន់​លីង​អំបិល​ម្ទេស និង​បាយ​លីង​រមៀត គឺមាន​តម្លៃ​ដូចគ្នា ១ ម៉ឺនរៀល​ក្នុង​មួយ​ប្រអប់។

ចង់​ដឹងថា​ឆ្ងាញ់​ប៉ុនណា ជើងមាន់​ផ្ទះលូ ស្ថិត​នៅ​ផ្លូវ ៩៥ សង្កាត់​បឹងត្របែក ខណ្ឌ​ចំការមន ទំនាក់​ទំនង​ទូរស័ព្ទ​លេខ ០៨១ ៣៣៨ ៦៦៨៕

អត្ថបទគួរចាប់អារម្មណ៍