ភ្នំពេញ : នៅពេលដែលយើងបរិភោគអាហារប្រចាំថ្ងៃ ជ្រក់បន្លែគឺជាម្ហូបដ៏ចាំបាច់ដែលជួយបង្កើនរសជាតិឲ្យមុខម្ហូបដទៃ ក៏ដូចជាជួយឲ្យយើងមិនរងាន់នឹងអាហារដដែលផងដែរ។
យ៉ាងណាមិញ នៅតាមបណ្ដាទីផ្សារនានា យើងឃើញមានលក់តែប្រភេទជ្រក់ប៉ុន្មានមុខប៉ុណ្ណោះដូចជាជ្រក់ត្រសក់ ស្ពៃ សណ្ដែកបណ្ដុះ មមាញ និងជ្រក់ល្ហុងជាដើម...។ ប្រសិនបើយើងចង់ប្លែកមាត់បន្តិចនោះ មានតែធ្វើដំណើរទៅកាន់ខេត្តដទៃទៀត ទើបបានភ្លក្សរសជាតិប្រភេទជ្រក់ថ្មីៗ។ នៅទឹកដីខេត្តស្វាយរៀងឯណោះវិញក៏ល្បីខាងជ្រក់ធាងត្រាវ ដែលមានរសជាតិឆ្ងាញ់ពិសាផងដែរ។ ក្រឡេកមួយភ្លែត ជ្រក់ធាងត្រាវសឹងតែច្រឡំនឹងជ្រក់ត្រកួន ប៉ុន្តែរសជាតិរបស់វាពិតជាមិនដូចគ្នានោះទេ។
យោងតាមមេចុងភៅ អូម សុគន្ធមារតី មកពីខេត្តស្វាយរៀង ដើម្បីធ្វើជ្រក់ធាងត្រាវ យើងត្រូវការគ្រឿងចម្បងគឺ ធាងត្រាវ អំបិល និងកូនពាង ឬក្រឡ។
វិធីធ្វើជ្រក់នេះគឺងាយបំផុត ដោយដំបូងយើងត្រូវយកធាងត្រាវទៅលាងសម្អាតឲ្យអស់ដី រួចសឹមយកមកកាត់ជាកង់ៗ មុននឹងយកកំណាត់ឬស្បៃទៅរុំវា ហើយប្រើកម្លាំងដៃសង្កត់ ច្របាច់វាឲ្យចេញទឹកអស់។ បន្ទាប់មក យកធាងត្រាវដែលស្ងួតទឹកទៅច្របល់ជាមួយអំបិលឲ្យចូលជាតិគ្នា មុននឹងដាក់វាក្នុងកូនពាងផ្អាប់ទុករយៈពេលប្រមាណជា២ថ្ងៃ។
នៅពេលបរិភោគ យើងអាចដួសជ្រក់ធាងត្រាវមកបរិភោគដោយលាយម្ទេស គល់ស្លឹកគ្រៃ ផ្កាស្នោ ឬសណ្ដែកបណ្ដុះតាមចំណង់ចំណូលចិត្ត។
មេចុងភៅ អូម សុគន្ធមារតី អាចទាក់ទងតាមលេខ ០៩២ ៩៥ ៩៩ ២៧៕
