.jpg)
ភោជនីយដ្ឋានមានបរិយាកាសផាសុកភាព ហើយជម្រើសម្ហូបមានទាំងអាស៊ី និងអឺរ៉ុប។ ហុង មិនា
ក្រុងសៀមរាប: មុខម្ហូបខ្មែរ ដែលល្បីដល់សហរដ្ឋអាមេរិកតាមរយៈការចុះផ្សាយក្នុងសារព័ត៌មាន The New York Times ញាំក្រអៅឈូក ជាមុខម្ហូបអត្ដសញ្ញាណប្រចាំភោជនីយដ្ឋាន ខ្មែរថាច់ (Khmer Touch) ដោយគ្រឿងផ្សំចម្បងត្រូវបានសម្រិតសម្រាំងពីផលិតផលគ្រួសារឈូក។
ចាប់ពីមើមឈូក ក្រអៅឈូករហូតដល់ស្រទាប់ផ្កា លម្អង-ឈូក និងគ្រាប់ឈូក បានប្រែក្លាយជាគ្រឿងផ្សំគ្រួសារឈូកនៅក្នុងចានម្ហូបញាំក្រអៅ ដែលត្រូវបានចាត់ទុកជាគុណប្រយោជន៍ចំពោះសុខភាពដល់អ្នកទទួលទាន។
លោក កែវ វុទ្ធី ជាមេចុងភៅមានបទពិសោធជាង ២០ ឆ្នាំ បានប្រាប់ថា៖ «គ្រឿងផ្សំចម្បងក្នុងចានអាហារញាំនេះ អាចជំនួយដល់សុខភាពអ្នកទទួលទាន ដូចជា ការកាត់បន្ថយជាតិខ្លាញ់ និងជាតិពុលចេញពីរាងកាយ»។
ញាំក្រអៅឈូក ជាឈ្មោះម្ហូបត្រជាក់ដ៏សាមញ្ញបំផុត តែបើក្រឡេកមើលការរចនាលើចានវិញ វាបានឆ្លុះបញ្ចាំងពីការយកចិត្ដទុកដាក់ និងផ្ចិតផ្ចង់បំផុតរបស់មេចុងភៅ។
មើមឈូក ក្រអៅឈូក ស្រទាប់ផ្កា លម្អងឈូក និងគ្រាប់ឈូក ស្ថិតក្នុងចានម្ហូបតែមួយ។ហុង មិនា
មើមឈូកបំពងក្រៀម អមផ្កាឈូកមួយស្រទាប់ទ្របង្គា និងបន្ថែមល្បោយកម្ទេចលម្អងផ្កាឈូកឈរជ្រែងជា ៤ ទិស អមកំពូលប្រាសាទដែលហ៊ុមព័ទ្ធដោយចំណិតត្រសក់ ក្រអៅឈូក គ្រាប់ឈូក ជីរ លម្អងឈូក បង្គា និងគ្រឿងផ្សំរសជាតិជាច្រើនទៀត។
ញាំក្រអៅឈូកមានគ្រឿងផ្សំចម្បងពីសែស្រឡាយឈូក ដូចជា ក្រអៅឈូក មើមឈូក ស្រទាប់ផ្កាឈូក លម្អងឈូក និងគ្រាប់ឈូក ជាមួយសណ្ដែកដី និងគ្រឿងសមុទ្រ។ គ្រឿងផ្សំរសជាតិទឹកជ្រលក់ រួមមាន អំបិល ទឹកត្រី ម្ទេសប្លោក ក្រូចឆ្មារ ខ្ទឹមស ខ្ទឹមក្រហម ម្ទេសដៃនាង និងស្ករស ខណៈភោជនីយដ្ឋានខ្មែរមួយនេះមិនប្រើប៊ីចេង និងម្សៅស៊ុបឡើយ។
លោក កែវ វុទ្ធី រៀបរាប់អំពីវិធីញាំក្រអៅឈូក ជាម្ហូបប្រចាំហាងនេះថា៖ «កិន ឬបុកខ្ទឹមស ខ្ទឹមក្រហម ជាមួយគ្រឿងផ្សំរសជាតិទាំងអស់ បន្ថែមទឹកក្ដៅឧណ្ហៗ និងកូរឲ្យរលាយ ដោយរោយស្ករសតិច។ បើរសជាតិល្មមហើយ រួចយកមកញាំជាមួយគ្រឿងផ្សំសែស្រឡាយឈូក និងគ្រឿងសមុទ្រ»។
មុខម្ហូបញាំក្រអៅឈូកបែបខ្មែរ តែការរចនាបែបមុខម្ហូបបស្ចិមប្រទេសដ៏ល្អប្រណីតនេះ មានតម្លៃ ២៤ ០០០ រៀល ឬ ៦ ដុល្លារក្នុង ១ ចាន។
ភោជនីយដ្ឋាន ខ្មែរថាច់ ស្ថិតនៅលើវិថីស៊ីវុត្ថា តំបន់បរិវេណផ្សារចាស់ ក្នុងទឹកដីសៀមរាបឬ ទាក់ទងតាមទូរស័ព្ទលេខ ០៦៣ ៧៦ ៥៦ ៨៩៕
