ក្រុងអុកលែន: កាលពីខែកុម្ភៈ មេចុងភៅខ្មែរដ៏ចំណាន យុន នីត បានបើកភោជនីយដ្ឋានថ្មីមួយឈ្មោះ «ញ៉ាំបាយ» ឬ Nyum Bai នៅសង្កាត់ Fruitvale ក្រុងអុកលែន រដ្ឋកាលីហ្វរនីញ៉ា សហរដ្ឋអាមេរិក លក់មុខម្ហូបខ្មែរដោយយកលំនាំតាមតូបអាហារចិញ្ចើមផ្លូវក្នុងក្រុងភ្នំពេញ និងរំលេចរចនាប័ទ្មតុបតែង និងតន្ដ្រីទសវត្សរ៍ឆ្នាំ១៩៦០។
ក្នុងខែកក្កដានេះ អ្នកស្រី នីត ត្រូវបានផ្ដល់ងារជាមេចុងភៅល្បី ដោយកាសែត San Francisco Chronicle និងជាម្ចាស់លាភីម្នាក់នៃ Eater’s Young Guns ឆ្នាំ២០១៨។ ថ្មីៗនេះ «ញ៉ាំបាយ» អាសយដ្ឋាន3340 E. 12th St., Ste 11, Oakland ទទួលបានចំណាប់អារម្មណ៍ខ្លាំងពេលភោជនីយដ្ឋានខ្មែរនេះជាប់លេខ ៥ Bon Appetit’s Hot Ten, America’s Best New Restaurants 2018។
អ្នកស្រី យុន នីត ប្រសូតក្នុងជំរំជនភៀសខ្លួននៅប្រទេសថៃ ពេលឪពុកម្ដាយរស់គេចពីសង្គ្រាមខ្មែរក្រហម។ ក្រុមគ្រួសារមានសាច់ញាតិ ៥ នាក់ បានមករស់នៅក្នុងអាផាតមិនតូចមួយក្នុងក្រុងស្ដុកតុន រដ្ឋកាលីហ្វរនីញ៉ា ជាប្លុកសម្បូរប្រជាជនដើមកំណើតខ្មែររស់នៅច្រើនបំផុតមួយ។
បីដាច់ដោយអ្នកម្ដាយធ្វើការក្នុងផ្ទះបាយ ធុំតែក្លិនស្លឹកគ្រៃចិញ្ច្រាំ ក្រោយមក អ្នកស្រីមានបំណងវិលមកកាន់កម្ពុជា ដើម្បីរៀនមុខម្ហូបខ្មែរ។ ក្នុងឆ្នាំ២០១២ ខណៈកំពុងហុតទឹកស៊ុបគុយទាវពីហាងលើចិញ្ចើមផ្លូវក្នុងក្រុងភ្នំពេញ អ្នកស្រីបានរកឃើញកន្លែងគាប់ចិត្ដហើយ។
«ញ៉ាំបាយ» រចនាធំទូលាយ និងភ្លឺច្បាស់ តុបន្ទះក្ដា ជញ្ជាំងខៀវផ្ទៃមេឃ និងក្រដាសបិតពណ៌ផ្កាឈូក។ នៅលើជញ្ជាំង មានរូបភាពនិម្មិតរូបអង្គរវត្ដ ផ្សារធំថ្មី តារាចម្រៀងជើងចាស់ អ្នកស្រី ប៉ែន រ៉ន និងលោក ស៊ីន ស៊ីសមុត។ សំឡេងតន្ដ្រីឮរំងំក៏បង្ហាញពីប្រភេទតន្ដ្រីរ៉ុករ៉ូលទសវត្សរ៍ទី ៦០។
អាម៉ុកត្រី ចំហុយជាមួយខ្ទិះដូងលើស្លឹកចេក ខ ពោះជ្រូក និងតៅហ៊ូចៀន និងញាំត្រយូងចេកជាមួយស្ពៃក្ដោប និងជីក្រហម ទឹកជ្រលក់ទឹកត្រីផ្អែម។
យ៉ាងណាមិញ ភោជនីយដ្ឋានក្នុងសង្កាត់ Fruitvale នេះលក់ម្ហូបអាហារខ្មែរក្នុងតម្លៃថោកសមរម្យ ដោយអ្នកស្រី នីត ផ្ដោតសំខាន់លើការទាក់ទាញភ្ញៀវជាចម្បង។ តម្លៃមុខម្ហូបថ្លៃបំផុតត្រឹមតែ ១៥,៩៥ ដុល្លារ ជាប្រភេទការីខ្ទិះដូង និងក្រវាញ ជាមួយឆ្អឹងជំនី។
អ្នកស្រីបានចំណាយពេលមួយឆ្នាំដើម្បីកែកុនរូបមន្ដគុយទាវអ្នកម្ដាយ មុនពេលដាក់លក់ជាលើកដំបូងនៅសាន់ហ្វ្រាន់ស៊ីស្កូក្នុងឆ្នាំ២០១៤។ ក្រោយមក អ្នកស្រីបានរើតូបទៅលក់នៅផ្សារ Public Market ក្នុងក្រុង Emeryville។
ពេលនេះ នៅភោជនីយដ្ឋាន «ញ៉ាំបាយ» គុយទាវភ្នំពេញ ផ្សំពីបង្គារក្រៀម និងសាច់ជ្រូកចញ្ច្រាំ ស្រោចទឹកស៊ុបរម្ងាស់ ៧ ម៉ោង គឺជាមុខម្ហូបពេញនិយមបំផុតនៅ «ញ៉ាំបាយ»៕ HR
ប្រភព www.berkeleyside.com