The Phnom Penh Post Search

Search form




Logo of Phnom Penh Post newspaper Phnom Penh Post - ញ៉ាំ​បាយ​ អាម៉ុក​ត្រី​ដូង​ខ្ចី​ គយ​គន់​ទេស​ភាព​ទី​ក្រុង​




ញ៉ាំ​បាយ​ អាម៉ុក​ត្រី​ដូង​ខ្ចី​ គយ​គន់​ទេស​ភាព​ទី​ក្រុង​

Content image - Phnom Penh Post
ម្ហូប​អាម៉ុក​ត្រី​ដូង​ខ្ចី​នៅ​សណ្ឋាគារ Aquarius។ ឈឹម ស្រីនាង

ញ៉ាំ​បាយ​ អាម៉ុក​ត្រី​ដូង​ខ្ចី​ គយ​គន់​ទេស​ភាព​ទី​ក្រុង​

ភ្នំពេញ: ស្ថិត​នៅ​លើ​កំពូល​អគារ​ដ៏​ស្កឹម​ស្កៃ អាង​កញ្ចក់​ដ៏ថ្លា​ឆ្វង់​ចាំង​ឆ្លុះ​កាយវិការ​អ្នក​ហែល​ទឹកយ៉ាង​ល្វតល្វន់​ ដែល​នេះជា​ទស្សនីយ​ភាព​ពុំធ្លាប់​មាន​ឡើយ​នៅ​ភ្នំពេញ។

អាង​ហែល​ទឹក​មាន​ជញ្ជាំង​កញ្ចក់​រំលេច​ទឹក​ពណ៌​ខៀវ​ហ៊ុមព័ទ្ធ​រុក្ខជាតិ​ បៃតង បន្ទប់​គេង​ទំនើប​លម្អ​ដោយ​ឃ្លា​អក្សរ​ខ្មែរដ៏​កក់ក្ដៅ រសជាតិ​អាហារ និងស្រា​ក្រឡុក​ដ៏ឆ្ងាញ់​ បាន​ធ្វើឲ្យ​សណ្ឋាគារ​ Aquarius Hotel & Urban Resort ដែល​ទើបតែ​បើកថ្មី​ថ្មោង​ ស័ក្ដិសម​ជាទី​លម្ហែ​កាយ​រំសាយ​អារម្មណ៍​តានតឹង។

នៅ​ខាង​លិច​ព្រះបរម​រាជវាំង អគារ​ពណ៌​ត្នោត​ផុស​ខ្ពស់​មើល​ទៅ​គួរឲ្យ​ទាក់​ភ្នែក​មែន​ទែន។សណ្ឋាគារ​នេះ​ក៏មាន​ភោជ​នីយដ្ឋាន​បម្រើ​អាហារ​ខ្មែរ អាស៊ី អឺរ៉ុប និង Skybar នៅលើ​ដំបូល ដែល​អាចឲ្យ​ភ្ញៀវ​គយគន់​ទេសភាព​រាជធានី​ភ្នំពេញ​ផង​ដែរ។

សម្រាប់​ម្ហូប​អត្ត​សញ្ញាណ​ជាតិ ភោជនីយ​ដ្ឋាន នៅលើ​សណ្ឋាគារ​​ដែល​មាន​ម្ចាស់​ជាជន​ជាតិ​កូរ៉េ​មួយ​នេះ​ ក៏មាន​បម្រើ​អាម៉ុក​ត្រីដូង​ខ្ចី​អាហារ​ប្រចាំ​ដែន​ដី​សុវណ្ណ​ភូមិ។​

ក្រៅពី​បង្ហាញនូវ​សោភណ​ភាព​ស្រស់​ស្អាត រសជាតិ​របស់​អាម៉ុក​ត្រីដូង​ខ្ចីនេះ​ក៏​ឆ្ងាញ់​ណាស់​ដែរ។អ្វី​ពិសេស​នោះ​គឺភ្ញៀវ​អាច​ញ៉ាំ​អាហារ​បណ្ដើរ សម្លឹង​មើល​ទេសភាព​ទីក្រុង​ទាំងមូល​ពី​អគារ​ដែល​ស្ថិត​នៅ​កៀក​នឹងវិមាន​ឯករាជ្យ​។

ទេស​ភាព​រាត្រី​ពេល​អាង​កញ្ចក់ និង​រុក្ខជាតិ​ត្រូវ​បាន​បំភ្លឺ​ដោយ​អំពូល​ភ្លើង​អគ្គិសនី រឹតតែ​ជា​បរិយាកាស​ដ៏រ៉ូមេន​ទិក​សម្រាប់​ទទួល​ទាន​ជាមួយ​មនុស្ស​ជាទី​ស្រឡាញ់៕

អត្ថបទគួរចាប់អារម្មណ៍