The Phnom Penh Post Search

Search form




Logo of Phnom Penh Post newspaper Phnom Penh Post - ញ៉ាំ​អាហារ​នែប​និត្យ​ ហ្វូង​មេ​អំបៅ ​ឯ​ភោជ​នីយ​ដ្ឋាន​នៅ​សៀម​រាប




ញ៉ាំ​អាហារ​នែប​និត្យ​ ហ្វូង​មេ​អំបៅ ​ឯ​ភោជ​នីយ​ដ្ឋាន​នៅ​សៀម​រាប

Content image - Phnom Penh Post
ហ្វូង​មេអំបៅ​ហោះ​ហើរ​ឆ្វែល​ឆ្វាត់​នៅ​ក្នុង​សួនច្បារ​នៃ​ភោជនីយ​ដ្ឋាន សួនមេ​អំបៅ នៅ​ទឹកដី​ខេត្ដ​សៀមរាប​។ ឈឹម ស្រីនាង

ញ៉ាំ​អាហារ​នែប​និត្យ​ ហ្វូង​មេ​អំបៅ ​ឯ​ភោជ​នីយ​ដ្ឋាន​នៅ​សៀម​រាប

ខេត្តសៀមរាប: ហ៊ុមព័​ទ្ធដោយ​សំណាញ់​បៃតង ភោជ​នីយ​ដ្ឋាន​សួន​មេអំបៅ សម្បូរ​ផ្កាចម្រុះ​ពណ៌ ធ្វើ​ឲ្យអ្នក​មាន​អារម្មណ៍​បី​ដូចជា​កំពុង​ដើរក្នុង​សួន​ច្បារ មាន​ហ្វូង​មេអំបៅ​ហើរ​ឆ្វែល​ឆ្វាត់​ទំលើ​ខ្លួន​មនុស្ស​ឥត​ខ្លាច​ក្រែង។

បើក​ដំណើរ​ការ​តាំងពី​ឆ្នាំ ២០០៦ ​ហាង​នេះ​ដើម​ឡើយ​ជា​គំនិត​របស់​ជន​បរទេស​ម្នាក់​ មុននឹង​ក្លាយ​ជា​កម្មសិទ្ធិ​របស់​ម្ចាស់​ហាង​ខ្មែរ។

លោក ឌុក​ ដេត វ័យ ៣០ ឆ្នាំ​ជា​ចុងភៅ​ចំណាន​ និង​ជាម្ចាស់​ហាង​បាន​រៀបរាប់​ទាំងអឹ​មអៀន​ថា៖ «មុន​ដំបូង​ខ្ញុំ​គ្រាន់តែ​ជា​ចុងភៅ​ធម្មតា​ម្នាក់ និងជា​អ្នក​មើល​ការ​ខុស​ត្រូវ​នៅក្នុង​ហាង​នេះ​ប៉ុណ្ណោះ បន្ទាប់​ពីធ្វើការ​បាន​ជាង ១០ ឆ្នាំមក ខ្ញុំចេះ​ច្រើន​ទាំង​ផ្នែក​ធ្វើម្ហូប​ និង​ជំនាញ​គ្រប់គ្រង​ហាង។ ចៃដន្យ​អីចៅ​ហ្វាយ​ខ្ញុំគាត់​ត្រលប់​ទៅ​ស្រុក​វិញខ្ញុំ​ក៏សេង​ហាង​គាត់​យកមក​គ្រប់គ្រង​ដោយ​ខ្លួនឯង​ផ្ទាល់ ដោយ​ប្រមែ​ប្រមូល​លុយ​សន្សំ និងខ្ចី​បងប្អូន​ខ្លះ​ទើប​ខ្ញុំអាច​សម្រេច​បំណង​ធ្វើជា​ម្ចាស់​ហាង​នេះ​បាន»។

Content image - Phnom Penh Post
ឈុត​គោ​ឡើង​ភ្នំ​មាន​បម្រើ​នៅ​ភោជនីយ​ដ្ឋាន សួន​មេអំបៅ​។ ឈឹម ស្រីនាង

សួន​មេអំបៅ​តាំងពី​បើក​ភ្លាម​សម្បូរ​តែភ្ញៀវ​ជនជាតិ​បរទេស​ប៉ុណ្ណោះ​ តែ​លោក ឌុក ដេត បាន​ព្យាយាម​កែប្រែ ដើម្បី​ទាក់ទាញ​ភ្ញៀវ​ខ្មែរ​ឲ្យ​ច្រើន។

លោក​និយាយ​ថា៖ «បច្ចុប្បន្ន​នេះ​ខ្ញុំមាន​ភ្ញៀវ​ខ្មែរ​គាត់​ស្គាល់​ហាង​នេះ បាន​ច្រើន ពីព្រោះ​ហាង​របស់​យើង​ក៏​ស្វាគមន៍​ភ្ញៀវ​ខ្មែរ​ដែរ ដោយ​យើងមាន​ម្ហូប​ខ្មែរ​ជាច្រើន​មុខ ដូចជា អា​ម៉ុក ប្រហុក​ខ្ទិះសាច់​គោ​ចិញ្ច្រាំ គោ​ឡើង​ភ្នំ ការី គ្រឿង​សមុទ្រ​អាំង បាយ​ឆា ម្ហូប​ខ្មែរ អឺ​រ៉ុប​ជា​ច្រើន​មុខ»។

ភ្ញៀវ​អាច​អង្គុយ​ញ៉ាំ​បណ្តើរ​មើល​មេអំបៅ​បណ្តើរ ជាមួយ​ខ្យល់​អាកាស​​ត្រជាក់​ស្រួល មាន​ផា​សុកភាព បែប​ធម្មជាតិ។ ប៉ុន្តែ​មេអំបៅ​ក្នុងហាង មិន​កកើត​ដោយ​ឯក​ឯង​ទេ គឺ​លោក​បាន​ទិញពី​គ្រួសារ​អ្នកស្រុក​ក្រីក្រ​អាស្រ័យ​ចំណូល​ពីការ​ចាប់​មេអំ​បៅ​ព្រៃ​ យក​មក​លែង​ក្នុង​ហាង​រាល់ថ្ងៃ។

Content image - Phnom Penh Post
ភោជនីយ​ដ្ឋាន​មាន​ខ្យល់​អាកាស​ត្រជាក់​ស្រួល​។ ឈឹម ស្រីនាង

លោក ឌុក​ ដេត បាន​បន្តទៀត​ថា៖ «មេអំបៅ​ដែលមាន​នៅក្នុង​ហាង​នេះ​គឺ​ខ្ញុំបាន​ជួយ​ទិញពី​គ្រួសារ​អ្នក​ស្រុក​គាត់​ដើរ​ចាប់​តាម​ព្រៃ ដោយ​ក្នុង​មួយថ្ងៃ​គឺ​ទិញពី​គាត់ ២ កន្ត្រក​ក្នុង​មួយ​កន្ត្រក​តម្លៃ ២០០០០ រៀល។ មេអំបៅ​សម្បូរ​ក្នុងខែ​ភ្លៀង។

ភ្ញៀវ​អាច​មើល​ឃើញ​មេអំបៅ​ច្រើន​ហោះ​ពេញ​ហាង ខ្លះ​ហោះមក​ទំលើ​យើង​ក៏មាន​ដែរ»។

ក្រៅពី​សម្រួល​ជីវភាព​មួយ​ផ្នែក​តូច​ដល់​គ្រួសារ​ក្រីក្រ ម្ចាស់ហាង​រូបនេះ​តែង​បរិច្ចាគ ១០ ភាគរយ​នៃ​ចំណូល​ហាង ទៅ​ជួយខាង​មន្ទី​រពេទ្យ​កុមារ​អង្គរ ភូមិ​សុវណ្ណ​កុមារ និង​អង្គការ​នានា។

ភោជ​នីយដ្ឋាន​សួន​មេអំបៅ​ ស្ថិត​នៅ​ផ្លូវ​លេខ ២៥ ចន្លោះ​ស្ទឹង​សៀមរាប​ និង​ផ្លូវវត្ត​បូព៌ ទូរស័ព្ទ​លេខ ០១២ ៣៧១ ៣៣០៕

អត្ថបទគួរចាប់អារម្មណ៍