ភ្នំពេញ: ការទទួលទានអាហារបែបអឺរ៉ុបតាមសណ្ឋាគារ និងភោជនីយដ្ឋានប្រណីត ជាទូទៅ តែងតែមានអ្នកលើកអាហារ និងបុគ្គលិកឈររង់ចាំផ្ដល់សេវាគ្រប់ពេលវេលា ក្នុងបរិយាកាសអមដោយស្នូរតន្ត្រី តិចៗកំដរអារម្មណ៍។
ដោយឡែក ថ្មីៗនេះ សណ្ឋាគារ Raffles Hotel Le Royal បានរៀបចំកម្មវិធីអាហារពេលថ្ងៃ និងយប់ដែរមានឈ្មោះថា La Table Du Chef Gout de France ជាការទទួលទាននៅក្នុងផ្ទះបាយរបស់សណ្ឋាគារតែម្តង។
កញ្ញា Vanessa Han cluster អ្នកគ្រប់គ្រងផ្នែកទំនាក់ទំនងទីផ្សារ នៃសណ្ឋាគារ Raffles Hotel Le Royal បាននិយាយថា៖ «ខាងប្រធានផ្នែកម្ហូបអាហារក្នុងសណ្ឋាគារ Raffles Hotel Le Royal ចង់បង្កើតអ្វីដែលថ្មី មិនធ្លាប់មាននៅប្រទេសកម្ពុជា។ សម្រាប់ការញ៉ាំអាហារនៅក្នុងផ្ទះបាយបែបនេះគឺនៅប្រទេសអឺរ៉ុបគេចូលចិត្តខ្លាំងណាស់ ទើបខាងយើងយកមកបង្ហាញជូន»។
ការទទួលទានអាហារនៅក្នុងចង្ក្រានបាយផ្ទាល់បែបនេះ ហាក់បីដូចជាប្លែកសម្រាប់ប្រជាជនខ្មែរ ដោយ កញ្ញា Vanessa បានលើកឡើងថា៖ «ការញ៉ាំអាហារនៅក្នុងផ្ទះបាយរបស់សណ្ឋាគារបែបនេះ គឺចង់បង្ហាញពីរបៀបធ្វើម្ហូបរបស់ចុងភៅចំណានប្រចាំសណ្ឋាគារ និងអនាម័យ ហើយចង់ឲ្យភ្ញៀវមានអារម្មណ៍ប្លែក ដោយញ៉ាំបណ្តើរ អាចមើលការចម្អិនផ្ទាល់ពីចុងភៅតែម្តង»។
ចំពោះភ្ញៀវដែលចង់ភ្លក្សបទពិសោធទទួលទានអាហារក្នុងផ្ទះបាយបែបនេះ គឺអាចធ្វើការកក់ជាមុន ដោយសារតែចំនួនមានកំណត់។ ក្នុងមួយតុសម្រាប់ការទទួលទានបានគ្នា ២ នាក់ តម្លៃពី ២៩០ ដុល្លារ ឡើងទៅ។
កម្មវិធីនេះចាប់ពីថ្ងៃនេះរហូតដល់ថ្ងៃទី ២១ មីនា ទាក់ទងតាមទូរស័ព្ទ ០២៣ ៩៨១ ៨៨៨៕