ភ្នំពេញ : នៅពេលនិយាយដល់ «បាញ់កាញ់» យើងតែងតែនឹកដល់នំម្សៅអង្កររាងសំប៉ែតបួនជ្រុងប៉ុនបាតដៃ ដែលគេនិយមទទួលទានជាមួយទឹកស៊ុប ឬចម្អិនលាយជាមួយលត ឬបបរអង្ករជាដើម។
ដោយឡែក «បាញ់កាញ់» វៀតណាមមានរាងរៅខុសពីបាញ់កាញ់ទូទៅដែលលក់នៅប្រទេសកម្ពុជា។ បាញ់កាញ់វៀតណាមមានរាងជាសរសៃធំវែងៗស្រដៀងនឹងសរសៃបាញ់ស្រ៊ុងដែរ ប៉ុន្តែវាមានពណ៌សថ្លា និងមានភាពស្វិតស្រដៀងនឹងមីសួដែរ។
បាញ់កាញ់វៀតណាម ត្រូវបានគេចម្អិនជាមួយទឹកស៊ុបនិងបរិភោគជាមួយសាច់ជើងជ្រូក ប្រហិត សាច់មាន់ ឬគ្រឿងសមុទ្រតាមការនិយម។
នៅភ្នំពេញ យើងក៏អាចស្វែងរកញ៉ាំបាញ់កាញ់វៀតណាមនេះបានដែរ។ សូមសាកល្បងទៅវិថីឧកញ៉ានូកន ដែលជាបណ្ដុំសមាគមប្រជាជនវៀតណាម និងជាកន្លែងសម្បូរអាហារវៀតណាមលក់យ៉ាងព្រោងព្រាត។ នៅជាប់ហាងអ៊ុតសក់ចន្ធូ និងទល់មុខមន្ទីរពេទ្យ ២១៥ មានតូបលក់បាញ់កាញ់និងនំបញ្ចុកវៀតណាមតម្រៀបគ្នា ដែលចាប់ផ្ដើមដំណើរការស្វាគមន៍ភ្ញៀវពីម៉ោង៣រហូតដល់ម៉ោង៩យប់ឯណោះ។
នៅទីនោះយើងអាចសាកល្បងកុម្ម៉ង់បាញ់កាញ់វៀតណាម ដោយមានជម្រើសសាច់ជាច្រើនប្រភេទដូចជា សាច់ជ្រូក ជើងជ្រូក គ្រឿងក្នុងជ្រូក សាច់មាន់ សាច់ទា គ្រឿងក្នុងមាន់ ឬទា ឈាម និងប្រហិតជាដើម។ បាញ់កាញ់វៀតណាមនេះមានដាក់បន្លែសណ្ដែកបណ្ដុះ ត្រកួន និងដើមគូឆាយ ហើយត្រូវបានលក់ក្នុងមួយចានតែ៥ពាន់រៀលប៉ុណ្ណោះ៕
