.jpg)
ភោជនីយដ្ឋាន ឌឹះ ហ្គូលៃ បម្រើមុខម្ហូបគ្រប់ជាតិសាសន៍ដោយផ្ដោតសំខាន់លើប្រភេទហាឡាល់។ រូបថត យូសុះ អាប់ឌុលរ៉ាស់ហ៊ីម
ភ្នំពេញ: តាមបណ្តោយផ្លូវ ១៤៤ ភោជនីយដ្ឋានរចនាឡូហ្គោរូបឆ្នាំងញាត់សំណេរ Gulai (ការី) ផ្ដល់សេវាអាហារចម្រុះជាតិសាសន៍ដែលបែងចែកយ៉ាងច្បាស់តាមប្រភេទនីមួយៗ ដើម្បីផ្ដល់ភាពងាយស្រួលចំពោះអ្នកកាន់សាសនាមូស្លីម។
ចានរាងមូលពណ៌សទ្រាប់ស្លឹកចេកកាត់ជាក្បាច់ផ្កាភ្ញីទ្រាប់បាយសផ្កាប់ចាន និងបន្ដុបស៊ុតចៀនជ័រព្នៅរាងបេះដូង អែបជាប់ជាមួយភ្លៅមាន់ចៀនឡើងក្រហមឆ្អៅគួរឲ្យចង់ពិសាដែលមានទឹកជ្រលក់ហែហម រួមទាំងកូនត្រីបំពងជាមួយសណ្តែកដីលីងផ្ទាប់នឹងចំណិតត្រសក់តម្រៀបគ្នាក្នុងចានតែមួយយ៉ាងស្រស់ស្អាតគួរឲ្យចង់ទទួលទានមួយនេះជាមុខម្ហូបម៉ាឡេស៊ីឈ្មោះថា ណាស៊ី លីម៉ាក។
ភោជនីយដ្ឋានហាឡា ឌឹះ ហ្គូលៃ (The Gulai Halal Restaurant) បើកដំណើរការរយៈពេល ១ ឆ្នាំបម្រើមុខម្ហូបជាច្រើនជាតិសាសន៍រួមទាំង អឺរ៉ុប ឥណ្ឌូនេស៊ី ម៉ាឡេស៊ី សិង្ហបុរី ស្ដ្រីលង្កា ប្រ៊ុយណេ ជប៉ុន ចិន កម្ពុជា និងម្ហូបហាឡាល់សម្រាប់ពលរដ្ឋមូស្លីមពីម៉ោង ៧ ព្រឹកដល់ម៉ោង ៩ យប់។
អ្នកស្រី អាត់ សុវណ្ណារ៉ា ជាម្ចាស់ហាងវ័យ ៤០ ឆ្នាំមកពីខេត្តបាត់ដំបងបានប្រាប់ភ្នំពេញប៉ុស្តិ៍ថា៖ «ម្ហូបហាឡាល់កំពុងពេញនិយមនៅក្នុងស្រុកយើង និងអាចថាមកពីគ្រួសារខ្ញុំ (ប្តី) ជាជនជាតិអ៊ិស្លាម។ អ៊ីចឹងគាត់ក៏ផ្តល់ជាយោបល់ឲ្យខ្ញុំបើកហាងអាហារម៉ាឡេស៊ី។ ខ្ញុំស្ទាក់ស្ទើរក្នុងការបើកហាងនេះ ដោយសារខ្ញុំជាខ្មែរដែលមិនសូវយល់ពីប្រពៃណីនេះ ហើយវាមិនមែនជាម្ហូបខ្មែរទៀត។ ប៉ុន្តែក៏បានទទួលការជ្រោមជ្រែងពីគាត់ ទើបខ្ញុំសម្រេចចិត្តបើកតែម្តងទៅ»។
ភ្ញៀវរីករាយអាហារក្នុងបរិស្ថានភោជនីយដ្ឋានដ៏ផាសុកភាព។ រូប យូសុះ អាប់ឌុលរ៉ាស់ហ៊ីម
ម្ចាស់ហាងអាហារម៉ាឡេស៊ីរូបនេះបញ្ជាក់ថា ឌឹះហ្គូលៃ ទទួលភ្ញៀវពី ៥០ ទៅ ៦០ នាក់ក្នុង ១ ថ្ងៃ។ បើមានភ្ញៀវកក់ជាក្រុមអាចទទួលបានភ្ញៀវចាប់ពី ២០០ ទៅ ៣០០ នាក់ និងមានម្ហូបពិសេសនិយមកុម្ម៉ង់ជាងគេដូចជា Nasi Lemak (៥,២៥ ដុល្លារ) Kampong Fried Rice (៥,២៥ ដុល្លារ) Roti Chanai (១,៦០ ដុល្លារ) Roti Tetur (២,៦០ ដុល្លារ) Roti Sardin (៣,១០ ដុល្លារ) Satay (៥ ដុល្លារ) Fried Mee Malay Style (៥,៧៥ ដុល្លារ) Fried Mamak Style (៥,៧៥ ដុល្លារ), Fried Mee Hoon (៥,៧៥ ដុល្លារ)។
ក្នុងឱកាសនៃរដូវបុណ្យរ៉ាម៉ាដននេះ The Gulai Halal Restaurant ក៏មានទទួលធ្វើអាហារបួស និងស្រាយបួសដែលក្នុងឆ្នាំនេះ រ៉ាម៉ាដនបានចាប់ផ្ដើមពីថ្ងៃទី ៥ ខែឧសភា ដល់ថ្ងៃទី ៤ ខែមិថុនា។
អ្នកស្រី អាត់ សុវណ្ណារ៉ា ជាជនជាតិខ្មែរដែលបើកភោជនីយដ្ឋានអាហារម៉ាឡេស៊ីតាមបំណងរបស់ស្វាមីកាន់សាសនាមូស្លីមលោក អូស្មាន់ អូម៉ា វ័យ ៤៦ ឆ្នាំបន្ដថា៖ «យើងធានា ១០០ ភាគរយថាជាប្រភេទហាឡាល់សូម្បីតែគ្រឿងទេសក៏យើងនាំយកមកពីប្រទេសម៉ាឡេស៊ី និងសិង្ហបុរីព្រោះថាភ្ញៀវមូស្លីមខ្លាចថា ម្ហូបមិនសុទ្ធតាមដែលគាត់ចង់បាន។ បើមិនមានទំនុកចិត្តទេ ពួកគាត់គឺពិតជាមិនទទួលទានដាច់ខាត»។
អ្នកស្រី សុវណ្ណារ៉ា ប្រាប់ថាសម្រាប់ភ្ញៀវខ្មែរក៏អាចមកទទួលទានម្ហូបបែបម៉ាឡេស៊ីដែរ។ ចុងភៅនឹងព្យាយាមកែរសជាតិបន្តិចបន្តួចដើម្បីអាចទទួលយកនូវរសជាតិយ៉ាងឆ្ងាញ់ពិសា។
ឌឹះហ្គូលៃ នៅផ្លូវ ១៤៤ សង្កាត់ផ្សារកណ្តាល ២ ខណ្ឌដូនពេញ ឬទាក់ទងទូរស័ព្ទលេខ ០៨១ ២៦១ ៦០៦៕
វីដេអូ៖
