ភ្នំពេញ: បើទោះជាក្លិនរបស់មើមខ្ទឹមស អាចពិបាកទទួលយកបន្តិចសម្រាប់មនុស្សមួយចំនួន ប៉ុន្តែម្ហូបនេះទទួលបានប្រជាប្រិយភាពខ្លាំង គួបផ្សំនឹងគុណប្រយោជន៍ដ៏ច្រើនពីការទទួលទានខ្ទឹមស បួករួមទាំង សមត្ថភាពជួយបណ្ដេញជាតិពុលពីរាងកាយ។
នៅក្នុងបញ្ជីរាយនាមមុខម្ហូប តាមបណ្ដាភោជនីយដ្ឋានចិននានា នៅរាជធានីភ្នំពេញ អ្វីដែលអ្នកឧស្សាហ៍ឃើញនោះគឺ បង្គាចំហុយខ្ទឹមស ដោយហាងខ្លះលក់តម្លៃម្ហូបដោយថ្លឹងបង្គាគិតជាគីឡូក្រាម និងហាងខ្លះលក់ ១ ចានតម្លៃពី ៧ ទៅ ១៥ ដុល្លារ។
ប្រសិនបើអ្នកមិនសូវចង់ចំណាយប្រាក់ញ៉ាំអាហារខាងក្រៅផ្ទះ អ្នកក៏អាចរៀនធ្វើម្ហូបបង្គាចំហុយខ្ទឹមសជាការបញ្ចេញស្នាដៃឲ្យអ្នកផ្ទះញ៉ាំរួច នឹងលាន់មាត់សរសើរផងដែរ។ ដំណឹងល្អគឺថា គ្រឿងផ្សំម្ហូបនេះមានតិចមុខមែនទែន រីឯវិធីចម្អិនទៀតក៏រឹតតែស្រួល។
អ្នកត្រូវការទឹកខ្ទឹមស ទឹកស៊ុបមាន់ ទឹកស៊ីអ៊ីវ ស្រាចិនសម្រាប់ចម្អិនម្ហូប (បើមាន) អំបិល ខ្ញីចិញ្ច្រាំ ខ្ទឹមសចិញ្ច្រាំ ស្លឹកខ្ទឹមហាន់ខ្លីកង់។ អ្នកត្រូវច្របល់គ្រឿងផ្សំទាំងនេះចូលគ្នា ហើយទុកមួយអន្លើសិន។
បង្គាសមុទ្រត្រូវលាងទឹកឲ្យស្អាត រួចប្រើកាំបិតឆូតខ្នងវាដើម្បីដកយកសរសៃខ្មៅចេញ ដោយរក្សាសម្បក។ បង្គាទាំងនោះត្រូវដាក់តម្រៀបលើថាស ដោយបែរខ្នងវាឡើងលើ។ បន្ទាប់មកស្រូបទឹកគ្រឿងផ្សំ ដែលលាយរួចហើយនោះពីលើបង្គាឲ្យជោកជាំ។ បង្គាត្រូវចំហុយប្រមាណពី ៣ ទៅ ៥ នាទី អាស្រ័យលើទំហំវា។ ក្រោយពីឆ្អិនរួចរាល់ អ្នកអាចយកថាសបង្គាចេញ រួចរោយស្លឹកខ្ទឹមបន្ថែមជាការស្រេច។
រូបមន្តតាមផ្ទះនីមួយៗអាចមានលក្ខណៈខុសគ្នា ដោយខ្លះមានទ្រាប់មីសួនៅចានចំហុយបង្គា ខ្លះបន្ថែមស្លឹកគូឆាយ ឬផ្កាគូឆាយ ហើយខ្លះទៀតរោយម្ទេសឡើងក្រហមឆ្អិនឆ្អៅ តាមចំណង់ចំណូលចិត្ត៕