ភ្នំពេញ: ហាង 123 Pig ដែលល្បីលក់សង្វាក់ដាក់ឆ្នៀង ចង្អេរ មីស៊ុបឈាម និងម្ហូបឆ្ងាញ់ៗជាច្រើនមុខទៀត បានបន្ថែមនូវស៊ុបបបែលជាមួយខ្យងប៉ារ៉ា មើលទៅគួរឲ្យចង់ញ៉ាំ។
ចំណែកឯកន្លែងអង្គុយវិញគឺមានផាសុកភាព ហើយមានអារម្មណ៍ថាដូចជាកំពុងអង្គុយញ៉ាំនៅក្នុងសួនបៃតងមួយអ៊ីចឹង។ នៅពីមុខហាងមានរូបកូនជ្រូកបៃតងកាន់ទឹកតែខៀវ ជាមួយមីគោកឆាបែបខ្មែរ មើលទៅគួរឲ្យចង់ទទួលទានតែម្ដង។
ដោយសារតែការចនាតុបតែងបែបនេះហើយទើបធ្វើឲ្យភ្ញៀវជិះកាត់ហាងនេះម្នាក់ៗតែងតែឆ្ងល់ និងឆៀងចូលមិនដែលរំលង។
ជាមួយតម្លៃថោកសមរម្យមែនទែន ជាចំណុច ដែលទាក់ទាញភ្ញៀវជាពិសេសយុវវ័យនាំគ្នាចូលញ៉ាំពេញៗហាង ដើម្បីភ្លក្សម្ហូបប្លែកៗ និងថតរូបបង្អួតគ្នា។
ចំពោះឈុតស៊ុប បបែលជាមួយនឹងខ្យងប៉ារ៉ានេះគឺអាចញ៉ាំបានគ្នា ២ នាក់ឆ្អែតល្មម។ ស៊ុបនេះគឺយើងញុំាជាមួយ និងត្រយូងចេក ផ្សិតម្ចុល ជីរណារ ជីរនាងវង និងម្អម ហើយអាចថែមម្ទេស និងខ្ទឹមលីងចូលទៅក្នុងទឹកស៊ុបបានទៅតាមចំណង់ចំណូលចិត្ត។ ស៊ុប បបែលនេះគឺយើងញុំាជាមួយ ទឹកម្រេចរឹតតែឆ្ងាញ់ ដោយមួយឈុតមានតម្លៃ ៣០០០០ រៀលប៉ុណ្ណោះ។
ចំណែកឯម្ហូបផ្សេងៗវិញមានតម្លៃចន្លោះពី ៦០០០ ដល់ ១៥០០០ រៀល។ ហាងក៏មានលក់ទឹកម្ជូរព្រឹក និង តែហ្គិចហួយ ជាដើម។
ហាង 123 Pig ស្ថិតនៅផ្លូវ ១២៣ ហួសវិទ្យាល័យទួលទំពូងបន្តិច ទូរស័ព្ទលេខ ០៩២ ២២៦ ៥៩៦៕