សៀមរាប: ក្រោយពីដាក់បម្រើមុខម្ហូបខ្មែរប្រណីតអស់រយៈពេលជាង ៤ ឆ្នាំ ខ្មែរថាច់ ជាភោជនីយដ្ឋានស្ថិតនៅកណ្ដាលក្រុងសៀមរាប បានបន្ថែមមុខម្ហូបបរទេសប្លែកៗជាច្រើនដើម្បីផ្គាប់ចិត្ដភ្ញៀវគ្រប់ប្រភេទតាមចំណង់ចំណូលចិត្ដ។
ថ្ងៃនេះ មេចុងភៅមានបទពិសោធជាង ២០ ឆ្នាំ ពីភោជនីយដ្ឋាន ខ្មែរថាច់ បានណែនាំមុខម្ហូបត្រីឆ្ពង់ស៊ុបក្រែម ឬ Sea bass Cream Soup មកបង្ហាញជូនមិត្ដអ្នកអានភ្នំពេញប៉ុស្ដិ៍ សប្ដាហ៍នេះ។
លោក កែវ វុទ្ធី មេចុងភៅប្រចាំភោជនីយដ្ឋាន ខ្មែរថាច់ បានប្រាប់ពីគ្រឿងផ្សំត្រីឆ្ពង់បណ្ដែតខ្លួនលើស៊ុបបន្លែបៃតងថា ត្រីឆ្ពង់ ផ្កាខាត់ណាពណ៌ស ផ្កាខាត់ណាខៀវ ឬប្រូខូលី សណ្ដែកខៀវ និងការ៉ុត។
លោក វុទ្ធី បាននិយាយត្រួសៗពីវិធីចម្អិនថា៖ «យើងយកបន្លែទាំងនេះកិនវាឲ្យហ្មត់ល្អ រួចសម្រិតយកទឹកកាកមកធ្វើជាទឹកស៊ុប រោយអំបិល និងម្រេចបន្ដិចចូលក្នុងស៊ុប រួចយកទៅរម្ងាស់ឲ្យពុះ។ បន្ទាប់មកដាក់សាច់ត្រីឆ្ពង់ចូលរហូតដល់ឆ្អិនល្អ»។
មេចុងភៅ ដែលបង្កើតសោភណភាពម្ហូបបែបប្រណីតរូបនេះបន្ដថា៖ «ពេលលើកជូនភ្ញៀវយើងត្រូវដាក់ស៊ុប ចំណិតត្រី ដាក់ផ្កាខាត់ណា និងប្រូខូលីចិញ្ច្រាំល្អិត ដើម្បីលម្អក្នុងទឹកស៊ុប រួចបន្ថែមក្រែមបន្ដិចបន្ដួចជាគ្រឿងលម្អ»។
ត្រីឆ្ពង់បណ្ដែតខ្លួន លើស៊ុបបន្លែបៃតងមុខម្ហូបបស្ចិមប្រទេសដ៏ល្អប្រណីតនេះ មានតម្លៃ ៣២ ០០០ រៀល (៨ ដុល្លារ) ក្នុង ១ ចាន។
ភ្ញៀវដែលចង់ភ្លក្សត្រីឆ្ពង់ស៊ុបក្រែមភោជនីយដ្ឋាន ខ្មែរថាច់ ស្ថិតនៅលើវិថីស៊ីវុត្ថា តំបន់បរិវេណផ្សារចាស់ ក្នុងទឹកដីសៀមរាបឬ ទាក់ទងតាមទូរស័ព្ទលេខ ០៦៣ ៧៦ ៥៦ ៨៩៕