.jpg)
ត្រីដុតផ្ទាប់នំបញ្ចុក និងសម្បកណែមជ្រលក់ទឹកត្រីអម្ពិលទុំ។ ផា លីណា
សៀមរាប: រមណីយដ្ឋានរំលេចទេសភាពបែបស្រុកស្រែ ក្យូសប្របប្រឡាយទឹក ស្រះត្រី សួនបន្លែ សួន ផ្កា វាលស្រែ ឆ្លុះភ្នំក្រោម អន្ទងចិត្ដភ្ញៀវដែលប្រាថ្នាការសម្រាកលម្ហែ និងស្រូបខ្យល់អាកាសក្រោមជំនោរត្រជាក់ត្រសៀក ជាពិសេស ការភ្លក្សរសជាតិមុខម្ហូបបែបស្រុកស្រែចម្ការ។
ភូមិស្លា ដែលជ្រើសរើស និងគាំទ្របន្លែ សាច់ពីប្រជាកសិករសហគមន៍ក្នុងស្រុក ព្រមទាំងផ្ដល់សុវត្ថិភាពចំណីអាហារចំពោះអតិថិជនមកកម្សាន្ដនៅរមណីយដ្ឋានមួយនេះ បានណែនាំមុខម្ហូបត្រីដុតពិសេសផ្ទាប់ទឹកជ្រលក់អម្ពិលទុំ ដែលទទួលបានការគាំទ្រពីអតិថិជនយ៉ាងច្រើន ជាពិសេសថ្ងៃចុងសប្ដាហ៍ និងបុណ្យទានផ្សេងៗ។
អ្នកនាង ឌី ចាន់ណា អាយុ ៣៦ ឆ្នាំ មេចុងភៅប្រចាំរមណីយដ្ឋានធម្មជាតិភូមិស្លា បានរៀបរាប់អំពីភាពវិសេសត្រីដុតអម្ពិលទុំថា៖ «យើងធ្វើទឹកត្រីអម្ពិលទុំ ក៏មានលក្ខណៈប្លែកពីគេ។ ឥឡូវនេះ វាមានរសជាតិកាន់តែឆ្ងាញ់ ដែលភ្ញៀវចូលចិត្ដកាន់តែច្រើន។ យើងមានទាំងនំបញ្ចុក យើងមានទាំងសម្បកណែម ដែលអាចឲ្យគាត់ញ៉ាំធម្មតាក៏បាន និងមូរជាមួយណែមញ៉ាំក៏បានដែរ»។
មេចុងភៅរូបនោះ បានបន្ដប្រាប់គ្រឿងផ្សំថា មានត្រីរ៉ស់ ទម្ងន់ពី ៥ ទៅ ៧ ខាំ នំបញ្ចុក សម្បកណែម ត្រសក់ ជី សាលាដ សណ្ដែកបណ្ដុះ ការ៉ុត គល់ស្លឹកគ្រៃ ទឹកត្រីអម្ពិលទុំ ខ្ទឹមក្រហម និងខ្ទឹមស។
ក្យូសលម្ហែសង់ប្របតាមប្រឡាយទឹកដែលផ្ដល់ជំនោរត្រជាក់ត្រសៀកនៅរមណីយដ្ឋានធម្មជាតិភូមិស្លា។ ផា លីណា
អ្នកនាង ចាន់ណា បានរៀបរាប់អំពីវិធីធ្វើត្រួសៗថា មុនដំបូង ហាន់ខ្ទឹមក្រហម និងបំពង ច្របាច់ទឹកអម្ពិល ឆឹងស្ករឆាជាមួយខ្ទឹមបំពង និងចាក់ទឹកអម្ពិលទុំចូល។
អ្នកជំនាញទឹកជ្រលក់ប្រចាំនៅរីសតរមណីយដ្ឋានធម្មជាតិភូមិស្លា បានបន្ថែមថា៖ «អ៊ីចឹង ទឹកអម្ពិលទុំនេះ វាខាប់អន្ដាយៗ ក្នុងទឹកជ្រលក់ ហើយពេលយើងញ៉ាំទៅ វាកាន់តែឈ្ងុយ។ ញាត់គល់ស្លឹកគ្រៃក្នុងពោះត្រី រួចដាក់ដុត»។
មេចុងភៅ ដែលមានទេពកោសល្យបង្កើតគ្រឿងទឹកជ្រលក់ប្លែក រូបមន្ដប្រចាំគ្រួសាររូបនេះ បានបន្ដថា៖ «នៅទីនេះ យើងប្រើសត្វសាច់នៅរស់ៗទាំងអស់ ហើយរបស់សល់ ទាំងត្រី ទាំងមាន់អី យើងអត់ប្រើនោះទេ»។
ត្រីដុតទឹកត្រីអម្ពិលទុំគួបអន្លក់នំបញ្ចុក និងទឹកត្រីពិសេសប្រចាំនៅរមណីយដ្ឋានភូមិស្លា មានតម្លៃ ៣ ម៉ឺនរៀល។
រមណីយដ្ឋានធម្មជាតិភូមិស្លា ស្ថិតក្នុងភូមិកន្ត្រក ឃុំស្វាយដង្គំ មិនឆ្ងាយប៉ុន្មានពីភ្នំក្រោម។ សម្រាប់ព័ត៌មានលម្អិត និងការកក់ក្យូស ព្រមទាំងទីតាំងរមណីយដ្ឋាន ដែលទើបបានបើកសម្ពោធក្ដៅៗនេះអាចទាក់ទងតាមលេខទូរស័ព្ទ ០៧៧ ៩៣០ ០០០៕
