ភ្នំពេញ : ឥឡូវយើងមិនចាំបាច់ជិះយន្តហោះទៅក្រៅប្រទេសដើម្បីទទួលទានអាហារនៅអគារខ្ពស់ៗគយគន់ទេសភាពទីក្រុងដែលពោរពេញដោយសំណង់ស្អេកស្កះប៉ប្រ៉ះនឹងជើងមេឃនោះទេ ព្រោះប្រទេសកម្ពុជាយើងចាប់ផ្ដើមមានអគារខ្ពស់ៗផុសបណ្ដើរៗហើយ ហើយក្នុងចំណោមនោះហាងEclipse Sky Barកំពុងតែទទួលបានការពេញនិយមគួរឲ្យកត់សម្គាល់ពីសំណាក់បណ្ដាយុវវ័យ និងអ្នកធ្វើការការិយាល័យជាដើម។
ក្រៅពីភេសជ្ជៈ និងស្រាក្រឡុក ទីនោះក៏ល្បីថាមានម្ហូបឆ្ងាញ់ៗដែរ ដូចជា សាច់គោឆាក្ដៅ ប៊ីស្ដឹក និងត្រីសាល់ម៉ុនអាំងផងដែរ។ ថ្ងៃនេះភ្នំពេញប៉ុស្ដិ៍នឹងនាំអារម្មណ៍លោកអ្នកទៅភ្លក្សត្រីសាល់ម៉ុនអាំង (Grill Salmon Spinash)ដែលស័ក្ដិសមសម្រាប់ទទួលទានជាអាហារពេលល្ងាចប្រកបដោយផាសុកភាព។
គ្រឿងផ្សំ : ត្រីសាល់ម៉ុន ដំឡូងបារាំង ស្ពៃតឿ ក្រូចឆ្មារទឹកម៉ាយ៉ូណេស អំបិល ប្រេងអូលីវ ម្រេច និងម៉ាស្តាត។
វិធីចម្អិន : ត្រូវយកត្រីសាល់ម៉ុនទៅចៀនឲ្យឆ្អិនល្អ។ ដំឡូងបារាំងត្រូវស្ងោរឲ្យឆ្អិនដើម្បីឲ្យសាច់របស់វាទន់ល្អ។ ស្ពៃតឿត្រូវយកទៅឆាជាមួយប្រេងខ្យង។ ម៉ាយូណេសត្រូវលាយជាមួយនឹងម៉ាស្តាត (Mustard) និងប្រេងអូលីវ ដោយបន្ថែមអំបិលនិងម្រេចម៉ដ្ឋបន្តិចនោះជាការស្រេច។
Eclipse Sky Bar ស្ថិតនៅជាន់ទី២៣ អគារភ្នំពេញថៅវើរ មហាវិថីព្រះមុនីវង្ស។ទូរស័ព្ទលេខ (ចាប់ពីម៉ោង៥ល្ងាចទៅ) ០២៣ ៩៦ ៤១ ៧១ និងអ៊ីមែល bookings@eclipseskybar.com៕
