ភ្នំពេញ : រីករាយឆ្នាំសកល២០១៣! ថ្ងៃនេះខ្ញុំនឹងពាំនាំនូវម្ហូប ត្រីចំហុយមីសួពីហាងកាហ្វេ ហានី។ សូមរីករាយនឹងវិធីចម្អិនដូចខាងក្រោម
គ្រឿងផ្សំរួមមាន :
ត្រីទីឡាប់យ៉ា ៦ ខាំ
ជីរវ៉ាន់ស៊ុយ ១ កូនដុំ
ដើមខ្ទឹម ៣ ដើម
សៀង ១ ស្លាបព្រាបាយ
ទឹកស៊ីអ៊ីវ ២ ស្លាបព្រាកាហ្វេ
ស្ករស ១ ស្លាបព្រាកាហ្វេ
ប៊ីចេង ១/២ ស្លាបព្រាកាហ្វេ
ម្រេចម៉ដ្ឋ ១ ចិប
មើមការ៉ុត ១ ខាំ
មីសួ ១/២ ខាំ
ត្រចៀកកណ្ដុរ ១/២ ខាំ
ផ្សិតខ្មៅ ១/២ ខាំ
ផ្សិតចំបើង ១/២ ខាំ
ខ្ញី ១/២ ខាំ
របៀបរៀបចំគ្រឿងផ្សំ : ត្រីទីឡាប់យ៉ាត្រូវធ្វើឲ្យស្អាត និងវះពោះលាងឲ្យស្អាត។ ការ៉ុតត្រូវចិតសម្បកលាងរួចកាត់ជាកង់ៗហើយពុះជាបួន។ ដើមខ្ទឹមនិងជីរវ៉ាន់ស៊ុយត្រូវលាងឲ្យស្អាត ហើយកាត់ជាកង់ៗ។ ស្លឹកត្រចៀកកណ្ដុរលាងទឹកឲ្យស្អាត ហើយហាន់ស្ដើងៗ។ ផ្សិតខ្មៅ និងផ្សិតចំបើងត្រូវត្រាំទឹកហើយពុះជាពីរ។ ខ្ញីត្រូវចិតសម្បកចេញលាងទឹកឲ្យស្អាត ហើយហាន់ឲ្យល្អិតវែងៗល្មម។ មីសួក៏ត្រូវកាត់ជាកង់ៗល្មម។
របៀបធ្វើ : ដំបូងដាក់ដាំទឹកប្រហែលជាមួយវែកសម្ល។ នៅពេលដែលទឹកពុះ ត្រូវដាក់បន្លែចូល ដូចជាមើមការ៉ុត ស្លឹកត្រចៀកកណ្ដុរ ផ្សិតខ្មៅ ផ្សិតចំបើង និងខ្ញី។ នៅពេលដែលទឹកចាប់ផ្ដើមពុះ ត្រូវដាក់ត្រីមីសួ សៀងទឹកស៊ីអ៊ីវ ស្ករស ប៊ីចេង ម្រេចចូល រួចទុកមួយសន្ទុះ។ បន្ទាប់មកដួសដាក់ចាន ដាក់ស្លឹកខ្ទឹមនិងស្លឹកជីរវ៉ាន់ស៊ុយ រោយពីលើជាការស្រេច។
ហានី កាហ្វេ ស្ថិតនៅលើផ្លូវលេខ ៥១ វិថីប៉ាស្ទ័រ សង្កាត់ចតុមុខ ខណ្ឌដូនពេញ។ ទាក់ទងទូរស័ព្ទ ០១១ ៣៣ ៧៣ ២៧៕
