ភ្នំពេញ: ស្ថិតនៅវិថីលេខ៣៣៥កែង៥៦៦ ក្នុងសង្កាត់បឹងកក់១ ខណ្ឌទួលគោក អាហារដ្ឋានដែលជ្រកក្រោមយីហោថា «ប្រិយមិត្តអង្គរ» មានម៉ូតូនិងរថយន្តចតត្រៀបត្រារាល់ៗល្ងាច។
ភ្ញៀវដែលមកទទួលទាននៅអាហារដ្ឋាននេះអាចជ្រើសរើសអង្គុយនៅខាងក្នុង ឬក៏នៅខាងក្រៅក្រោមម្លប់ឆត្រក្រណាត់ជាទីមនោរម្យផងដែរ។
និយាយពីអាហារវិញ «ប្រិយមិត្តអង្គរ» ជាកន្លែងដែលល្បីព្រោះតែមុខម្ហូបត្រីសាបាក់សៀមរាប។ ដូច្នេះហើយភ្នំពេញប៉ុស្ដិ៍នឹងនាំលោកអ្នកទៅស្វែងយល់ពីវិធីចម្អិនមុខម្ហូបមួយនេះតែម្ដង។
គ្រឿងផ្សំ : ត្រីសាបាក់ ខ្ញី ការ៉ុត ស្ពៃក្ដោប ប៉េងប៉ោះ សាលាដ ម៉ាយូណេស អំបិល ស្ករស ខ្ទឹមស ម្ទេសដៃនាង ទឹកត្រី និងម្សៅស៊ុប ។
វិធីចម្អិន : ត្រីសាបាក់ត្រូវខ្ចប់ក្រដាសអាលុយមីញ៉ូម រួចយកទៅអាំងឲ្យឆ្អិនដើម្បីចៀសវាងការបន្សល់នូវក្លិនឆ្អាប។ រីឯខ្ញីត្រូវយកទៅហាន់ជាសរសៃតូចៗរួចឆាជាមួយប្រេងឆាឲ្យទន់។ ការ៉ុត និងស្ពៃក្ដោបត្រូវហាន់ជាសរសៃតូចៗញុំាជាមួយម៉ាយូណេស។
បន្ទាប់មកទៀតត្រូវធ្វើទឹកត្រីកោះកុងដោយយកខ្ទឹមស បុកជាមួយម្ទេស រួចបន្ថែមស្ករស ប៊ីចេង និងទឹកត្រីចូល។ ដើម្បីឲ្យទឹកត្រីនោះខាប់អន្ធិលយើងត្រូវការដាក់ម្ទេស និងខ្ទឹមសឲ្យច្រើន។
នៅពេលទទួលទាន ត្រីសាបាក់ត្រូវញ៉ាំផ្ទាប់ជាមួយបន្លែម៉ាយ៉ូណេស និងទឹកត្រីកោះកុងក្នុងពេលតែមួយទើបឆ្ងាញ់ពិសា។
អាហារដ្ឋាន ប្រិយមិត្តអង្គរស្ថិតនៅផ្ទះលេខ៦២ ផ្លូវ៣៣៥ កែងផ្លូវ៥៦៦ សង្កាត់បឹងកក់១ ខណ្ឌទួលគោក រាជធានីភ្នំពេញ៕
