The Phnom Penh Post Search

Search form




Logo of Phnom Penh Post newspaper Phnom Penh Post - ទា​អាំង​អំបិលម្ទេស​ចុច​ទឹកជ្រលក់ ៣ មុខ​ពី​រីសត​ធម្មជាតិ​ភូមិ​ស្លា




ទា​អាំង​អំបិលម្ទេស​ចុច​ទឹកជ្រលក់ ៣ មុខ​ពី​រីសត​ធម្មជាតិ​ភូមិ​ស្លា

Content image - Phnom Penh Post
ទា​អាំង​អំបិលម្ទេស និង​ទឹកជ្រលក់ ៣ មុខ​ផ្ទាប់​បន្លែស្រស់​។ ផា លីណា

ទា​អាំង​អំបិលម្ទេស​ចុច​ទឹកជ្រលក់ ៣ មុខ​ពី​រីសត​ធម្មជាតិ​ភូមិ​ស្លា

សៀមរាប: ភូមិ​ស្លា​ជា​ឈ្មោះ​រីសត​បែប​ធម្មជាតិ​ដោយ​រំលេច​នូវ​ទេសភាព​បែប​ស្រុកស្រែ ក្យូស​ប្រប​ប្រឡាយ​ទឹក ស្រះ​ត្រី សួន​បន្លែ សួនផ្កា វាលស្រែ ឆ្លុះ​ភ្នំ​ក្រោម អន្ទង​ចិត្ដ​ភ្ញៀវ​មក​សម្រាកលម្ហែ ស្រូប​ខ្យល់​អាកាស​ជំនោរ​ត្រជាក់​ត្រសៀក ជាពិសេស​ការ​ភ្លក្ស​រសជាតិ​ម្ហូប​បែប​ស្រុកស្រែ​ដែល​ស្ទួយ​ផលិតផល​សហគមន៍​ខ្មែរ​។

ទា​អាំង ផ្ទាប់​បន្លែ​អន្លក់​ចុច​ទឹកជ្រលក់ ៣ ​មុខ​ជា​មុខម្ហូប​ដ៏ពេញនិយម​ប្រចាំ​រីសត គន់​ឆ្លុះ​ដល់​ភ្នំ​ក្រោម​ចម្ងាយ​ប្រមាណ ៧ គីឡូម៉ែត្រ​ពី​ក្រុង​សៀមរាប​ប៉ុណ្ណោះ​។

អ្នកនាង ឌី ចាន់ណា អាយុ ៣៦ ឆ្នាំ មេ​ចុងភៅ​ប្រចាំ​រីសត​ធម្មជាតិ​ភូមិ​ស្លា ប្រាប់​ពី​គ្រឿងផ្សំ​ទាអាំង មាន​ដូចជា ទា អំបិល ម្ទេស ស្ករ ប៊ីចេង អង្ក្រង ប្រហុក ទឹកត្រី និង​ម្ទេស​បៃតង​។

អ្នកនាង ចាន់ណា បាន​ប្រាប់​ថា​៖ «​ដំបូង ច្របល់​អំបិល ម្ទេស ស្ករ ប៊ីចេង និង​គ្រឿងផ្សំ​រសជាតិ​មួយ​ចំនួន​ទៀត [​រូបមន្ដ​វិសេស​ផ្ទាល់ខ្លួន​] ប្រឡាក់​ជាមួយ​នឹង​សាច់​ទា​រួច​ដាក់​អាំង​លើ​រងើក​ធ្យូង​រយៈពេល​ពី ២៥ ទៅ ៣០ នាទី​ដើម្បី​ឲ្យ​ឆ្អិន​ល្អ​»​។

មេចុងភៅ​ដែល​ពូកែ​ច្នៃ​មុខម្ហូប​ខ្មែរ​បែប​ចង់​ឲ្យ​ភ្ញៀវ​ស្រក់​ទឹកមាត់​រូប​នេះ​បាន​បន្ដ​ប្រាប់​ពី​បន្លែ​អន្លក់​ថា វា​មាន​ត្រសក់ ការ៉ុត ជី សាលាដ សណ្ដែកកួរ ប៉េងប៉ោះ និង​ចេក​ខ្ចី​ដែល​ងាយ​រក​ទិញ​ពី​ប្រជាសហគមន៍​។

Content image - Phnom Penh Post
ទិដ្ឋភាព​ក្យូស​ក្បែរ​វាលស្រែ​ជា​ផ្នែក​មួយ​ជ្រុង​នៃ​រីសត​ធម្មជាតិ​ភូមិ​ស្លា​ចម្ងាយ ៧ គីឡូម៉ែត្រ​ពី​ក្រុង​សៀមរាប​។ ផា លីណា

ចំពោះ​ទឹកជ្រលក់​ចំនួន ៣ មុខ ដែល​ផ្គាប់​ចិត្ដ​ភ្ញៀវ​តាម​តម្រូវការ អ្នកនាង ចាន់ណា បាន​និយាយ​ថា​ទឹកជ្រលក់ ៣ មុខ​រួមមាន ប្រហុក​អង្ក្រង ទឹកត្រី​ភូមិ​ស្លា និង​ទឹកត្រី​កោះកុង​។ ទឹកជ្រលក់​ប្រហុក​អង្ក្រង​មាន​គ្រឿងផ្សំ​ចម្បង ដូចជា ប្រហុក អង្ក្រង រំដេងលីង ស្លឹកគ្រៃ ខ្ទឹម ម្ទេស ស្ករ និង​អំបិល​។ លីង​ម្ទេស​បៃតង (​ម្ទេស​ហឹរ​អត់​ទាន់​ទុំ​) ជាមួយ​ខ្ទឹមក្រហម ខ្ទឹមស រួច​បុក យក​អំពិល​ទុំ​ទាំង​គ្រាប់​ដើម្បី​លាយ​ធ្វើ​ទឹកត្រី​។

អ្នកនាង ឌី ចាន់ណា បាន​អះអាង​ពី​ភាព​វិសេស​របស់​អាហារ​នៅ​រីសត​ភូមិ​ស្លា​ថា​៖ «​ទឹកត្រី​ភូមិ​ស្លា ខុស​ទាំង​ពណ៌​សម្បុរ និង​រសជាតិ​ដោយ​ប្លែក​មាត់​ពី​ទឹកត្រី​បុក​ទូទៅ​»​។

ថ្លែង​ពី​ការគាំទ្រ​ដល់​កសិផល​របស់​ប្រជាសហគមន៍ លោក ខាំ សេរីចន្ថា ជំនួយការ​ប្រឹក្សា​យោបល់​ទូទៅ​ប្រចាំ​រមណីយដ្ឋាន​ធម្មជាតិ​ភូមិ​ស្លា​បាន​និយាយ​ថា​៖ «​យើង​ចូលរួម​ចំណែក​បង្កើន​ទីផ្សារ​សហគមន៍​តាមរយៈ​ការប្រើប្រាស់​បន្លែ និង​សាច់​គ្មាន​ជាតិគីមី​ដែល​អាច​ជួយ​ទ្រទ្រង់​ដល់​កសិផល​សហគមន៍ និង​គិតគូរ​ទៅ​ដល់​សុខភាព​ភ្ញៀវ​មក​កម្សាន្ដ​នៅ​ភូមិ​ស្លា​»​។

ទា​អាំង​អំពិលម្ទេស​ផ្ទាប់​បន្លែស្រស់​ចុច​ទឹកជ្រលក់ ៣ មុខ​ប្រចាំ​រមណីយដ្ឋាន​ភូមិ​ស្លា​មាន​តម្លៃ ៦ ​ម៉ឺន​រៀល បូក​បន្ថែម​ឆា​គ្រឿង​ក្នុង​ជាមួយ​ត្រកួន​កំដរ​មាត់​។

រមណីយដ្ឋាន​ធម្មជាតិ​ភូមិ​ស្លា​ស្ថិត​ក្នុង​ភូមិ​កន្ត្រក ឃុំ​ស្វាយដង្គំ មិន​ឆ្ងាយ​ប៉ុន្មាន​ពី​ភ្នំក្រោម​។

សម្រាប់​ព័ត៌មាន​លម្អិត និង​ការ​កក់​ក្យូស​នៅ​រីសត​បែប​ធម្មជាតិ​បៃតង​ដែល​ទើប​បាន​បើក​សម្ពោធ​ក្ដៅៗ​នេះ​អាច​ទាក់ទង​តាម​លេខ​ទូរស័ព្ទ ០៧៧ ៩៣០ ០០០៕

អត្ថបទគួរចាប់អារម្មណ៍