.jpg)
ក្រុងសៀមរាប: កង់រទេះគោ ដែលជាមធ្យោបាយអូសទាញដ៏ពេញនិយមកាលពីសម័យដើមប្រែក្លាយជាគ្រឿងលម្អយ៉ាងស្រស់អែបស្លាកយីហោហាងកាហ្វេកង់រទេះ និងនៅលើជញ្ជាំងបរិវេណខាងក្នុងហាង។ នៅលើជញ្ជាំងផ្ទៃរលោងក្បែរតុតាំងភេសជ្ជៈ គំនូរទឹកខ្មៅរំលេចរូបភាពកំពូលតារាចម្រៀងសំនៀងមាស លោកស៊ីន ស៊ីសាមុត អ្នកស្រី ប៉ែន រ៉ន និងអ្នកស្រី រស់ សេរីសុទ្ធា អមជាមួយឈ្មោះបទចម្រៀងជាភាសាខ្មែរ និងបារាំង។
បើទោះបីជារចនាប័ទ្មហាងទាំងមូលមិនឆ្លុះបញ្ចាំងពីស្ទីលរស់នៅរបស់ប្រជាជនខ្មែរក្នុងសម័យទសវត្សរ៍ ៦០ ឬ ៧០ យ៉ាងណាក៏ដោយក៏ភ្ញៀវនៅតែមានអារម្មណ៍នឹកឃើញនូវរឿងអតីតកាល ហើយអ្វីដែលបានអន្ទងចិត្ដខ្លាំងបំផុតនោះគឺ បទចម្រៀងរបស់កំពូលអធិរាជសំឡេងមាសបង្ហើរសំនៀងរណ្ដំជាប់នឹងត្រចៀក។
ផ្ទៃមុខស្រស់ញញឹម ក្រោមសម្រស់ផាត់មុខ និងតុបតែងសក់បែបនារីទសវត្សរ៍ ៦០ ដើម្បីឲ្យកាន់តែស័ក្ដិសមនឹងរចនាប័ទ្មហាងទាំងមូល នារីរត់តុ ២ នាក់កំពុងមមាញឹកបម្រើសេវាកម្មកាហ្វេ និងម្ហូបអាហារជូនភ្ញៀវ។
ភេសជ្ជៈ និងអាហារមានលក្ខណៈមិនខុសប្លែកពីហាងដទៃឡើយ ចាប់ពីតារាងរាយមុខកាហ្វេតម្លៃ ១,៥០ ទៅ ២,៧៥ ដុល្លារ រហូតដល់ម្ហូបអាហារតម្លៃពី ៨ ០០០ ទៅ ១៤ ០០០ រៀល។
ជាមួយនឹងគំនិតចង់ច្នៃប្រឌិតជាអត្ដសញ្ញាណរបស់ខ្លួន ហាងកាហ្វេកង់រទេះរចនាប័ទ្មទសវត្សរ៍ ៦០ បានចាប់កំណើតឡើងក្នុងខែធ្នូ ឆ្នាំ ២០១៧ បំណងបន្ដអភិរក្សមរតកសិល្បៈសម័យដើមឲ្យកូនខ្មែរជំនាន់ក្រោយបានស្គាល់។
លោក ពៅ ប៊ុនធិក ជាម្ចាស់ និងនាយកគ្រប់គ្រង ហាងកាហ្វេកង់រទេះ និងសណ្ឋាគារ Garden Residence ដែលមានទីតាំងនៅក្បែរផ្សារក្រឡាញ់ ក្រុងសៀមរាប បានប្រាប់ ភ្នំពេញ ប៉ុស្ដិ៍ ថា៖ «ភាគច្រើន អ្នកមកញ៉ាំកាហ្វេ ត្រូវការ [relax] យើងខ្ញុំចង់ឲ្យមានហាងកាហ្វេមួយដែលប្លែក និងចង់ទាញអារម្មណ៍ និងចក្ខុពួកគាត់ទៅកាន់អតីតកាលក្នុងទសវត្សរ៍ទី ៦០ ទាំងការតុបតែងហាង និងបទចម្រៀង ក៏ដូចជាការអភិរក្ស»។
លោកបន្ដថា៖ «បទចម្រៀងជាច្រើន និងអ្នកចម្រៀងល្បីៗក្នុងទសវត្សរ៍នោះ យើងគួរតែយកមករក្សាទុកនៅទីនេះ។ អ៊ីចឹង យើងព្យាយាមប្រមូលបទចម្រៀងប្រមាណ ៣០០០ បទ ដូចជា សំនៀងរបស់លោកតា ស៊ីន ស៊ីសាមុត លោកយាយ ប៉ែន រ៉ន លោកយាយ រស់ សេរីសុទ្ធា ដែលមានបទចម្រៀងច្រើនជាង»។
ចំពោះទំនោរបែបសម័យទំនើបរបស់យុវវ័យភាគច្រើន លោកនិយាយថា លោកមិនរំពឹងខ្ពស់ក្នុងការទាក់ទាញចិត្ដយុវវ័យឡើយ។ ប៉ុន្ដែលោកយល់ថា វាត្រូវការពេលវេលាដោយសារលោកអះអាងថា បទចម្រៀងសម័យនោះនៅតែពេញនិយម។
លោកសារភាពថា៖ «សូម្បីតែបុគ្គលិកខ្ញុំ មុនដំបូង ពួកគាត់មានការធុញទ្រាន់ និងមិនចង់ស្ដាប់បទចម្រៀងសម័យដើមទេ។ ប៉ុន្ដែឥឡូវ មិនថាទៅដល់ទីណា កន្លែងណា ពួកគេមិនភ្លេចសំឡេងតន្ដ្រីទសវត្សរ៍ ៦០ ឡើយ។ ពួកគាត់យល់ដឹង និងចង់អភិរក្សបទចម្រៀងពីដើម»។
លោកបានឲ្យដឹងថា យុវវ័យមិនសូវមានទេ តែភាគច្រើន ជាអ្នកធ្វើការ រកស៊ី ណាត់ជួបជុំគ្នា។ ពួកគាត់មានអារម្មណ៍ប្លែកជាមួយបរិយាកាសបែបនេះ។
ហាងកាហ្វេកង់រទេះ (Wheel Garden Cafe) ស្ថិតនៅលើផ្លូវផ្សារដើមក្រឡាញ់ថ្មី ក្នុងភូមិត្រពាំងសេះ ឃុំគោកចក ក្រុងសៀមរាប ចាប់បើកពីម៉ោង ៦ ព្រឹកដល់ម៉ោង ១០ យប់រៀងរាល់ថ្ងៃ៕
បុគ្គលិកស្លៀកឈុតទសវត្សរ៍ ៦០។ ហេង ជីវ័ន
