.jpg)
ម៉ាដាមនំក្រែបមានសម្បក ២ ជម្រើសគឺ នំក្រែបរសជាតិផ្អែម និងរសជាតិប្រៃ។ សហការី
ភ្នំពេញៈ មិនបាច់ស្កាត់ទៅដល់ប្រទេសថៃ មកញ៉ាំនំក្រែបមាន ២ រសជាតិផ្អែម និងប្រៃ នៅខាងមុខហាងកាហ្វេធូដេ (Coffee Today) ក្បែរវិទ្យាល័យបាក់ទូក ទីធ្លាតូចល្មមតែមានអនាម័យនឹងផាសុកភាព ហើយអ្នកលក់ក៏មានភាពរួសរាយរាក់ទាក់ផងដែរ។
កញ្ញា គុន ណារី វ័យ ២៨ឆ្នាំ ជាម្ចាស់ហាងបានផ្តល់បទសម្ភាសមកកាន់ ភ្នំពេញ ប៉ុស្តិ៍ផ្ទាល់ថា៖ «មូលហេតុដែលធ្វើឲ្យខ្ញុំបើកហាងនំក្រែបនេះឡើងគឺដោយសារ ខ្ញុំចូលចិត្តញ៉ាំនំនេះ (នំក្រែប) ហើយមានតែនៅប្រទេសថៃ ដែលគេពេញនិយម នៅខ្មែរយើងមិនសូវមានទេ»។
ម្សៅនំត្រូវបានចាក់ទៅលើម៉ាស៊ីនមានសីតុណ្ហភាពក្តៅ ដើម្បីធ្វើឲ្យនំស្រួយ។ ជម្រើសសម្បក ២ ផ្សេងគ្នា មានសម្បកឥន្ទធនូ និងឆាខូលអាចផ្សំជាស្នូលផ្អែម (ទឹកឃ្មុំ តំណាប់ ទំពាំងបាយជូរ ស្ករ ឥណ្ឌូនេស៊ី គ្រាប់ស្វាយចន្ទី សូកូឡា នំសរសៃមាស ពោត Nutella ស្ករ Marshmallow ជាប្រភេទដែលអតិថិជនចង់បន្ថែម)។
កញ្ញាបន្តថា៖ «ស្នូលប្រៃវិញ យើងអាចបន្ថែមជាសាច់ហេម សាច់ក្តាម ឈីស សាច់ក្រក ពងមាន់ បាក់យ៉ុង និងមានបន្ថែមដោយមិនគិតប្រាក់មាន ទឹកម្ទេស ទឹកប៉េងបោះ និង ម៉ាយូណេស។ កាន់តែពិសេសទៀតនោះយើងអាចលាយស្នូលប្រៃ និងស្នូលផ្អែមជាមួយគ្នាបានធ្វើឲ្យរសជាតិកាន់តែឆ្ងាញ់ថែមមួយកម្រិតទៀត»។
តូបដ៏តូចច្រឡឹងលក់នំក្រែបទល់មុខសាលាបាក់ទូក។ សហការី
ម៉ាដាម នំក្រែប ទើបតែមានទីតាំង ១ កន្លែង ក្រោយពីចាប់ផ្តើមបើកនៅខែសីហា ឆ្នាំ ២០១៨ តែធ្វើឲ្យមានការពេញនិយមច្រើនពីសំណាក់មនុស្សគ្រប់វ័យ ជាពិសេសសិស្សសាលា ដែលមានតម្លៃចាប់ពី ២ ដុល្លារ ឡើងទៅដល់ ៣ ដុល្លារ និងទៅតាមការកុម្ម៉ង់របស់អតិថិជន ដែលចូលចិត្តបន្ថែមរសជាតិថែមទៀត។
ក្រៅពីរសជាតិឆ្ងាញ់ ម្ចាស់ហាងក៏បានរៀបរាប់ពីគុណប្រយោជន៍សុខភាពនៃនំក្រែបយ៉ាងដូច្នេះថា៖ «ចំពោះសម្បកឆាកូ ជំនួយដល់សុខភាព និងសម្បកឥន្ធធនូផ្សំពីទឹកដោះគោជំនួយដល់ស្បែក»។
ម៉ាដាមនំក្រែបដែលភ្ញៀវពេញនិយមញ៉ាំជាងគេ គឺស្នូលប្រៃដែលមានលាយជាមួយពងមាន់ ហតដក បាក់យ៉ុង និងសាច់ក្តាម ហើយនៅក្នុងថ្ងៃដែលស្ងាត់បំផុតយ៉ាងហោចណាស់ក៏លក់បានចាប់ពី ៣០ ទៅ ៥០ នំដែរ ក្នុង ១ ថ្ងៃ។
ម្ចាស់ហាងនំក្រែប កញ្ញា ណារី ដែលបានទៅរៀនធ្វើនំផ្ទាល់នៅប្រទេសថៃបានបង្ហើបថា ហាងនេះបានចំណាយទុនអស់ចំនួន ៧ ពាន់ដុល្លារ។
នៅដើមឆ្នាំ ២០១៩ កញ្ញា នឹងមានការពង្រីកសាខាមួយទៀតនៅទួលគោក ដោយហាងមានទំហំធំជាងមុន ហើយនំក៏មានជម្រើសកាន់តែច្រើនប្រភេទ៕
