The Phnom Penh Post Search

Search form




Logo of Phnom Penh Post newspaper Phnom Penh Post - នំ​ភីហ្សា​រាង​ដូច​កា​រ៉េម​កី ល្បី​រស​ជាតិ​ឆ្ងាញ់ ​តែ ៩ ពាន់​រៀល




នំ​ភីហ្សា​រាង​ដូច​កា​រ៉េម​កី ល្បី​រស​ជាតិ​ឆ្ងាញ់ ​តែ ៩ ពាន់​រៀល

Content image - Phnom Penh Post
នំភីហ្សា​ដែល​មាន​រាង​មូល​ស្រួច​ដូច​ការ៉េម​កីពេញ​និយម​សម្រាប់​កុមារ និង​យុវវ័យ​​។ ឈឹម ស្រីនាង

នំ​ភីហ្សា​រាង​ដូច​កា​រ៉េម​កី ល្បី​រស​ជាតិ​ឆ្ងាញ់ ​តែ ៩ ពាន់​រៀល

ភ្នំពេញ: ដោយ​សារ​តែ​ភាព មិន​ចេះ​ទំនេរ​នៅ​ស្ងៀម អតីត​បុគ្គលិក​គណ​នេយ្យ​ក្រុម​ហ៊ុន​ឯក​ជន អ៊ិត សុវណ្ណី ក៏​សម្រេច​ចិត្ត​បើក​ហាង​លក់​នំ​ភីហ្សា​ដែល​មាន​រូបរាង​ប្លែក​ពី​គេ ទាំង​រស​ជាតិ​ និង​ការ​វេច​ខ្ចប់​។

ម្ចាស់​ហាង Lucy's Cone Pizza ដែល​ចូល​ចិត្ត​រៀន​ធ្វើ​ម្ហូប​ពេល​ទំនេរ​ពី​ការងារ​ និង​មាន​ជំនាញ​ចម្អិន​អាហារ​អឺរ៉ុប​រូប​នេះ​បាន​រំឭក​ថា៖ «មុន​នឹង​ ខ្ញុំ​សម្រេច​ចិត្ត​បើក​ហាង​នេះ​ឡើង​គឺខ្ញុំ​បាន​ដើរ​មើល និង​ស្រាវ​ជ្រាវ​អស់​ហើយ​ថា​ នៅ​ក្នុង​ស្រុក​យើង​មិន​ទាន់​មាន​អ្នក​ណា​ធ្វើនំ​ភី​ហ្សា​ប្រភេទ​នេះ​ទេ។ អ៊ី​ចឹង​ក៏​កុម្ម៉ង់​ម៉ាស៊ីន​ធ្វើនំ​ភីហ្សា​នេះ​មក​ពី​ចិន»។

លក្ខណ​ពិសេស​នៃ​ភីហ្សា Cone ត្រូវ​បាន​អ្នក​នាង​រៀប​រាប់​ថា៖ «បើ​សិន​ជា​យើង​មិន​ចេះ​ធ្វើ​ទេ​គឺវា​អាច​ធ្វើ​ឲ្យ​ធ្លុះ ឬ​បើវា​ក្រាស់​ពេក​វា​អាច​ធ្វើ​ឲ្យ​សាច់​ខាង​ក្នុង​មិន​ឆ្អិន ពីព្រោះ​ថា​សាច់​នំ​ភី​ហ្សា​នេះ​វា​ខុស​ប្លែកពី​សាច់​នំភី​ហ្សា​មូល​ធម្មតា អ៊ីចឹង​ទាម​ទារ​ឲ្យ​យើង​ចេះ​ខ្លាំង​ក្នុងការ​លាយ​ធ្វើ​សាច់​នំ»។

Content image - Phnom Penh Post
នំភីហ្សា​មាន​ស្នូល​ឈីស​ច្រើន និង​រសជាតិ​ប្លែក​។ ឈឹម ស្រីនាង

គោល​បំណង​របស់​អ្នក​នាង គឺឲ្យ​ភ្ញៀវ​ទាំង​អស់​បាន​ភ្លក្ស​រសជាតិ​ភីហ្សា​មាន​គុណ​ភាព​ល្អ ឆ្ងាញ់ និង​តម្លៃ​សម​រម្យ។

អ្នក​នាង​បាន​បញ្ជាក់​ថា៖ «ជា​ពិសេស​ចង់​ឲ្យ​ភ្ញៀវ​ខ្មែរ​យើង​នាំគ្នា​គាំទ្រ​ស្នាដៃ​របស់​ខ្មែរ​គ្នាឯង​ឲ្យបាន​ច្រើន។ អ៊ីចឹង​ហើយ​បានជា​ខ្ញុំ​ប្រឹង​ប្រែង​បង្កើត​ជានំ​ភី​ហ្សា​នេះ​ឡើង​ជាមួយ​រស​ជាតិ​ពិសេស គ្រឿង​ផ្សំ​ដែល​មាន​គុណ​ភាព​ល្អ​មិន​ចាញ់​នៅ​តាម​ហាង​ធំៗ​ ឬក៏​ហាង​មកពី​បរទេស​នោះ​ទេ»។

ក្រោយ​ពីបើក​ដំណើរ​ការ​បាន​ជិត ២ ខែ អ្នក​នាង​ទទួល​បាន​អតិ​ថិជន​ច្រើន ជាពិ​សេស​ក្មេងៗ​អាយុ​ចាប់ពី ៧ ឆ្នាំ​ឡើង និង​សិស្ស​សា​លា។

Content image - Phnom Penh Post
អ្នក​នាង អ៊ិត សុវណ្ណី ម្ចាស់​ហាង​នំភីហ្សា។ ឈឹម ស្រីនាង

អ្នក​នាង​ថ្លែង​ថា៖ «ពួក​គាត់​ចូល​ចិត្ត​ញ៉ាំ​ណាស់ ដោយ​ក្នុង ១ ថ្ងៃ​គឺខ្ញុំ​អាច​លក់​បាន ១០០ នំ​ជាង។ ពេលខ្លះ​គឺ​យើង​លក់​អស់​មុន​ម៉ោង​តែម្តង អ៊ី​ចឹង​ភ្ញៀវ​មិនបាច់​ភ័យ​ថា​នំ​ភីហ្សា​របស់​ខ្ញុំ​សល់​ពី​ម្សិល​នោះ​ទេ គឺ​យើង​ធ្វើ​មួយ​ថ្ងៃ​លក់​មួយ​ថ្ងៃ»។

នំភី​ហ្សា​មាន​រស​ជាតិ​គ្រឿង​សមុទ្រ ប៊ីប៊ី​ឃ្យូ​សាច់​មាន់​ តុម​យ៉ាំ សាច់​ក្រក Pepperoni និង​មាន​ឈី​ស​ច្រើន ក្នុង​តម្លៃ​ពី ៩ ពាន់​ទៅ ១ ម៉ឺន​រៀល ហើយ​រាល់​ការ​ទិញ​នំភី​ហ្សា ២ ឡើង​ទៅ​​ថែម​ជូន​កូកា ១ ដប។

ហាង​លក់​នំភីហ្សា Lucy's Cone Pizza ស្ថិត​នៅ​ផ្លូវ​លេខ ៤០៨ ក្រោយ​ក្រុម​ហ៊ុន​ហុងដា​លក់​ម៉ូតូ​ មហា​វិថី​ម៉ៅ​សេ​ទុង និង​ទំនាក់​ទំនង​​ទូរស័ព្ទ​លេខ ០៧៧ ៦០៧ ១៩៥៕

អត្ថបទគួរចាប់អារម្មណ៍